理財個案】讀者:龔sir你好,我係一個fresh grad,我真係好感激你,你既故事令我覺得好熱血,令我覺得我都可以唔受環境所限,要達到目標!我每日都會諗起你發奮去創富既事,你真係我既偶像,真心。好多謝你!

日日加班 收入只有15k

雖然呢一刻我好熱血,但唔知前路係點,我返工就返得好唔開心!我覺得自己社交能力好弱, 而且份工限制住唔可以工作時做自己野,每日加班加到7,8點。單次車程又用至少1.5hr。感覺已經冇左自己時間。而份工嘅收入只係15k。

搵到parttime都累到無時間做

本身自己找咗份parttime,home office既,如果每日放工做多d,一個月可賺3000。但正職已令我好累,根本好難真係賺到3000。而且我好擔心自己會唔會有時間去學投資。我都好想上你堂,但而加先第一個月返工,儲蓄10000都冇。要靠住自己先。

我應該點做好呢?

  1. 如果轉工,可能會整花個cv。(而且未必有15k)
  2. 如果唔轉,又會有好多問題。
  3. 應該點先可以在煩忙既工作中,儲蓄更加既現金同學習投資?

個案重點:

  • 初踏入社會
  • 現時收入不多
  • 現金不足

重點目標:

  • 可能轉工
  • 如何提升收入

龔成老師分析:把握機會吸收工作經驗

剛剛出來做嘢,人工不高、儲蓄不多,這是正常的,你有鬥心,已經比不少人強,但要成功,都需要一些時間,好難話一次過突破所有野。你現時正職雖然只有$15000,但唔洗急著轉工,你現時先第一個月返工,因為初工作人工不高是正常的,你要把握機會吸收工作經驗,同埋學習。

第一個月返工 最好試6個月

但我希望你認真想想,這份工長遠的情況,如果你認為長遠這是自己的方向,長遠人工會慢慢增加,這刻人工低不是問題,但如果長遠發展有限,你又不太開心,加上人工又不高,我會建議你轉工!

不過,你始終只是第一個月返工,我會建議你試耐少少先,最好試6個月,了解工作是否適合自己,先決定是否轉工。

不用為15000元留下來

至於你表示擔心轉工找不翻$15000人工,其實$15000不是一個高人工,如果你確定這工不適合自己,不用為$15000留下來(當然,你試6個月先)。

至於你兼職果度,明白你已經好累,但我都希望你堅持一下。

如果你有目標 就會有動力

其實我最初工作,正職人工$8000,逼自己儲$10000,當時逼自己做好多兼職,一個星期返7日,初出來做野頭1、2年我最忙,但我都做到,之後就開始鬆翻少少。初頭是困難的,但如果你有目標,就會有動力。我希望你這刻保持這份正職,同時做下兼職,等你可以儲多D錢,到遲D先辭去兼職。

兼職如影響正職事業發展就要停

但要留意,如果兼職會影響你正職的事業發展,就要停,因為你不值得為$3000的兼職,而影響了長遠事業的發展。記住,我地所有事情都是以長遠分析,你要想想,5年後,10年後,你想怎樣,當你確定目標後,這刻所做的事能否幫助你這目標?你要好好想清楚。

所有嘢都是逼出來

另外,如果兼職真的佔你太多時間,你都要取平衡,我記得自己最初工作頭兩年,我可以一邊做正職、一邊兼職、同時仲會逼自己睇投資書,這是我人生最忙的2年,但所有野都是逼出來。

我做兼職,都是補習之類的工作,時薪較高,同時時間有少少彈性。你要在兼職與學投資方面,取一個平衡點。

剛工作 未有儲蓄好正常

至於投資方面,你剛出來社會,未有儲蓄好正常,你只要控制好你的支出,努力儲本金,之後就可以開始進行投資。我睇得出你有一團火,好心急想盡快創富,但投資不要太心急,要一步步,理財是一個長期過程,你要堅持。

最重要是保持著這團火

你這刻先繼續做正職先,試6個月,到時再以長期的角度,去分析這工作是否適合自己。兼職方面,如果影響正職的發展就停一停,如果無影響,但就略有疲倦,就試下堅持下,到有一定的本金後就投資,財富就會更快增長。你最重要是保持著這團火,加油!

更多理財方法及股票投資入門內容

按此免費訂閱《香港財經時報》HKBT 新聞快訊

作者簡介:龔成(龔成Facebook專頁)是財經書作者,至今出版超過10本財經書,包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等,過往曾以萬元月薪滾出數百萬,現為股票班導師,身家過千萬元。

免責聲明:本網頁刊載的所有投資技巧及分析,僅供參考用途。讀者作出任何投資決定前,要自行判斷及審慎處理,更要自行掌握市場最新變化。若不幸招致任何損失,概與本網頁及相關作者與受訪者無關,本網頁概不負責 。而本網頁所有專欄作者的觀點,不代表本媒體立場。