【親子熱話】2023年3月1日係一個值得紀念嘅日子！因為大家抗疫三年之後，終於迎嚟全面復常嘅一日，政府正式宣布可以唔使再戴口罩，戴咗三年有多口罩之後，可以直接全面脫罩。之但係，喺宣布咗可以脫罩之後，你仲有冇口罩喺屋企？有冇立即唔再戴口罩？
親子熱話｜仍然戴住口罩出街
老實說，筆者喺3月1日呢一日仍然戴住口罩出街，而深深都戴住口罩返學，雖然街上都見到有部份人開始以真面目示人，但對於仍然未中過招嘅我哋嚟講，始終比較保守。阿仔呢日早上見到有人無戴口罩時，都會問點解佢哋唔戴口罩嘅？已經無晒病毒嗱？
小朋友：唔想病想繼續戴口罩
我答佢其實新冠病毒已經不會消失了，不過已經中過嘅人好多，變了跟普通傷風感冒一樣了。於是我問個仔想唔想戴口罩，佢就話想繼續戴，因為佢唔想病。經過半天的觀察，我喺自己住嘅區附近見八成以上嘅人，都仍然戴住口罩。
健康生活｜3個原因繼續戴口罩
我諗大致上都有幾方面原因，一嚟可能之前真係儲備咗一定數量嘅口罩 (好似我自己就係)；其二係習慣咗，暫時未放低到嗰份安全感；另一樣可能就係同我一樣未中過，都想為自己添多份保護，當然都唔排除其他可能性，例如為咗美觀等等。
選擇權在大家手上
個人就覺得無需要理會其他人戴或不戴的原因，只要自己舒適自在就可，反正而家選擇權喺返大家手上面，大家可以珍惜呢份得來不易嘅選擇。
理解小朋友的意願
至於小朋友方面，呢一日睇到啲心理學家嘅訪問，就指佢哋可能會因為除口罩戴來唔同嘅心理影響，可能會產生焦慮，例如擔心會與別不同，又或者有壓力，家長需要做的是適時問小朋友對戴口罩的看法，看看他們的意願，看自己的條件是否可以唔戴，向小朋友解釋唔戴的風險，戴口罩的好處等等，讓他們知道戴與唔戴的好與壞，以及不用介意別人的說法和目光。
教小朋友唔戴口罩的禮儀
假如小朋友希望唔戴口罩，家長亦要記得與他們共同學習脫罩的禮儀，例如打乞嗤要遮住口鼻用手遮完口鼻的話謹記要洗手，面對其他人時盡量保持微笑，這些看似很簡單的禮儀，或可能會因為幾年疫情戴慣口罩而忘記了，所以小朋友想唔戴口罩，都可能需要重親適應，家長要記得與他們一起重新學習。
再次感受無罩生活
我家的小朋友經歷了大半天仍然有口罩的生活後，到了晚上要從外婆家回家時，他跟我說想試試除口罩，我便立即答應了， 因為晚上回家時人比較少，都是一個好時機讓他再次感受無罩生活。
除口罩後的快樂
他一步出大廈外面就立即除口罩，我即時見到天真快樂的笑容在他臉上展現出來，佢仲同我講啲空氣好香，見到佢一路行返屋企時都是心情非常愉快，我都為佢感到十分開心。呢三年真係欠了小朋友很多快樂時光呢......
更多親子教育及健康生活內容
作者簡介：深媽是一名雙職媽媽，曾任職傳媒行業，做過副刊親子、教育、家居、健康、寵物版記者，現時日頭是專業Digital Marketing人，放工返到屋企即變身成「湊仔戰士」，同屋企一隻即將4歲的跳跳紮兒子搏鬥。攰，但相信不少媽媽都同我一樣樂在其中！
免責聲明：本網頁所有專欄作者的觀點，不代表本媒體立場。
