【理財個案】40歲夫妻沒有小朋大，6年前已供完自住居屋，現市值約550萬，正考慮補地價後套現部分資金作投資，或是賣樓換私樓，有剩錢再投資賺被動收入？
理財個案｜40歲夫妻6年前供完自住居屋
成哥你好呀，想問你有關個人嘅投資建議。今年啱啱踏入40歲，同先生两個人住居屋冇小朋友，間居屋510呎係07年以120萬買入嘅，2017年果陣已經供完，依家市值約550萬。
居屋未補地價不能套現資金 亦不能出租
由於居屋有一定嘅限制，冇補地價不能套現部分錢出嚟做投資，亦不能租俾人賺取被動收入，自己住只係慳咗租金而做唔到其他嘢，而我哋最大嘅資產就集中係層樓度，啲錢扎死晒覺得好唔抵。
賣樓換私樓做首期 再用餘款投資？
依家諗緊要唔要賣咗層樓換私樓，用二三百萬做首期，剩餘嘅錢用嚟分散投資賺取被動收入，跟住用被動收入嘅錢去供層樓。咁樣就不會影響到日常生活亦有錢儲，但問題係換私樓會住細咗，如果想換大啲可能要800幾萬，咁就變咗負債比率過高可能會供得吃力，依家心大心細賣唔賣樓好。
補地價再套現做投資？
仲有另一個方案就係儲多幾年錢，補咗地價佢，咁層樓就upgrade變咗比較靈活套現嘅資產，補完地價再套現做投資賺取被動收入。咁樣亦不用支付換樓成本和各樣稅項，慳咗幾十萬，但係我哋两個加埋月入先四萬幾，儲到補地價嘅錢可能要幾年。
樓價跌 比前兩年平幾十萬
依家心大心細唔知賣唔賣樓好，想聽下你意見。仲有就係依家樓價跌咗，比前兩年要平幾十萬，但都係有賺幾倍，如果依家換樓買出面私樓都平過以前，又值唔值得換呢？
理財個案｜龔成老師分析︰一買一賣唔見好多錢
其實，自住物業除非你覺得，佢已經唔再適合你未來10-20年生活，或者質素下滑得好快。否則，我唔建議你做咁多操作，去釋放當中價值。因為香港物業買賣成本唔細，你一買一賣，其實會唔見好多錢，未必係一個好方法。
香港整個樓市已大不同
而且，香港整個樓市已經唔同咗，你唔好預好似以往咁，樓價會不停咁升。我預期香港未來樓市，雖然唔會大跌，只會係平穏咁發展。自住物業，緊記最重要係”適合長線生活”和”有信心長期供得起”。唔好當左佢係投資項目咁去處理，咁係好危險。
建議每月儲蓄月供股票
未來時間，我建議你用每月儲蓄，去月供或分注買優質股，去慢慢重新累積個財富，咁可能會更好。策略上，你可以投資「平穏增長股」和「潛力股」。你每月5成儲蓄做月供，其餘先儲起，用一邊月供一邊儲蓄的策略。
潛力股風險較高 最多維持2-3成
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。餘下的另一半現金，我地就等機會，當大市出現較大回調，就加大力度掃貨，然後作長線投資。
更多股票投資入門及理財個案內容
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。