【理財個案】24歲讀者平日沒有太多洗費,儘量「慳得1蚊就1蚊」,希望可以在28歲時賺到第一桶金,而長遠目標是達到財務自由,應該如何投資好?
理財個案(1)讀者來信:想4年賺100萬有無計?
呀sir你好,我想同你分享下我宜家的情況,我今年24歲,之前上過您的堂學左投資要賺錢一定係長線投資。咁之前我都一手手買左啲股票:
股票代號 | 持貨量 | 買入價(元) |
9988 | 2手 | 190 |
2638 | 1手 | 7.83 |
1928 | 2手 | 24.8 |
1810 | 2手 | 21.59 |
1448 | 1手 | 7.45 |
1177 | 2手 | 6.6 |
285 | 1手 | 36.725 |
270 | 1手 | 11.12 |
美股VOO | 15股 | 388美元 |
24歲月入15K
而呢啲我都會長擺係度,做長線投資,甚至會將港股收番黎的股息再投資;而VOO一定係永遠月供,不斷將股息再投資。
我24歲,大學畢業後兩年全職做保險,跟住宜家就番緊份正職,再兼職保險,月入大概$15000。持有現金$20萬,保險每月供$3000,仲有一份lump Sum儲蓄保險有$20萬。
慳得1蚊就1蚊學投資
我本人無乜駛費,帶飯番工,交通費都用月票,慳得一蚊就一蚊,所以每月可以儲$10000,其他就家用、交通費同間唔中同朋友聯誼娛樂。我最近諗緊再開多個證券戶口月供股票,本身我用富途擺上面的股票,宜家想開致富證券,呀Sir您覺得致富證券點?
月供哪些股票好?
同埋我計劃緊供:
0388 | 港交所 | $2,000 |
0002 | 中電 | $2,000 |
呀Sir可唔可以比多啲建議我,月供邊啲股票會好啲?同樣我希望學您咁樣28歲要有$100萬同長遠財務自由。打得有啲長,唔好意思呀Sir,唔該曬。
理財個案(1)龔成老師分析:
你有正確的理財觀念,知道投資不是炒賣,而是需要一個長線有效的累積財富過程。
你24歲,應以增值為主,建議你用「平穏增長股」 + 「潛力股」作組合,去創造一個增值平台。
你現時持有的組合中,都是有長線投資價值的優質股。但當中不少是潛力股,我不太建議持有太多潛力股(特別係你這類投資知識不多的初學者),因為潛力股波動大,同時不確定性高,超過5成的話,會為組合帶來過高的風險。
長遠可加入「平穏增長股」平衡整體組合
因此,長遠你可以加入更多「平穏增長股」來平衡整體組合。月供股票是有效累積財富的方法,但如果你開太多戶口的話,會難於管理,可以集中一個戶口投資。
富途都有月供股票的服務,我自己無用過,好難比到意見你。你可以睇翻佢便利性和收費率去決定。
一邊月供一邊儲蓄的策略
至於月供方面,你每月先用5成儲蓄,即$5000做月供。其餘先儲起,用一邊月供一邊儲蓄的策略。你現時月供港交所(0388.HK)係可以,但中電(0002.HK)主要係收息,增長力欠奉,不太適合你年紀。
但由於潛力股有一定波動性,而你本身的潛力股持股都偏多,暫時不建議供太多,暫時預佔供款預算3成好了。到你累積到較多經驗,才慢慢將比重提升至5成。至於餘下的現金,就等機會,當大市出現一定程度的下跌,就可以動用現金去投資,在平宜價加大力度掃貨,然後長線投資。
「保險」主要係用來防守
最後,你現時有不少資金在保險。其實「保險」主要係用來防守,買足夠保障就可以。儲蓄成份架保險,唔係唔可以買。如果你個人風險承受能力好低,或者完全無投資能力,這類保險都有持有價值。
但始終係財富增值角度,佢幫助好有限,一般我都就唔建議太多。做財富增值,應集中投資在優質資產(如優質股、物業等),效果才會理想。
理財個案(2)讀者來信:對於氫能源有什麼睇法?
