【理財個案】29歲月光族女讀者月入約18K，無人工加無職升，銀行永遠只有3000元！有10萬儲蓄保險不用供每年收息約4％，欠卡數4萬，自覺Hea工無前途，考慮轉工...

理財個案｜29歲搵18K、無人工加無職升

龔sir你好，本人29歲，以前係做會展 event類工作的，都唔知好彩定唔好彩，幾年前轉行做了department admin，之後就疫情，眼見好多同行都失業或者停薪留職無工開，我唸我都算好彩。。。但呢個位係死位，無人工加無職升，除非跟大圍每年幾幾％，如果唔係都唔會有調整。好多熟d的director 都同我講，有得走就好走，呢個係死位。。同埋覺得呢份工真係唔適合我，做左幾年都係覺得好辛苦，好頹。

Hea工無前途應否轉工

甚至1年前因工作而抑鬱，d人成日羨慕我份工咁hea唔洗做，但我真係覺得好辛苦，無成就感，無嘢係我負責的感覺好唔鐘意，如果我係有家庭或等退休，咁呢份係絕世好工。其實我有試過搵工，但依家個market好似無咩地方請人，同埋最驚係，再遲啲過慣退休生活，會出唔返去。連我男朋友都話我似足佢退休阿媽。因為我日日真係唔洗用腦，唔使點做嘢，返去坐，同埋連自己都覺得，真係蠢咗先恐怖。你覺得我應該走唔走好？

本人財務資料

另外，想問你睇埋我理財情況，以下係本人財務資料：

  • 現金：月光族，銀行永遠只keep有3000現金
  • 儲蓄保險 100,000 (一筆過，不用供，現每年收息，約4％)收入：18k (1k公積金，實可支配現金17k)

支出：

  • 保險：2,000
  • 固定費用：1,000
  • 家用：3,000

儲蓄：

  • 定期: 1200
  • 月供基金 (富蘭克林科技基金): 1200

負債：

  • 40,000 (信用卡分期, 每月還3,000)

以前只要儲到錢，就會用黎去旅行去，所以依家基本上都無咩儲到錢，最近先發現財政狀況實在可怕，但感到唔知點算好。因為現時財政係負債緊，亦唔敢轉工，因為依家有醫療福利，交通津貼，食飯津貼，但真係好辛苦，好驚自己會抑鬱落去，但又唔敢辭職。希望參考下龔sir你的意見。謝謝。

個案重點：

  • 2X歲
  • 人工$18,000
  • 工作無太大前途

重點目標：

  • 是否轉工的安排
  • 理財計劃

理財個案｜龔成老師分析：不一定這刻轉工

簡單來說，你長遠一定要跳出去，但就不一定這刻轉工。我相信你對前途，都有自己的想法，因為你會去想這個問題，你話「無嘢係我負責的感覺好唔鐘意」，相信你都明白現時的問題，同時都想去改變，只是過往由於疫情，再加上你現有債務上負擔，令你唔敢去改變現狀。你都要明白自己的想法，你不是無進步的心，只是暫時的外圍因素影響，因此，你要肯定翻自己，同時開始為自己設定一些方向。

可先為未來去準備和舖路

如果你的行業，現時外面仍面對較大的不利情況，加上你這刻的財務情況，跳出去的確有風險，但你唔係無野可以做，你可以想清楚，自己未來10年、20年的路。你不是這一刻立即全面去改變，但你可以為未來去準備和舖路，等待時機出現，你就可以更有效率和本錢地，作出行動！

要了解自己強項在那裡

  • 第一，你要了解自己。你的強項在那裡，這刻的工作根本不適合你，轉只是時間問題，但你長遠想做甚麼，過往會展相關工作？又或其他行業？多去想想自己想怎樣。
  • 第二，當清楚上一點後，就要想想長遠發展方向，如果有一個明確目標，你要學什麼野技能，才可以做到心目中的理想工作？你可以先去讀相關課程，甚至去做這類型工作的兼職、問下這方面有經驗架朋友，去一步步行近自己目標。
  • 第三，如果你想轉的工作，你現時已經達到當中的要求，其實可以去見下工，試下水溫了解市場。如果有適合的工，我會鼓勵你轉工。

財富增值先處理好信用卡負債部分

記住，我哋係要睇長線，只係對長線發展有利，短期可能人工較低架工作機會，你都應該要考慮。至於你財富增值方面，你要先處理好信用咭負債部分，因為佢利息好高，會拖垮你投資回報。

審視自己開支

同時，你要努力去審視自己開支，睇下有無地方可以節省，盡力每月空出一點資金，去做月供股票，去進行財富增值。你現時其中一個不敢轉工的原因，是擔心現時你的負債，所以，你日後不能再有這些消費類負債，否則只會影響你的理財，甚至影響你跳出去的勇氣。

「保險」只係理財中防守部份

另外，「保險」只係理財中防守部份，買足夠保障就可以，增值可以留比優質資產（如優質股、物業等）去做。已一筆過交付的儲蓄保，你可以保留。但未來唔好再投放太多資金在儲蓄保險，因為會減弱你財富增值能力。

運用「先增值 後現金流」方法

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

29歲是財富增值的黃金時期

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。以你現時29歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

  • 定期這類定息產品，無乜增長力，唔適合你。
  • 基金你可持有，但必需了解當中持股(最少要了解10大持股)，是否優質和有增長潛力。

投資策略：儲起一定的現金作備用

投資策略上，你可以在處理好卡數後，先儲起一定的現金作備用，之後再投資。書本上，你可以先睇我寫架"80後百萬富翁"、"財務自由行"和"股票勝經"，會較適合你這類的初學者。記住，世上沒有問題解決不了，只要你不放棄，總會在不同地方，找到一條適合你自己的出路，加油！

更多理財方法及股票投資入門內容

作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。

免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。