【理財個案】龔sir，在你post同你出版的書中，學了不少股票知識，終於靠一己之力今年上車。但我對自己呢個決定抱有疑問，想請你賜教下你意見。以下情況︰本人39歲，月入$49,000，剛剛買左樓（355萬）居屋，做了9成按揭還30年。
美股：現有$300,000港元價值
- NVDA
- AMD
- VOO
港股：$100,000港元價值（66,1038）
- 流動資金 大約$120,000
- 新買的樓係自住，太太入息好少，將來無計劃生小孩。
很怕自己供唔掂
- 我很怕自己供唔掂，因為始終近40歲先開始供樓， 起步慢。香港經濟環境近排差 怕被炒 。雖然炒後 我都有信心搵到工 但人一定無呢個數 (預計可找到份$31,000人工)
- 我想問呢個情況，我是否決定錯誤，還是自己太過杞人憂天
是否決定錯誤？
- 理性上 : 自住樓係必需 因60歲後租樓困難
- 情感上: 一想起要供到69歲 又要為未來退休打算 想到呢到 感覺好辛苦
所以請教襲sir 賜我 你意見
龔成老師分析︰做好投資 提升自己的財富深度
1) 其實人生好多際遇，唔到我哋去預算。我哋可以做的，就係當下作出最好的準備。以你現時情況，我相信工作維持到，你生活和供款應該不成問題。所以，你要係此期間，將空閒的資金盡力做好投資，提升自己的財富深度。令到自己背後有更多(資金)支持，萬一出現突發事情，都有空間去應付。現時你擁有約$40萬股票，如果你在供樓上擔心，建議你之後多儲現金，不要心急買股票，這樣可以增加你的防守力。
世界有好多變數
2) 我覺得你係一個有計劃的人，所以好多嘢都會思考得好全面，先至令到自己有而方面的困擾。你要明白，而個世界有好多變數，我們只能係自己可以做倒的範圍盡力去做。不論投資也好，人生也好，都係盡力而為就可以，唔好比自己過份的壓力，咁會好易拖垮自己。
因應當時的情況 去進行調整
到真係出現變數的時候，我哋再去因應當時的情況，去進行調整，咁就可以。最後，你現時投資的股票，都有長線投資價值。不過留意，個別行業和地區，「長線」最好控制在組合3成和7成以內，咁會較穏當(你現時科技股和美股，似乎都有少少超標)。
更多理財方法及股票投資入門內容
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。
