網民熱話｜如果派到嘅公屋單位好唔方便，仲會唔會要呢？近日有名港媽在「公屋討論區」發文，倡議政府「以校區派位」。帖文一出即時引起討論。
港媽發文
派到公屋應該係件開心事，畢竟等咗咁多年終於輪到自己。但如果派到嘅單位好唔方便，仲會唔會要呢？近日有名港媽在Facebook「公屋討論區」發文，稱入群組多日，發現不少家庭都希望可以派到近小朋友返學的地區，倡議政府「以校區派位」。帖文一出，即時引起不少討論。網民更指：俾埋公屋你住都嫌三嫌四。
永遠派樓派到無雷公咁遠？
該名港媽發文稱「房署永遠派樓都會派到同小朋友返學地點相距天邊咁遠。站在家長立場，其實有無諗過小朋友升學，家長都嘔心瀝血搵學校，唔好話要求最好，但大多都係同區，有校車，唔會最差咁去選擇！」更指「既然學校要跟地區派位。咁點解派樓唔可以呢？」認為房署派樓沒有為學生家長考慮過。
倡議政府「以校區派位」
港媽續指「如果房署派樓審批時，將小朋友就讀學校地區列入埋派樓地區，會有更多家庭受惠！亦相信好多家庭，為咗子女可以原校升讀，都不介意派到舊區舊單位！」更倡議政府「如果可以以校區派位，房署亦可以睇小朋友係該區就讀咗幾耐而決定，避免咗揀區家庭出現！」文末亦寫明「個人想法，不喜勿插，只係正常討論下」。
網民留言：買樓囉！
帖文一出就吸引不少人留言，但大多都鬧港媽要求多多，稱「你咁多要求咪買樓囉」：
「俾樓你住仲要就你衣食住行，一家大細又要諗埋，不如你自己買就返自己一家」
- 「俾埋公屋你住都嫌三嫌四」
- 「你咁多要求咪買樓囉」
- 「你生仔之前點解唔買樓先呢？」
- 「要就小朋友返學咪買樓囉」
- 「自己買咪多選擇囉」
- 「多多要求？爭氣啲買中西區半山私樓，大把歴史悠久嘅名校揀」
- 「你排緊/租緊既係公屋，有錢咪去買私樓，邊區都得」
有公屋住已要感恩
有網民認為有公屋住已經要感恩：
「上到樓已經要感恩啦，仲提出要就返學，香港納稅人無欠你架，公屋係社會福利，唔係老奉，有要求之前睇下自己有無本事」
- 「公屋咁多人申請，個個都咁樣就仲洗玩？」
- 「公屋咋，遲啲真係邊區返工都要就埋」
- 「有得住已經好好了」
有不少人指出房署沒有足夠人手應付，資源亦不足：
「房署只係解決你房屋需求，並不是解決你教育需求，無責任考慮方唔方便你子女返學」
「歸根到底，資源唔夠啊」
- 「房署邊有咁多人手去做呢啲嘢，好難兩全其美」
- 「你冇錢就唔好發窮惡，政府唔係一定要迎合你所有需要」
- 「真係顧到小朋友，又話要顧埋返工，照顧長者，上得床嚟拈被冚，永遠有更好嘅選擇」
- 「正常都唔想轉校。大抽獎可以靠運氣入學校。轉校要靠實力。家長小朋友壓力會勁大。但世事邊有咁如意」
- 「唔好話小朋友返學，派埋你老人家方便你照顧都得。 問題宜家係有人搬先有位」
- 「應該可以嘅，不過排隊時間延長50%，咁你肯唔肯？」
- 「小朋友幾年轉一次校，等上樓隨時十年八年，點跟到咁多」
網民：香港人好難招呼
有不少人都留言諷刺港媽：
「真係陰功，有公主病但冇公主命」
「乜原來房署有同教育局有合作架咩」
「強烈建議樓主下屆參選做特首，或者公屋揀選機制最高領導人」
- 「呢個post真係好搞笑」
- 「冇錢乜都唔洗講」
- 「申請公屋時讀緊小一，排到派屋已升中學了。咁點算」
- 「冇得你想點就點，可以要可以唔要，得3次機會」
- 「最好係學校公司附近，有泳池會所俾你咁好未」
- 「香港人好難招呼」
做人係要取捨的
心水清的網民認為有得就有失，總要取捨：
- 「其實每個人都想心想事成，但可以嗎」
- 「人總喜歡得一想二，好難滿足到各個人的要求」
- 「做人係要取捨的」
- 「人生之中有好多取捨，取得一啲嘢，就會失咗一啲嘢，睇你自己權衡邊樣對你重要」
