【理財個案】讀者問關於保險問題：「我舊年養咗隻狗仔，佢而家1歲半，我開始想為佢健康打算，唔想佢大咗冇錢預備比佢睇醫生，又或因使費大而影響醫療...」
我有兩個諗法
- 買寵物保險，年費2880，保額每年最多80000
- 自己用種子基金30000蚊左右，做年回報8%左右既收息股複息
保險好處
- 早出事既保額比投資大
- 因為先支出，用起上黎心理壓力細
保險唔好處
- 純支出，冇事就白比
- 出事果樣，唔係保險範圍，變左保費又比左，醫藥費又要另外比
種子基金收息股好處
- 錢掌握係自己手
- 就算有其他意外，都可以用番基金d錢黎用到
唔好處
- 早年滾出既資金唔多
- 如果中間有事要用，會削減左本金，影響後邊回報
其實唔止狗仔，我自己都有呢個問題，38歲最近都諗緊要唔要body check ，要唔要買保險。身邊朋友冇咩人傾到呢個topic。成哥可以比d意見我嗎？
龔成老師分析︰對寵物保險無研究
首先，寵物部份比較抱歉，我對相關保險無研究。同埋無養過狗仔，無乜照顧和佢架醫療成本概念，所以唔方便比具體建議你。其實我覺得狗仔醫療費用如果唔大，比較建議用一般現金支付。因為保險概念雖然係轉移風險，但當中都有大細之分。好似人壽、危疾明顯係大，動不動數6至7個數字。但一D比較細數(1萬幾千)，其實你唔會因為要支付，而嚴重影響你生活或者投資規模，我就覺得無太大買保險架必要。
38歲建議買保障型保險
至於你本人，我自己覺得過左35歲，就應該每人驗下身。因為病向淺中醫，盡早發現問題去盡快處理，從個人健康和醫療成本角度計，都係較理想。而保險，我建議你保障型保險(例如純人壽、醫療、危疾)點都要買，至於買多少，好睇個人需要。
更多理財方法及股票投資入門內容
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。
