理財個案】30歲單身讀者月入近2萬,扣除1/4家用,1/4生活費,1/4雜項,剩下約5千可每月投資。希望45歲前儲到250萬作移民,並能靠被動收入維持生活。

理財個案|家人承傳兩物業!不賣樓就能每月有3萬被動收入的兩個方法|龔成教室

理財個案01|讀者來信:單身月入2萬、每月有5千投資 

龔sir你好,機緣巧合下係fb見到你嘅分享,獲益良多~啱啱都買左你兩本著作(股票勝經和50優質潛力股,閱讀中)了解到時間是令財富增值的不二法門,想就住自己的情況問下意見。我今年30歲,單身,月入將近2萬。扣除1/4家用,1/4生活花費,1/4雜項(先儲埋支付包括保險,或者家裡要換的家電或電子產品等等比較大的支出),剩下大概5000能用作每月投資。

45歲前想儲到250萬移民

個人的目標是希望45歲前能儲到250萬用作移民,並且之後能靠被動收入維持生活。現時只有投資美股(半年前開始,因為可以一股股買,資金少易入手),投資26,000港幣左右。暫時睇有6%升幅(買得比較雜,有2/3都係大公司)你認為需要轉返d錢返嚟嘛?定係繼續放?咁之後仲入唔入錢過去?

有5萬現金考慮月供股票

港股方面,有1手中生(01177.HK),7.92買入打算長揸。另外有5萬左右現金,係咪應該拎一半來投資?定揸住等個市跌返少少先?另外睇到龔sir的分享,想開始月供股票的計劃。打算每月供2,500蚊盈富(02800.HK),1,500蚊比亞迪(01211.HK),1,000蚊阿里(09988.HK),依個配搭可以嗎?(假設唔再投資落美股果邊)雖然長期供股票可以平均成本,但係見到近日阿里同比亞迪都創新高...宜家開始供可以嘛?

本人係投資新手,都係今年先開始慢慢學習,問題比較多,唔該曬龔sir~

龔成老師分析︰中生有質素可長線 

當我哋選擇投資項目時,應參照自己人生階段。年輕時,可以用「平穏增長股+潛力股」,到中年「潛力股」比重要減少,到近退休應集中在「收息股」上。中生(01177.HK)有質素和適合你,長線持有就可以。而美股方面,你可以睇翻你現有股票,是否有增長力、企業是否優質、行業前途如何、財務狀況等,去決定是否值得持有。

選股重點是「企業質素」

但我想你清晰返兩點,首先,唔好因為「入場費平」,就去投資一隻股票。我哋選股重點是「企業質素」,一隻$50,000入場費架優質股,長線可以繼續升。一隻入場費只要$500架劣質股,最終係可以跌到1蚊都無。另外,大公司唔代表一定有投資價值,佢都可以係連年虧損。所以,投資前要了解清楚,唔好見係有名或者大公司,就盲目去投資。

現時比亞迪(01211.HK)偏貴

以你年紀,投資策略可以比較進取。你現時月供選股可以,但由於現時比亞迪(01211.HK)偏貴,現時可以先用其他潛力股代替。潛力股︰安碩恒生科技(03067.HK)、騰訊(00700.HK)、港交所(00388.HK)、舜宇光學(02382.HK)、小米(01810.HK)、中生製藥(01177.HK)、福壽園(01448.HK)。

學習方面,除左睇我架書,你可以多睇財經新聞、企業年報和上些相關課程。

按此訂閱《香港財經時報》HKBT 新聞快訊

理財個案02|讀者來信:問強積金MPF策略

老師,以往MPF均選增長力高(高風險)基金,已經升了30%,現年44歲,是否應該先將部分/全部基金轉移到保本或低風險基金?

龔成老師分析:年輕時進取、中年平衡、年長保守 

積金會以「年齡及個人的風險度」等因素,作為整個配置的大方向,年輕時進取,中年平衡,年長保守,這是大方向。至於市況,可以作為小調節。

如果你過住100%集中在進取,現時你44歲,加上大市升左,你可以部分轉到較平衡的基金,但就不需要全部轉。由於44歲仍有增長力,因此不用轉到保守,只要部分轉為平穩型類別就得記住,強積金不會轉來轉去,而是長期的調整。

理財個案03|讀者來信:用月供形式讓資本增值 

Hi,本人30歲 想5年內置業,希望用月供形式讓資本增值 想問一下若是月供股票或ETF,遇到金融風暴,股市急跌,需要停供嗎?

另外,還有什麼因素需要停供(ETF / 股票) 。

龔成老師分析:遇到金融風暴反而加大月供股票力度

月供股票一般要長年期先有效果,5年算是一個勉強可行的年期。 如果遇到金融風暴,反而會加大月供股票的力度,如果你睇翻過往的歷史,所有股市大跌、金融危機,都是股市處「便宜」的時候,你只要長線投資,這時候月供得來的股票,長遠的回報是最高的!

當然,你當時月供,有可能見到股價不斷下跌,但只要你長期,就無問題。 因此,如果你目標是5年置業,就要到差不多置業的一年,開始賣股票,因為無人知中短期市況,不要等到時先賣。 

理財個案04|讀者來信:想做到「股樓並行」 

龔sir,如果想做到「股樓並行」,我本身自住的物業就快供滿,如果供完,咁樣係咪我自住的物業已經算係有物業,而餘下的資金就放到收息股身上?定還是要另外有用作放租,作被動收入的,先算開始有物業部份,然後先再投資收息股?謝謝龔sir!

龔成老師分析:小心太集中物業類別 

如果要正式界定,要你收租,有正現金流先算「資產」,不過,物業始終是你財富的一部分,都有長期增值的效果。你可以在分配上,將資金投資股票,達至「股票並行」的作用。如果再買物業收租,就會令你太集中在物業類別。 

作者簡介:龔成(龔成Facebook專頁)是財經書作者,至今出版超過10本財經書,包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等,過往曾以萬元月薪滾出數百萬,現為股票班導師,身家過千萬元。

免責聲明:本網頁刊載的所有投資技巧及分析,僅供參考用途。讀者作出任何投資決定前,要自行判斷及審慎處理,更要自行掌握市場最新變化。若不幸招致任何損失,概與本網頁及相關作者與受訪者無關,本網頁概不負責 。而本網頁所有專欄作者的觀點,不代表本媒體立場。