【樓市走勢】讀者來信：Anthony Sir你好，最近留意到二手成交同埋一手成交數據都跌咗，但樓價反而升緊，究竟發生咗咩事？到底對買家有咩啟示？
回覆讀者來信：成交少了 但價錢仍在升
是的，最近成交少了，但價錢仍在升，耐人尋味吧？！表面睇，最近二手成交宗數按月有輕微回落，一手亦有波動，但樓價指數卻穩步向上，部分指標屋苑呎價更創近期新高。這個量跌價升的現象，唔係樓市發神經，而是市場供需的搏弈！
首季整體住宅成交量按年大增逾40-50%
首先，講講最新數據（截至2026年6月中）。根據土地註冊處同中原、美聯等代理行數據，2026年首季整體住宅成交量按年大增逾40-50%，一手私人住宅登記約5,500宗，二手更見強勁，部分月份二手成交突破4,000-5,000宗，創近年高位。踏入第二季，特別近期，成交宗數出現階段性調整，例如4-5月二手私人住宅成交有按月回落跡象，一手亦有波動，總成交額同宗數未及首季高峰。
樓價首季升幅已超5%
但樓價呢？中原城市領先指數持續向上，首季升幅已超5%，4月二手樓價按月再升，部分地區呎價回升至近年高位。豪宅同中價盤都有買家追捧，「價量齊升」轉為「量調整、價堅挺」的局面。呢個現象，正正係今次專欄要講的「成交下跌的啟示」！
原因一：世界盃魔咒，又殺到？
2026年美加墨世界盃6月12日開鑼，全城熱血沸騰，但金融同樓市就未必咁開心。歷史上「世界盃魔咒」並非空穴來風——賽事期間投資者注意力分散，部分資金轉投博彩，成交量容易回落。香港時間多場賽事係清晨或深夜，炒樓客同投資者可能睇波睇到瞓唔着，第二朝無心議價，自然成交減少。
原因二：二手業主反價潮，賣家心態轉硬
成交少，但價升，最核心係業主「反價」！租務市場火熱，業主持貨成本低（甚至供樓平過租），加上樓價已從低位反彈10%左右，個個都覺得「而家賣蝕咗」。有網友最近去睇樓，一個西九龍的放盤，原本叫價合理，買家還價5%，業主即刻反價：「租到 $35,000喎，仲減？賣平咗點算？」結果成交拉鋸，宗數減少。
呢個現象好普遍，尤其中小型單位同新界盤。有朋友幾年前買入一個NOVOLAND的一房單位，早兩年環境差成交價曾經跌到3百頭，最近竟然成交了一宗460萬！相差百多萬！加上內地買家同本地換樓客回流，賣家底氣足。試想像：一個負資產已轉正的小業主，見到租金指數創新高，點會輕易劈價？
原因三：搶租潮猛烈，冇樓睇、冇樓買
租務市場係今次樓市最大推手！學生季殺到，2026年租金指數已接近或突破歷史高位，細單位呎租直逼百元，九龍同大學周邊尤其誇張。學生同專才「搶租」，好多盤一放出即被預租，買家想睇樓都冇得睇！筆者有位客戶最近買了幾個港島西的細單位收租，剛簽了正式買賣合約，還有兩個月才成交，已經有學生問預租了！如果租金回報高，供又平過租，何來急賣的理由？
反映市場不再是炒家追逐
今次「量跌價升」，正正反映買家質素提升，反映市場不再是炒家追逐，而是用家同長線投資者入場。內地買家活躍，一手豪宅同中價盤都有支持，顯示資金對香港仍有信心。但風險唔少：世界盃期間波動、地緣政治、息口走向，都要留意。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。