親子熱話｜小一入學選校由K2開始！學校講座、參觀學校做到足

【親子熱話】話咁快喺三年幼稚園都已經步入尾聲，最擔心嘅應該係升小之路，亦相信有唔少K3家長同我一樣，都要等到最後一刻先知小朋友升去邊間學校。

親子熱話｜小一入學選校由K2開始

我和先生都不是在現時居住的地方讀書，而家係等緊6月嘅大抽獎，先會知道派到邊間學校讀書。其實由K2開始，我已經入咗唔同嘅升小一群組，希望收集一下不同家長的意見，瞭解一下我哋區嘅小學情況。不過，老實講，入到這些群組其實都會帶來不少的壓力。

因為自問係一個比較Hea底嘅家長，加上疫情關係，都沒有為小朋友報好多「有用」嘅「興趣」班。何謂「有用」呢？其實是指很多不同的證書課程。

我都是很遲才知道原來而家啲小朋友由3幾歲人仔，已經要拎一大堆劍橋英文、牛津、哈佛(講笑)嘅證書，在我聽來真係一啲「興趣」成份都無。我有做嘅只係參加學校的講座，聽聽學校的教學理念，再報名參觀學校，俾小朋友去睇下學校環境，感受一下小學。

直到K3開學，好似所有事情突然都急起來，因為小一入學統籌第一階段好快就到，呢個時候我哋又去多咗幾間心儀學校參觀，幾間都係區內熱門學校，好多都需要111。

所謂111即不論是自行收生、大抽獎的甲及乙部，都選同一間學校，以表達自己的心意，方便日後叩門時加點誠意。當然，111並不是必定的，但很多學校都約定俗成了這個方案。

其實我們都心知以只有15分的我們來說，自行收生階段成功機率好低，而我哋嘅選擇，最後係喺幾間入面選最以近屋企為主，最終當然就是沒有成功獲得取錄，要等到下一階段的大抽獎環節。

我哋喺今年一月交表之前，都有喺阿仔學校聽咗填表講座，亦有睇教育局網站上嘅教學，知道甲乙部可以填唔同學校，因為甲部係可以選填全港任何三間小學，不過呢個部分嘅學額只有剩餘學額嘅5%，真係所餘無幾同埋係需要唔知幾多嘅運氣同福氣先會成功。

所以喺我哋預算最後需要叩門嘅機會之下，我甲同乙部最終都係填返自行收生時的選擇，希望提高入讀機會。可能有好多人會未必填好多選項，但為免要等全部人派完派剩之後，先被分到十分唔理想嘅學校，都建議各項應填盡填，二十個選項入面填夠佢二十個，咁先係博到盡。

可以咁講喺二月填好晒，交好表之後，到六月放榜當日都可以話係比較無咁心理受壓。我覺得真係無需為此擔心太久，始終都有幾個月時間，無謂俾太大壓力自己及家人。現階段可以做嘅，可能係為叩門而做定啲準備。

好多學校都話唔收個人檔案，不過，我覺得無邊一個父母唔會為此而做足功課，既然係咁，不妨花啲心思，諗下點樣可以喺少少幾頁入面，盡量將小朋友長處及優點表現出來，為仔女嘅升學路行前多一步。

我都要為阿仔搵少少比賽參加一下，希望可以令佢有亮眼一點嘅頁面可以吸引一下校長及老師嘅眼球啦！唔知有冇人有啲好方法可以令大家唔好太緊張呢？