理財個案｜驚加息影響美股變震盪市！騰訊阿里估值低、點部署？

【理財個案】讀者擔心美聯儲加息，令美股科技股有機會重新估值，影響美股變震盪市！騰訊阿里估值低，擔心拖港股，求投資部署方法？

理財個案｜讀者來信：驚加息影響美股變震盪市

老師午安好，美聯儲加息就快到，美股科技股有機會重新估值，美股好大機會震盪市。不過騰訊、阿里巴巴估值已經咁低，會否拖港股再落一浸？

有咩睇法？會否要儲多d現金？聽人哋咁講有咩策略？
龔老師早晨，唔好意思我聽唔到，呢影片可否講下重點話我知，謝謝。
晚上好，羡慕舊生都可取你寫一篇分析文（美股），請問我可取？我之前買了你5本書，還算嗎？

我很想上你堂前，之前你話實體班暫時較難做到（我佩戴助聽器只能改善部分聽力，但不會完全變好）請問我揾手語翻譯員陪我上你堂，可以？因手語支援和點字服務一樣，能解決學習的困難。

龔成老師分析︰騰訊和阿里主要受政策風險影響

1) 其實好難估，因為市場唔係單純受一個因素影響。而現時騰訊（0700.HK）和阿里（9988.HK）主要係受政策風險影響，令佢賺錢能力和優勢弱左。但簡單咁講，美國加息，會令到普遍的估值，都會向下調整。但多與少，會唔會有其他因素，例如經濟大環境轉好，令到拉上補下，估值反而係升左，就要個別再考慮。

而我哋投資，永遠都係用翻平貴度和質素，去做決定。現時大市在合理水平，你可以保留3-5成現金，去等待入市機會。

新經濟股投資時要做好估值

2) 這個短片內容，主要係想同讀者分享，現時新舊經濟股，係過去10數年轉變。過往新經濟股（例如科網股），泡沫性較高。但近年人們生活習慣，經濟活動好多都轉移至網上，令新經濟股係開始有佢實質投資價值。不過近年好多都被熱炒，投資時要做好估值，避免買貴貨。同時間，舊經濟股唔係無晒價值。我地成個組合要平衡，新舊經濟股都要有一定比重，唔好話偏廢左某一邊。

不停加注單一板塊風險大

同埋，有些投資者，經常有個錯覺。某某股或板塊，在過去幾年都升，就假定佢未來都係一樣升，咁係好危險，因為大環境在轉變，有機會令佢優質度不如從前。一些過往經常維持高位的股票，現時可能係好優質，但當市場一有改變，估值重新調整，係可能會回好多。我特別擔心一些未經歷過股災的投資者，過往可能投資某某板塊一直升，不停加注。到萬一大市真係回調，會好傷。

所以，讀者一定要記住，無永遠升架股市或股票，所有嘢都係一個循環。任何優質股都會有修正的風險，故不要過份進取或樂觀，必需要做好理性分析。

擔心大家誤用美股潛力股資料

3) 至於美股潛力股資料，因為擔心大家誤用，所以一定要上過堂先知（要掌握咗上堂所學的知識）。同埋，始終舊生付費上堂，因此我會久不久比較多的資料佢哋，由於佢哋付費，因此都想對佢地公平啲。所以，只會給予上過堂的學生。

至於揾手語翻譯員陪你上堂，過往未有這情況，方向是可以的，但擔心翻譯員的動作，會影響了其他同學，因此，可能要安排一些較偏側的座位。

【按此免費訂閱《香港財經時報》HKBT 新聞快訊】

作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。

免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責。而本網頁所有專欄作者的觀點，不代表本媒體立場。