你對於Hydrogen power 的前景有咩睇法?謝謝。
理財個案(2)龔成老師分析:氫能源發展仍要一段時間
近年碳中和、減排成為全球熱門話題。當中氫能源,是其中一個較多人討論的能源範疇。由水變氫的電解過程中,由於需要消耗大量電力及能量,故必需有充裕的可再生能源配合(如太陽能、風力、水力),「氫」才稱得上真正綠色能源。
但本身可再生能源,全球發展都未算完全成熟和普及,故已造成一個困難。
氫氣儲存跟以往電力不同
其次,氫氣儲存跟以往電力不同。要重新建構相關設備,都要時間和成本。
就使用安全性而言,過去就有不少氫燃料發生的意外,2019年南韓的一個氫燃料儲存罐發生爆炸,造成2死6傷。同年,美國和挪威都分別有儲氫罐和加氫站爆炸,造成人命傷亡。所以,安全性問題都成為發展阻力。
氫能暫時不算是主流
雖然有不少不利因素,但我依然相信,氫能有機會成為未來綠色能源的其中一員。特別係一些本身能源自給自足率較低國家,如日本,會較大機會全面發展氫能源技術(現時都看到日本朝這個方向),以減少對海外能源的依賴。
不過,氫能暫時不算是主流,發展潛力是有,但要走到全面普及,相信還需要時間,而且當中依然有不確定性。
理財個案(3)讀者來信:加注拉低騰訊個平均價好唔好?
成哥,隻騰訊跌翻,我想加注拉低個平均價,現價可以?其實咁係咪溝貨,我又記得你話溝貨唔好,其實應該點做?
理財個案(3)龔成老師分析:組合比例與配置才最重要
騰訊(0700.HK)現價合理,如果你本身持貨不多,資金足,現價加少少可以。我地決定加注與否,要睇幾個因素,記住,並不是「拉低平均買入價」為目的。
- 第一,要分析這股的質素,如果無質素,就再跌都唔加。
- 第二,這股的類別,如潛力或增長或收息類等,是否與你的財富組合匹配,比例是否適合。
- 第三,你要先計算加注後,這股佔你股票組合的比例會否太多,因為同一行業,同一股票。不能佔股票組合的比例太多。
- 第四,現價是否有投資價值率,要平,或起碼合理,不能貴。
- 第五,你要在加注後,仍有現金剩。
記住,重點不是「拉低平均價」,而是組合比例與配置。
理財個案(4)讀者來信:浪費生命的特徵中左好多個有無得救?
老師,之前見你講浪費生命的特徵,我中左好多個,我係咪無得救?
理財個案(4)龔成老師分析:先找目標開始為長遠規劃
其實短期有這情況,可以接受,但最重要是長遠,你要想想5年後、10年後,你想過怎樣的生活,你現時已經可以開始為長遠規劃。建議你開始定一些切合自己的目標,思考自己的長遠發展方向,以及怎樣能更有效運用時間,要放自己在一個適合發展的環境。
理財個案(5)讀者來信:你點睇賺息蝕股價?
龔sir,其實你點睇賺息蝕股價?
理財個案(5)龔成老師分析:要留意企業本質有無下跌
要睇該企業本質有無下跌,如果業務明顯轉差,投資價值就會大減;相反,如果只是中短期市況不利令股價跌,就不用太擔心。當然,也有一些情況,是該股無問題,只是投資者在高位買入,投資者就要改進自己的投資技巧。
更多理財個案、投資入門相關內容
作者簡介:龔成(龔成Facebook專頁)是財經書作者,至今出版超過10本財經書,包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等,過往曾以萬元月薪滾出數百萬,現為股票班導師,身家過千萬元。
免責聲明:本網頁刊載的所有投資技巧及分析,僅供參考用途。讀者作出任何投資決定前,要自行判斷及審慎處理,更要自行掌握市場最新變化。若不幸招致任何損失,概與本網頁及相關作者與受訪者無關,本網頁概不負責 。而本網頁所有專欄作者的觀點,不代表本媒體立場。