【理財個案】讀者：老師，想請教你，因早前港股/美股都跌，本身諗住入多少少，最後只加了美股，因為對港股無咩信心（現時還輸錢），到今日星期回調，美股繼續賺，港股繼續跌，可能因為選股問題，我明白要長線，不能只看短期波動。
美股賺錢彌補港股蝕錢
但自從開始買美股，就覺得想re arrange 過： 美股（個股+少少VOO). 港股（只買收息股+ keep 但唔加注的之前4月比較低位買的）想問趁低溝（知道老師唔贊成溝，但為了：
- 盡快平倉，加注美股
- 如之後升勢好就當拉低成本
港股如下：
優質股，想現價溝：
- 比亞迪 （120入）x 1 手
- 小米（平均53入） x 3 手
質素比較差而轉弱，諗住唔溝，等下：
- 福壽園(3.7 入）x 1 手
- 美團（123 入） x 2 手
因為資金有限，如果只在等沒有策略就好似錯失投資有機會升的美股的機會，和趁機會重組一下，想問老師意見，因為見到好像美股賺的錢就彌補了港股蝕的錢，變相沒有增值到實在好掙扎
龔成老師︰輸錢同港股有無投資價值係2件事
輸緊錢，同港股有無投資價值，係2件不同的事，你要分清楚。首先︰我想你明白”溝貨”與”分注”的分別。”分注”即係本身預左一個資金上限，再去因應佢平貴度，慢慢加注入去。這是預先有計劃，去按股價變化去進行。
“溝貨”即係見佢跌就不斷入貨
而”溝貨”﹐即係見佢跌就不斷入貨，純粹只係希望盲目咁拉低平均個價。覺得之要平均價跌，未來平手離場機會就會大左。”溝貨”係好多散戶鐘意用架策略，不過溝貨唔單只唔會幫到你更易平手，反而係增加緊你組合風險。因為一邊拉低平均成本價的同時，你手上架股票比重都增加緊。而這類股票好多時，只會愈跌愈深，令散戶愈加注，愈輸錢。所以，我唔建議你咁做。
買入價或帳面賺蝕 不是判斷股票優劣的標準
第二︰你唔好用買入價或帳面賺蝕，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。
因為你買入一隻股票之後，買入價已經係一個沉沒成本，唔應該用佢作為考慮因素。反而係佢架長線投資價值，先係最重要。
重點分析的地方 係企業質素
若果有長線價值，就算而一刻帳面蝕緊，都應該守住先。因為長線佢會增長，慢慢去翻一個較理想的股價水平。相反，如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。另外，再要分析埋自己持股比重。如果太多，就算有質素，都要減少少平衡風險。你上述持股，都係有長線投資價值。但1448風險高，長線不宜持有太多。
你現時最大問題 唔係持股
第三︰你現時最大問題，唔係持股，而係你本身投資知識極之不足，連最基本判斷一隻股票價值的能力都未有，咁係好危險。建議你先提高知識，此期間最多分注借下指數ETF，例如VOO和2800，因為佢地風險度較細。
家美股已經唔平 回調風險唔細
同埋，唔係見美股係咁升，就買晒美股。而家美股已經唔平，回調風險唔細。反而港股現價，長線值搏率明顯較好。我建議你要多讀投資相關書本、年報，新聞和報讀相關課程。書本上，你可以睇我寫架《圖解股票小百科》、《圖解美股小百科》、《80後千萬富翁》和《財務自由行》，都適合初學者。
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。