【網民熱話】香港地物價高漲，究竟幾多錢先可以維持生活得嚟又有生活質素？有網民發文指自己月薪萬零蚊，除了做gym和剪髮，一個月開支完全夠用，仲要儲到錢。即睇詳情！
單身港男月薪1萬元 做到gym兼儲到錢
有網民在連登討論區發文表示自己月薪1萬多元但足夠應付，更列出自己的生活費。發現每月開支除了498元用於健身，200元用於剪頭髮，暫時未有其他開支。而車費膳食費則未有計算在內。他詢問大家，自己的月薪在儲到錢的前提下是否已經很夠用。更指若果將來自己轉了另一份近30,000元的工作，是否以後的生活和娛樂開支都不用「睇住價錢，就住就住？」
圖片：連登討論區截圖
網民熱話｜單身港男月薪1萬元、做到gym兼儲到錢｜生活費列表曝光
網民回應
事件引來網民討論，不少人指出樓主能以月薪萬元過活，皆因他「住屋企」：
- 無住屋、食飯、水電開支，真係可以
- 同屋企人住又唔洗交租當然夠用
- 同父母住係可以好無敵
- 你住屋企基本上都無其他洗費，除非你娛樂開支好大
- 你都冇住屋同水電煤呢啲固定支出，點會唔夠用
- 係癡屋企先夠用，一旦搬出嚟住，你份糧都唔夠交租同屋企人住唔洗本，因為你唔返工都有人維持你基本需要
有心水清的網民表示萬零蚊是否夠用，其實也要視乎有冇「俾家用」：
有啲同屋企住除咗俾家用仲要俾水電，如果家用收得順或唔使俾其實係送緊錢俾你。如果調返轉收到足，條數又唔同講法。所以萬零蚊夠唔夠使就係要考慮埋呢啲。但樓主完全唔講，就唔會有結論。
- 同父母住最大使費係家用，問題係你俾幾錢屋企
- 有俾家用屋企嘅話其實都只係剛剛好，但唔會儲到錢
維持生命成本可以很低
亦有人表示，維持生命的成本其實可以很低，：
其實維持生命既費用好低，你覺得夠駛就得
- 當你收入越高，就唔會再想去平gym，剪平salon，食平野。點會覺得好夠，除非冇要求生存就算咪冇所謂
- 睇你嘅洗費邊忽有生活質素
- 你無慾無求，萬零蚊夠你生存，但唔係生活
- 你呢啲叫躺平
- 唔覺得你有需要學人有生活質素。你係對生活質素有追求，你第一樣野諗既就係搵多啲搬出去自己住先，而唔係諗同屋企人住搵少啲係咪夠做。萬零蚊交埋家用都冇晒啦
網民：可以飛轉日本添啦
當然有網民認為樓主的月薪夠用，更可以去旅行：
- 夠用呀，唔駛租同供樓真心夠用！仲可以慳住洗一年去窮遊兩次
- 唔追求名牌其實一定夠，仲有錢一年飛一兩次日本啦
甚至有網民教樓主如何花錢花得更慳：
- 再簡單d, 買個啞鈴樓下公園做，剪頭髮樓下50都搞得掂，咁又慳番650蚊
- 做gym可以去康民署體育館做，$14/鐘，剪頭髮可以去速剪$50
網民分享經歷
有不少熱心網民紛紛分享自己的經歷，亦有給予建議：
- 我自己都係痴屋企住，唔有錢但叫做唔憂柴米。老實講一開始都好似你咁覺得萬幾夠洗，但大個咗都對自己人工有要求。如果你對生活質素無要求當我無講過。我唔係一個物慾好大的人，但我求知慾好高，會想睇多啲呢個世界，所以不斷儲錢，之後去旅行試不同的嘢。
- 一個月三萬左右，做緊裙腳仔。家用比一萬，儲一萬，剩一萬洗。返工要過海，每個月會買下野，出下船釣魚都仲有兩三千剩，萬零點會唔夠洗？
- 覺得睇戲幾時都唔使睇住價錢，每個月睇得幾多啫，夾到時間，聲音畫面靚更重要。食嘢就視乎你去開咩地方，街邊under $250嘅餐廳，兩三日食一次都只係幾千，一星期食一次放題燒肉都冇乜嘢。但如果經常食$400+就做唔到。
更多關於網民熱話的內容
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。
