夫婦讀者疫情下每個月都要放no pay leave,因看不到前景,故趁放冇薪假時用幾萬本開網店,一個月淨賺7K、目標唔使再打工。

理財個案|未買過股票、擔心香港經濟政治不穩!想先用爸爸退休金投資|龔成教室

理財個案|讀者來信:疫情下趁放冇薪假開網店幫補 

你好龔成老師:我同老公由社運、疫情至今我哋每個月都放下no pay leave,清大假咁,話共度時艱,講係咁講,但工返少咗,野就做多咗,因為人人自危。驚唔知幾時俾老細開刀,個個都話要爭取表現,要做好多無謂既野,亦有好多無理既要求,辦公室政治等等,真心覺得打工除了為一份打折的糧,每日都好似行屍走肉,亦睇唔到有出路。如果我60歲退休,淨返呢20年,我唔想咁樣生活。

7月埋數淨賺7,000元

我記得你成日講唔好為其他人而忙,要為自己為夢。因為個個月反正都放no pay leave,多咗時間,所以今年5月中我同老公好衝動咁用咗幾萬開咗盤生意網上售賣。在一個死場用每月幾千蚊租了好細嘅地方放產品,呢2個月開始逐步都有d生意,每逢放假放no payleave,就做鋪頭工作,收貨送貨搵sourcing...

雖然忙同攰,但好有滿足感,好開心,剛7月埋數,都有7000蚊net profit。但問題嚟啦,其實呢7000蚊或者每逢收到錢返黎之後,都要繼續入貨,或者再買新既產品返黎先吸到客。

網購生意競爭大

網購生意競爭好大,要靠賣廣告先有生意,廣告停,生意就停,但對我哋嚟講,呢個支出好大。暫時都做唔到收支平衡,實際都係無錢入袋。而家開始會有客俾意見我哋,例如唔夠多貨品種類,因為真係唔多,得20幾款。有啲客又好有心,佢會話俾我知佢想要咩貨,叫我可以考慮吓。我好想做好去,但我諗唔到可以點繼續維持落去?

自問mark up個價錢都唔係特別高,但都唔平,同行家比較,我價格定位屬中位,但因地方細入唔到多貨,量少自然拎唔到靚價,好難同大品牌既鋪頭競爭,我都係sale service, 部分客路都算高檔。我記得你講過一間公司開始都會係無錢入股東袋,錢係會拎去繼續發展公司,到咗生意上軌道之後,先會慢慢有錢賺,我繼續做呢舊錢會變大嗎?

11月無錢賺考慮停止經營

(係咪好阿Q精神)一路做一路懷疑自己有冇咁嘅實力,從中係學到嘢,但我驚自己成長太慢,跟唔上市場改變。因為商場租約只簽咗半年,老公就話11月睇下個情況,如果都係無錢賺就唔玩摺埋。或者想改變少少方向,賣多些較貴價,同埋真正建立一個網上平台(而家只有facebook渠道)希望對生意有幫助。

短期目標係想可以靠生意維持收入,真正有net profit $20,000至$30,000, 唔洗再靠打工賺錢。最終目標甚至可以養起埋老公。好大貪嗎?今次寫來唔關股票事,純分享自己事,如果11月都無錢賺,係咪應該真係摺埋?

打工賺錢為生活 

其實你真係我人生導師,我數口差,無咩賺錢concept,淨係知做人就係要打工賺錢為生活,我同老公兩人都無點累積財富,由上年下半年起至2020年嘅疫情關係真係搵少咗錢(大概少咗1/3)但我哋都逼住多有多儲,少有少儲。唔敢放棄。

呢幾年開始睇你專欄,再睇書,再上堂,由唔識投資,到開始買股票,儲股票,慢慢累積財富,之前股市大升,我哋無賣出過任何股票。因為我哋唔特別需要現金,所以繼續長期持有,希望一路滾大,但計算數字上所賺到嘅錢,再加上本身嘅資產,我哋兩人終於都達到100萬,雖然唔多,同埋只係數字上,但都覺得開心。

而家個心情好複雜,今年環境令人覺得好難捱,亦無諗過自己會做生意,所以想同老師分享下,有冇意見提供下或者R下鼓勵既說話。希望可以另令我有動力繼續走落去。加油。

龔成老師分析:建立重要的資產「品牌與客戶」 

你哋已經成功左一半,做生意,並不是個個人錢賺,你現時已能做到基本的盈利,同時能維持到生意,這已經是成功了!做生意要投入時間,要守,這是好正常,你哋可以於幾個月內做到這成績,已經不錯,我相信已行在成功的路。

你哋可能現時賺錢唔多,但正建立一個重要的資產「品牌與客戶」,只要你這方面做得好,能做好「客戶會再買」「客戶會介紹其他人買」,你將來就有發展。相反,如果你要不斷賣廣告去找新客,而舊客無再找你,你就好難長做。

順市場需求 順勢而行

你要聽不同客戶的意見(不要只聽一個),而是聽多個,了解市場,我自己做生意都是如此,最初都無法得知真正的市場,但「客戶會自然地話我知」,我只要順市場的需求,順勢而行就得。

另外,當發展落去,你就要有自己的獨特性,你一定要答到這些問題,點解客戶會買你的產品與唔買另一家的產品?點樣可以令顧客再買?點樣可以令人容易記得你?加油呀!

按此訂閱《香港財經時報》HKBT 新聞快訊

編按:專欄作者龔成是財經書作者,至今出版超過10本財經書,包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等,過往曾以萬元月薪滾出數百萬,現為股票班導師,身家過千萬元。

免責聲明:本網頁刊載的所有投資技巧及分析,僅供參考用途。讀者作出任何投資決定前,要自行判斷及審慎處理,更要自行掌握市場最新變化。若不幸招致任何損失,概與本網頁及相關作者與受訪者無關,本網頁概不負責 。而本網頁所有專欄作者的觀點,不代表本媒體立場。

作者簡介:龔成(龔成Facebook專頁)是財經書作者,至今出版超過10本財經書,包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等,過往曾以萬元月薪滾出數百萬,現為股票班導師,身家過千萬元。