【理財個案】讀者本身做網購高級食材生意，但近年開始生意下跌，生意轉差情況已經有半年，自己已經出唔到糧，想請教點處理好？或應否用投資炒股增收入？

理財個案｜生意大幅下跌現金所餘不多

老師你好，我面對幾大的困難，好想請教下你。我本身做生意的，都做咗幾年，我係做緊網購高級食材嘅生意。早1、2年生意都唔錯，但近年開始生意下跌得好勁，依家比高峰跌70~%80%左右，現時這樣差的情況已經有半年，雖然未到交唔到租同出糧俾pt，但自己已經出唔到糧…同就快食曬自己啲現金…所以都幾迷茫，但知道自己公司係有前景，已經有做返啲相對增加現金流嘅方法，例如搞優惠等。

不過身邊無人可以俾到意見我，所以都想請教你，第一，點處理好，第二，我應唔應該繼續做，第三，有無方法，例如投資，可以幫下現時情況。炒股幫下盤生意？得唔得？

個案重點：

  • 從事網購食材生意
  • 近年生意跌幅大
  • 現金已所餘不多

重點目標：

  • 現時生意處理方法
  • 生意是否繼續做
  • 是否用投資增加收入

龔成老師分析：找出並解決導致生意下滑的核心問題

1）你一定要找出生意下滑原因，是你本身業務策略錯，定係大環境出問題。嘗試找出導致生意下滑的核心問題，去加以解決。因為你這個現狀，已維持半年，唔係短時間的事，相信有些問題存在。

你要細心想想，當初生意好，是否只是人們好奇或熱潮，之後是否已無興趣，甚至他們試過你的產品後，感到性價比不高，因此不再找你，又或多了很多競爭對手，影響了你的生意，又或是大環境出問題。你要找出當時生意好，以及之後生意差的原因，有了原因，才可以有針對性的策略。

至於你做的優惠，係可以增加短期的現金流，但核心問題都係要解決，否則會令你業務處於不利狀態，要留意。

盡量想方法增加現金流

2）只要你分析到，生意不利是你策略問題，本質問題，還是大環境問題，才能決定你是否應該繼續做。

你表示，長遠生意仍有前景。反映你認為近期生意差，只是大環境問題，你就要想方法，怎樣捱過近期的不景期。如果只是一些中短期問題，我會建議你盡力堅持，但就要想方法，增加短期的現金流，好多公司倒閉，並不是無生意，只是短期現金流出現問題，因此，你要盡量想方法增加現金流，快速收到現金的方法。

真正的投資唔會係短炒

3）你要明白，我哋做投資，其實同做生意都好似，我哋將資金，投資在一些有潛力企業，等佢慢慢成長，以達至財富增值的目的，係要時間。

我相信，你聽人講投資好易賺，而你現時現金不多，但又想利用投資去賺錢，你應該是想用一些短炒，或較高回報的方法，去快速獲利，令自己每月的收入增加。但記住，真正的投資唔會係短炒，唔好比坊間這種炒股的概念影響左。因為中短期波動，係可以因為好多因素，有些因素跟企業本質可以完全無關，所以係無得估。

建議你多留現金在手去支持生意

只有長線，企業價值才會正確地反映在股價上，所以投資係長線，唔係短炒。因此，以你現時的情況，不建議你投資，建議你多留現金在手去支持生意，集中力量處理好生意先。

生意又好，做人又好，總有高低，保持正面心態，面對問題、解決問題。加油！

更多理財方法及股票投資入門內容

作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。

免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。