【理財個案】讀者：龔成老師，你好。我有問題請教一下，首先，先多謝你。我和先生4x歲，家有16歲及12歲子女 。 我和先生月入共約16萬。 要供養父母。冇養車冇養寵物。自己供了一分年金及小小保險。

要供樓 養子女養父母

五年前樓價高時買咗樓，現供樓自住物業，月供$25000 ，還有五百萬樓按要還，分25年手上有大約現金一百萬 ，只懂放在mortgage link 戶口。另有些現值約五十萬股票（2800 ，阿里巴巴，小米，中國移動 ，比亞迪電子，騰訊） 近來跌咗不少，好恐，日日看住你的鼓勵行下去。

先生身體出現毛病 擔心我倆退休後生活

近排先生身體出現毛病，令我依家好擔心我倆退休後生活。甚至乎有些焦慮，覺得自己而家一定要做返啲嘢，但係又唔知點入手。現在有些想賣走現在大單位樓，減輕將來的負擔。但賣咗又買番，又好似好無謂。稅呀、律師費、佣金等都係一筆大數。同埋股票跌得咁勁，令我有啲擔心。我還可以從什麼方向增值自己嘅財富呢？

請老師指點下迷津，謝謝。

龔成老師分析︰

我分開幾個部份答你，但緊記重點，一切思考集中係「長線」。我明白你架擔憂，但我地都要客觀去分析做判斷，唔好因為一些因素，而做出不必要、甚至係錯誤架決定。

股票

1) 以你4X歲，應以增值為主，你持有架股票，係適合。首先你要明白一個概念，我地持有一隻股票與否，關鍵位是企業質素、前景，不要被買入價影響。因為買入價已經係一個沉沒成本，你唔可當佢係一個神聖價位，因為已經無參考價值。未來持有與否，係應該睇翻企業本身。

如果企業質素轉差，就要賣出。如果企業某些核心優勢減少左，就有機會減持，因此，我地要分析企業的核心因素，一些長期的賺錢能力，有無改變。

用「平穏增長股」和「潛力股」作為增值核心

2) 你大方向，可以用「平穏增長股」和「潛力股」，作為增值核心。若果想保守D，可以集中係「平穏增長股」。

平穏增長股︰

選股上，你可以留意一些平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：

美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以自己了解下，再決定是否從中選股。

潛力股︰

如果想增長力高少少，可考慮潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）。另外再加：美股如微軟（MSFT）、英偉達（NVDA）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。

手上100萬現金 用20-30萬買入優質股

3) 儲貨方法，你可以用手上100萬現金，投資20-30萬，買入上述優質股。餘下資金，等大回調機會。另外，可以用埋每月5成儲蓄做月供。其餘一半儲蓄先儲起，同樣等大回調機會。但你記住，優質股增值為長線計劃，以年計，唔會幫到你短期財務需要。

物業

你要思考長線生活狀況，主要睇長線有無信心供到，同埋是否適合未來最少10-20年生活。如果過到2關，就保留。如果唔得，先再考慮點樣做。

其他資產

年金，較適合退休人士，增長力不高，(除了供緊架計劃)不要再加注。我唔肯定你手上係什麼保險，如果係︰

  • 儲蓄保，增長力弱，除非你好保守，否則不適選擇。(現有計劃，如果已供一定年期，就供埋佢。)
  • 保障型保險(如純人壽、危疾、醫保)如果無，建議盡快安排。

投資前 要預留半年至一年生活費

緊記投資前，要預留半年至一年生活費，作為應金資金，這才算穏當。如果有潛力醫療開支，你都要額外保留資金。最好用高流動性，同時貶值機會低架方法，如現金和定期。記住，永遠都係生活行先，投資為次。你可以先計下，退休大約每月用多少錢，再去規劃現時投資決策。

每月有2萬蚊現金流 以股息率6%計 需要本金400萬

若你希望退休後，每月有2萬蚊現金流，以股息率6%計，你需要本金400萬。因此，我地要以這400萬作為目標，透過一些有增長力的股票，去累積這筆資金。到你退休時，再將這些有增長力股票，換成為收息資產(如收息股、年金、債券等)，去創造你需要的2萬蚊現金流。

緊記要提升自己投資知識

最後，緊記要提升自己投資知識。因為長線投資回報，係必然同你架知識水平成正比。我建議你要多讀投資相關書本、年報，新聞和報讀相關課程。書本上，你可以睇我寫架《圖解股票小百科》、《圖解美股小百科》、《80後千萬富翁》和《財務自由行》，都適合初學者。

作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。

免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。