職場上，獲老細委以重任才有機會升職加薪。近日有網民在連登討論區發文，抱怨自己的外貌不夠醒目，不獲上司信任。網民笑言：你似真係唔醒目。即睇詳情！
呻自己外貌不夠醒目 不獲上司信任
近日有名港男在連登討論區以「個樣睇落唔醒目喺職場真係好慘」為題，抱怨自己的外貌不夠醒目，不獲上司信任，並稱上司「開始睇你唔順眼，做乜都唔信你」，亦指自己「已經盡咗力」。
更甚的是，樓主表示自己跳過三次槽，一但升上高級職位就未試過過到試用期。被上司投訴工作上好多甩漏，「投訴我做野好多問題，又唔主動踢一踢先郁一郁」，但自己想主動幫忙時上司又不放心，續指「同事覺得做野冇問題」。
網民留言：你似真係唔醒目
帖文一出，即登上連登討論區的熱門，網民紛紛留言表示是樓主的工作能力問題，與樣貌無關：
「有冇諗過其實唔關樣事」
- 「唔醒目同踢一踢郁一郁係兩回事，前者係能力問題，後者係態度問題」
- 「居然怪個樣，你真係衰係邊都唔知」
- 「你講到去後邊已經唔關個樣事啦喎」
- 「未必關個樣事，你應該真係做事能力低」
- 「同個樣無咩關係，主要係本身個人唔醒目」
- 「見你嗰樣唔醒目就唔請你啦」
你嘅能力只係entry level
面對網民清一色指自己「唔關個樣事」的留言，樓主續指「做entry level都算好，每份過到probation」。但覺得沒有前途，於是跳槽「點知幾次一跳完做senior少少嘅job就出事，轉另一工種entry level先冇事」。網民更加堅定地表示，工作能力與外貌毫無關係：
「轉埋工種都做唔到阿頭，即係你嘅能力只係entry level，唔好賴樣啦」
- 「咁咪即係你真係唔醒目，剩係做到entry level嘅工囉」
- 「你嘅能力根本只夠做entry level嘅工」
- 「其實會唔會係你唔適合份工，都唔係你能力嘅嘢」
- 「你顧掂自己工作能力先諗個樣啦」
- 「關個樣乜事？似係能力問題多啲」
- 「你最大嘅問題就係以為自己有能力」
試用期都唔過 係能力問題
不少網民認為樓主轉過幾次工都有offer，證明唔關個樣事，連試用期都過唔到係能力問題：
「係咪掉轉咗？有Offer姐係唔關個樣事，因為Interview 時唔會知你真實能力，但Probation過唔到就絕對關能力事」
- 「過到interview 拎到offer 可能只係好彩，一到senior grade就露底了」
- 「你話interview無offer都算啦，唔止一次過唔到proba仲夠膽賴個樣」
- 「連proba都唔過，咁應該唔怪得個樣喎」
- 「好少人會唔過probation，不如諗下自己嘅能力先？」
同事唔係你上司
有網民則針對樓主同事對他的評價作出回應：
「老細之所以係你老細，因為佢睇野夠宏觀。你做唔做到？你寧願賴自己個樣都唔肯承認自己嘅能力。」
- 「盡左力唔代表做得好，你同事係你同事，唔係你上司」
- 「上司睇野角度點會同你同事一樣」
- 「同事係咪你阿頭？大家嘅角度都唔一樣」
- 「同事覺得無問題唔代表上司覺得無問題」
以為自己只係個樣唔醒目
當然亦有網民開玩笑咁串爆樓主：
「唔醒目到以為自己只係個樣唔醒目」
- 「如果真係醒目，又點會意識唔到成件事都唔係關個樣事」
- 「原來係真蠢，唔係扮蠢」
- 「唔知你咩樣，但睇你覆個post，已經feel到你有幾鈍」
更多關於網民熱話的內容
網民熱話｜同事拎完bonus即刻辭職被斥好難睇｜一個原因公認無問題
