理財個案｜30歲女月入55k租屋11k！有100萬積蓄想買一房自住

【理財個案】讀者：hello 想請教一下關於買樓問題。我30歲，女，依家月入55k, 租緊屋11k, 扣晒雜費同埋家用，大約每月儲3萬，目前積蓄100萬。六成錢放咗喺定期&美元貨幣基金，剩低啲錢就買左d科技&增長型基金。

想買300幾尺一房單位

原本係諗住差唔多存到d錢，早一兩年自己搬出黎租下屋，獨立下/體驗下心儀地區/見識下d樓住落格局，等儲夠首期，就用最快速度九成按揭買樓。

依家儲到我原本心入面既第一桶金，一直都有留意緊土瓜灣或附近九龍區嘅私樓，想買300幾尺一房既單位。心儀例如環海東岸，或者一d單幢式半新樓。

但當去多呢個moment, 有人提我九成按揭息貴，叫我吾急既話存多d錢先。但又有人話例如環海東岸，買完放租畀人回報都唔錯。我原本規劃係諗住買黎自住幾年先，或等到遲d結婚去另一半到住，自己單位可以放租，叫做多份收入。但結婚呢個係將來嘅事，完全無plan，起碼唔係呢一兩年內既事。

所以我好struggle呢半年內，好唔好實行我嘅買樓大計，定係繼續租屋住先？

想聽下投資角度應該點部處？

感謝

如果想買樓自住，現時算是一個合適的時機，因爲樓價已經從高位回落不少。雖然未算平，但已經係一個值得自住人士考慮的水平。買樓自住的話，不需要想得太複雜，只要係「供得起」+「物業滿足未來10-20年的需求」就可以考慮。

你本身已經有心儀的地區，建議你可以在買入之前，先租住一排，好多二手樓其實好難一時間睇到各種問題，但如果你先租住，可以慢慢發現當中的問題。

同時，可以滿足你獨立一下既目標。就你目前的情況睇，你有自住的需求，不過就未有迫切性。因為你可以用租屋去替代，而且結婚和婚後是否住而度，似乎都係未100%落實架一件事。

所以，你仍然有時間去慢慢篩選合適的物業，同時一邊睇下你人生規劃，有無其他進展，從而決定未來去向。

總括而言，長遠我預期香港樓價只會平穩增值，唔會大升，同樣唔會大跌。所以，自住係可以，但投資(是放租)的價值就一般。因此，你唔洗太急住做決定，諗清楚人生點行，同埋慢慢篩選合適的物業才做決定，咁會較好。

例如你在這段期間，遇到業主肯大幅減價或有好心儀既物業，其實都可以考慮。

另外，你現時仍然年輕，如果太多資金放於定期或貨幣基金，長遠的增長能力有限，建議可以考慮投放部分於股票，達到增值的效果。如果你投資經驗淺，你可以先從指數型基金開始，美股如（VOO)或（QQQ)，港股如盈富（2800）或科技指數（3067）。

同時間，你要去努力增進投資知識，來提升你財富增值效果。你要多讀投資相關書本、年報，新聞和報讀相關課程。