【理財個案】24歲讀者，無讀大學已工作6年！現時已有60萬定期存款、10萬現金，仲有10萬投資股票，準備9月再讀大學（已取錄）學費4年共24萬，但有疑慮...

理財個案｜24歲無讀大學已工作6年

龔成老師好，有事想求助一下，case比較長，非常感謝你的耐心，望指教

本人男，24歲，18歲後無讀大學出來做左6年野，現經濟狀況如下：

  • 60萬存定期（年利率4%）
  • 10萬炒股（蝕左2萬）
  • 10萬現金

現困境如下：

  • 準備9月讀返大學（已錄取），學費一年大概6萬，將要讀4年。（4年=24萬）
  • 另外父母均失業多年，早前儲蓄就快用完，但同時妹妹18歲又要入大學，所以父母希望我可以供埋妹妹（學費一年5萬，要讀4年=20萬）
  • 我每年開支大約5萬（4年=20萬）
  • 每年比家用3萬 （4年=12萬）

80萬資金應供得起讀書 但4年後會清袋

以目前情況來講，80萬資金係可以供得起自己同妹妹讀書，可應付到自己生活。但4年後就會一鋪清袋（20+20+24+12=76萬）。請問我該如何投資做才保持到4年後有大概40-50萬資金？（早前投資美股都蝕，大失信心）

理財個案｜龔成老師分析︰先糾正錯誤投資觀念

首先，我想先糾正你一個錯誤的投資觀念，我地投資一定係長線，你見全世界最成功的投資人巴菲特，都只會做長線投資，唔會短炒。因為中短期股價，可以因為好多因素影響，有些因素甚至跟企業無關，所以無得計。

長線持有優質股 自然會有理想回報

但長線企業價值，必然會反映在股價上，只要長線持有優質股，就自然會有理想回報。所以，唔會好似坊間散戶咁，只係炒炒賣賣。反而係投資前，我地要做較多準備功夫，去分析一間企業質素和平貴度，以制定入市策略。當買入後，只要佢長線質素無明顯轉壞，我哋長線持有，讓其自然增值就可以。

不少生活上開支 建議多留現金

至於你本人情況，由於不少生活上開支需要處理，我建議多留現金。例如你和妹妹學費、家庭未來一段時間架開支(你可以估算家人何時找到工作、你全職返學時生活開銷等，去定個安全架金額)，都最好先用現金持有，減少不確定性風險。

理財永遠都係生活行先

雖然如果根據你估算，4年後會資金會用盡，但都無辦法，因為理財永遠都係生活行先，再有餘力才做增值。如果你想做些投資，去抵銷部份支出，係可以。但一定唔可以係太進取架項目，因為萬一失利，會令你和家人未來整個生活計劃受到影響。

可繼續做定期 維持適度增長

由於你和妹妹大學是要上4年，後2年的學費，你可以考慮用收息股，或者再保守啲或者自問投資知識好一般的話，可以做定期，去維持適度增長。但如果買潛力型股票，由於不確定性太大，我就唔建議。

投資收息股組合

目標是5%、6%的股息率的收息股，例如港燈（2638.HK）、深高速（0548.HK）、香港電訊（6823.HK）、工行（1398.HK）、恒生（0011.HK）、置富（0778.HK）、陽光（0435.HK）或收息基金（3110.HK）都可以。

建議做兼職去開源

另外，如果情況許可，建議你和妹妹都做一些兼職去開源，令自己資金消耗速度減慢，畢竟這些是你未來用來財富增值的本錢。最好，就開節流，透過每日記帳架方法，將生活上不必要的開支全部刪除，盡量減少自己不要負擔。

以上做法，並不可能做到「保持到4年後有大概40-50萬資金」，不過會係最平衡和穏當地處理你未來4年生活財政的方式。

更多股票投資入門及理財個案內容

【按此免費訂閱《香港財經時報》HKBT 新聞快訊】

作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。

免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。