【理財個案】讀者：龔成先生，你覺得錦上路西鐵站樓花應唔應該撻訂？2年前買1房半係72x萬，但而家樓市跌，恐怕要枱很多錢上會？
龔成老師分析︰自住物業最重要適合自己＋供得起
其實自住物業的話，最重要係佢適合自己長期生活需要(講緊未來10-20年)。同埋長線有信心供得起，咁就可以。好多人會將投資因素，放埋落自住物業度考慮。我唔會話錯，但其實未必有太大必要。因為自住物業，就算佢升定跌，一般人都因為咁去輕易沽出佢架物業(除非你長線可能因為家庭需要，會打算再換樓，咁就另計)。
樓價變化只影響你心理
即係話，個物業價格變化，好多時只係影響緊你心理，而非實質。反而，你供款出問題，就真係有機會影響你持有物業狀態。或者佢已經唔適合你居住，先至有機會去進行換樓。所以，「生活需要」同「供款能力」，永遠先係自住樓優先考慮重點。
如果你係自住，又配合倒上面2個要求，咁我會建議你保留。
無足夠錢上會 先好考慮撻訂
除非你真係無足夠錢上會，你先好考慮撻訂。因為我自己預期未來時間，香港物業會係平穏發展，唔大升，都唔大跌。所以，唔好因為諗住將來會明顯再平，所以撻訂先。另外，你要知道撻訂，發展商一般有權向你追收差價。即係佢日後再放出市場賣，個價低過當日賣比你個價，中間差額佢係可以問你追討翻，你要明白有而一個風險。
更多理財方法及股票投資入門內容
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。
