網民熱話｜一到年尾，打工仔除咗清大假去旅行，仲會關心自己份花紅。日前有網民在連登討論區發文，指公司有名同事「出bonus見到過咗數即刻辭職」，對該名同事辭職方式頗為不滿。網民一個原因公認無問題。
樓主：打工唔應該係咁
樓主在連登討論區發文，指同事「嗰朝見佢話出咗bonus，話等咗好耐，原來係要走，做到咁明顯會唔會有手尾？」又批評該名同事「打工就唔應該係咁，過一排先辭唔好整臭自己個朵」。
一個原因公認無問題
帖文一出，隨即引起不少打工仔留言，大家都不約而同地表示該位同事只是拿回自己應得的福利，並指「有咩問題？」：
「唔係呃唔係偷唔係搶，真正憑自己實力拎返嚟，有咩唔啱？」
- 「有咩問題？應得架喎」
- 「攞返自己應得嗰份點解有問題」
- 「之前嗰12個月畀公司使到盡，係勞力嘅一部份，拖咗12個月終於出糧」
網民：應得㗎喎
- 「而家係施捨得返嚟㗎咩，應得㗎喎」
- 「大把人係咁」
- 「會有咩手尾，出糧係應份，辭職個人決定」
樓主再回應：好難睇
樓主看到大部分留言都認為該名同事冇問題，即時回擊網民：
「個問題咪就係太明顯，好難睇，未見過咁癲，真係一見到入咗數就遞，一刻都冇delay，其他人反應係：下⋯⋯」
反駁：打工都係明顯為咗錢
網民議論紛紛，並反駁樓主，指打工仔打工都係明顯為咗錢：
「你打工唔係明顯為錢？」
- 「為錢啫 邊到高人工咪跳 有本事先跳到啫 打工講心咩」
- 「打工就係為咗錢，唔講金唔通講心。係老細先會想講心唔講金」
- 「返工講金唔係講心」
- 「整臭自己個朵?好高職位架咩? 如果係小職員咁你就諗多左, 無一間公司無話會無左邊一個唔掂」
- 「其實出完bonus走難睇；出完糧走都係難睇。臨過年走難睇；通知期疊住紅日又難睇。peak season走掉低公司難睇；low season走hea住出多一個月糧又難睇。」
不如擺返圍和頭酒先辭工？
又有網民留言揶揄樓主老seafood言論：
「諗諗下真係覺得對公司唔住，不如賠返十萬八萬俾老細再擺返圍和頭酒先辭工？」
- 「我辭職慣咗唔收最尾一個月人工，覺得自己對唔住公司。有需要可以call我返去免費執手尾，教下人。一日為司終生為父」
- 「正常應該免費幫公司做一年義工報答」
- 「識玩一定係食埋新年D假」
- 「你應該係日日ot唔敢準時走，唔請sick leave嘅奴隸嚟，又話後生唔識感恩」
- 「你做慣黎生先覺得有問題，人哋尊重合約精神」
網民現身說法
有網民留言分享自己當年做打工仔辭職的經歷：
- 「我記得仲係做仔個陣，收埋雙糧計埋日子。係舊公司放埋個農曆新年，年初四逗埋利是先last day，去到新公司再逗過」
- 「想當年我都係咁，上午收到錢，下午辭職，𠴱日仲要係Christmas party ，完咗特登叫老細咪走住」
