【理財個案】36歲讀者不懂分析股票動向，分段買入幾隻重磅股後，遇到跌市又唔識止蝕，用盡積蓄溝貨，現在不知應該用時間守還是走貨好。龔成老師表示，投資新手必須認清5點重要觀念。
理財個案（1）讀者來信：用盡積蓄溝貨
龔成老師，本人36歲，早幾年不懂得認真買股票情況下，不懂得分析股票動向，分段買入以下幾隻重磅股票。但因唔識止蝕，只懂一路等，每次跌就溝 ，用盡積蓄。
到現在唔知應該用時間守還是走。好苦惱、唔敢同人講。
點睇以下股票去向？
現在想你比啲意見，點睇以下股票去向：
| 股票 | 股數 | 股價 |
| 1516 | 8000股 | 14.76 |
| 3800 | 3800股 | 13.44 |
| 0909 | 6000股 | 14.99 |
| 1810 | 3000股 | 33.6 |
理財個案（1）龔成老師分析：愈跌愈溝是錯誤的做法
首先，你現時架投資方法係有明顯問題。
好多散戶做法，就係買入的股票愈跌愈溝，其實係一個好錯的方法。
我地決定加注與否，要睇幾個因素，記住，並不是「拉低平均買入價」為目的。
投資必學5個觀念
- 第一，要分析這股的質素，如果無質素，就再跌都唔加。
- 第二，這股的類別，如潛力或增長或收息類等，是否與你的財富組合匹配，比例是否適合。
- 第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。
- 第四，現價是否有投資價值率，要平，或起碼合理，不能貴。
- 第五，你要在加注後，仍有現金剩。
重點是組合比例與配置
記住，重點不是「拉低平均價」，而是組合比例與配置。
你有的股票，唔係長線投資價。但佢地都係風險略高，或者質素較一般。
除了小米(1810)外，其餘融創服務（1516）、協鑫科技(3800)、明源雲(0909)都只宜小注。
而且，我發現你買入價都貴，相信你係熱炒時跟風去買。
因此，你最大問題不是持股，而係投資知識太薄弱。如果分析企業質素，定平貴度這2大重心，你完全掌握唔到，建議你先增進知識，才再進行新投資。
建議先用指數ETF作目標
就算好想買，都係建議先用指數ETF（2800, VOO）作目標，並以月供或分注去進行。
我建議你要多讀投資相關書本、年報，新聞和報讀相關課程。書本上，你可以睇我寫架《80後千萬富翁》、《財務自由行》和《股票勝經》，都適合初學者用於強化基礎知識。
另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
理財個案（2）讀者來信：現在是投資美國國債券的好時機？
老師我想問現在如果投資美國國債券會唔會係好時機？
因為我係新手未接觸過債市，現在買美國國債會唔會係高風險？
理財個案（2）龔成老師分析︰債券只是產品
債券，這其實只是「產品」，物業、優質股是「資產」，所以從財富本質上，我地應較集中持有「資產」(如優質股、物業等)，才對我地最有利(你可以睇睇《財務自由行》一書，我從財富本質上，講述了當中原理)。
若果你是退休人士，投資目標應以創造被動收入為主，債券這類收息工具就合適。(大前提是要A級債券)
相反，你係較年青，投資應以增值為主，債券這類工具就未必適合。
理財個案（3）讀者來信：煤氣、澳博、小米好嗎？
想問以下幾隻股，因為短期好似較一般：
- 0003 香港中華煤氣
- 0880 澳博控股
- 1810 小米集團－Ｗ
理財個案（3）龔成老師分析︰投資係睇長線
記住，我地投資係睇長線，中短期波動唔係重點。最重要係佢長線核心質素，如果無明顯變差，我地就應該照長線持有。
小米（1810）近年發展智能車，投入了較多資金，風險高左，如果成功，股價可以倍升，但如果失敗，股價會進一步弱。不過，佢未非完全無技術，所以不一定完全負面，但發展仍要時間，以及風險高左。
佢近年的生意較一般，競爭大左，佢回勇的路仍長，增長力也比過往略減。
小米唔好入得太急
現時業務上，佢建立的平台是佢長遠的增長動力，先賣手機，再利用手機的平台延伸銷售小米家電。長遠不是無發展，佢的產品性價比高，相信在全球好多個國家都會有市場。
這股可長線，合理區底，分注可以，但唔好入得太急，預佢股價仍波動。但佢增長力的確比過往減左，以及風險度高左，因此，值得投資的金額略比過往減少左。
煤氣不宜持貨太多
至於煤氣(0003)，質素依然有，但比以往弱左。投資可以，但不宜持貨太多。
澳博控股（0880）都有質素有發展，可以長線持有，不過發展力不及過往年代。
佢投資價值仍在，不過就不是高增長股，相信有平穩增長的能力，可以長線持有，但就不建議太過大注。
理財個案（4）讀者來信：每月100%只供voo有冇問題？
你好呀大師，小弟今年讀緊書19歲，有一年股票經驗，想問下由依家開始每月100%只供voo有冇問題？（可以長供同長揸）
另外，小弟家境依家讀緊運動相關的高級文憑，你會建議我修讀金融相關的學位，還是畢業後投身紀律部隊會有更好的未來？ 感激萬分。
理財個案（4）龔成老師分析︰不建議太集中投資一個地區
Vanguard S&P 500 ETF（VOO）就是追蹤美股的ETF，追蹤指數是標普500指數，當中都是全球有實力的公司，有長線投資價值。
由於美股波動，可以用月供或分注的模式進行，長線持有，這是一個最好的投資策略。
另外，我不建議太集中投資一個地區，你可以同時考慮香港的指數型基金都得，這樣能更加平衡組合。
「行行出狀元」
至於職業的選擇，其實好睇個人，正所謂「行行出狀元」，不是一定要投身商界先會出人投地。李麗珊，張嘉朗，谷愛玲都是靠住自己的優勢和努力，創造了奇跡。
你現在仍然年輕，要多認識自己，了解自己的長處和想發展的領域。
金融和紀律部隊可謂是兩個完全不同的領域，你要先了解當中需要的條件，如果決定要投身邊一個行業，就要努力吸收當中的知識，成爲行中的表表者。
加油，相信你可以的！
理財個案（5）讀者來信：有咩股係有10厘息相對穩陣？
龔sir，請問有咩股係有10厘息相對穩陣既？
理財個案（5）龔成老師分析：中石化收息可以、增長力不強
中石化（0386），質素算是不差，收息可以，但增長力方面不強，因此質素又未到好好，始終這只是商品企業，沒有一些太大的優勢。
石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。
生意不差，但增長力不強，這是受油價等因素影響，反映佢處於一個被動的狀態。收息是可以的，但增長力唔算強，現價合理。
更多理財個案、投資入門相關內容
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。
