理財個案｜32歲被減薪月入得17K！想靠炒股月賺幾千增加收入｜龔成教室

【理財個案】32歲讀者近年因經濟及行業因素，現職收入比之前大減4成，月入只得17K。體會到合適投資理財重要，所以想靠炒股月賺幾千提高收入，是否可行？

理財個案（1）讀者來信：32歲被減薪月入得17K

你好老師。我今年32歲，近年經濟及行業因素，搞到我現收入對比之前少左4成人工，現時收入得17000。我對於金融知識可以話係0，之前一直都無去接觸投資或者相關知識！

不過，我見到出面有人話，炒股好易賺，每月可以賺多幾千蚊，正正可以提高返我的收入，但我又唔知真定假。其實近年我更加體會到合適投資理財既重要性，最近機緣巧合之下我接觸你個page ，所以我忍唔到想問一些有關好新手既問題。

投資是否要有一定既本金，才可以開始。我有朋友一直都叫我合理投資，佢話就算你得幾千蚊都可以！唔一定要幾萬/幾十萬。而我就覺得本金覺得要有返一定既數目，例如兩三萬不等。
另一個問題係，我身邊有部分朋友佢地投資股票，大部分都係短線投資（我唔知佢地對該股票本身公司既了解程度深淺）。佢地算係投資定算係投機？炒股每月賺到幾千蚊，真定假？
最後我想問一下，我而家先開始慢慢學（本身興趣不大）會唔會係好遲？可能真係問左幾個好愚蠢既問題，但我覺得如果開始要學，更加應該要解決我眼前既疑惑先。

「發問」係學習必經階段，唔好覺得愚蠢而停步，因為無人一出世就乜都識，好多野，都係後期努力學習得來。所以，你想做投資，就要努力去吸收知識。睇財經新聞、睇企業年報、投資書籍、上相關課程，都會對你有幫助。

1）我哋開始投資，唔一定要有一筆較大的起動資金，因為就算得$1萬，都可以在股市上買股票，或買一些基金，當然，本金少能創造的財富都不會多，但你可以視為一個啟動，有第一步開始好重要！之後，你要每月有一定的儲蓄，就可以利用這筆閒錢，慢慢分注去進行投資增值，長遠財富才能滾大。

以你32歲，仍然算是年輕，可以選擇一些「平穩增值股」+「潛力股」作投資目標。但由於你投資經驗不足，這刻不會建議你投資潛力股，你先由一些平穩增長型股票開始。

2）我哋買入一隻股票，就等同買入一間企業，一定要知道佢質素、行業前景、財務狀況等，才去考慮否投資。當我哋確認係值優質股後，會用平貴定入貨策略，並長線持有，而唔係做短炒，去賺差價。因為短線股價會受市場氣氛、資金流向等，與企業質素不相關的事情影響，這些因素，我地係不能估計。

但長線，企業價值會係股票上展現出來。因此，優質股你買入後，長線持有，讓其自然增值，永遠都係最有效的財富增值方法。而你朋友，不論佢地對企業了解多寡，短線操作，必然受很多不能預計的因素影響，因此一定賭博成份，故算係投機。

另外，你表示投資每月賺幾千蚊，其實並不容易的，相信你聽到的方法是一些短線的方法，又或利用衍生工具，這些方法不是不能賺錢，但風險較高，同時散戶操作不易。在好景的時候，你可能會見到有人每月好易賺到幾千蚊，但當市況逆轉，往往會將之後所得全部輸光，因此得不償失。

因此，你打算利用投資，每月賺到幾千蚊，其實不容易，你要小心了解朋友們所講的方法，有可能是高風險的方法，根本不適合你。要投資得到穩定的每月回報，不是不可，但就要有一定的本金，投資投資一些收息基金、收息股票，如果股息率為6%（一年），你要投資$100萬，每月能收到$6萬股息，每月就是$5000。

但如果你在本金少的情況，強行追求每月有幾千蚊的回報，你好大機會背後面對了高風險而你自己不知。雖然你這刻人工減少，打算以投資每月賺多少幫補，但其實不建議。反而你要想想，現時的人工是短期情況，還是長期都會這樣，如果長期如此，自己會否轉工或轉行，又或提升自己以增加將來的收入。

3）你32歲，當然唔算遲，因為這仍是好年輕的年齡，依然有好充裕時間做財富增值。你除了盡力儲蓄、投資、學投資知識外，也要把握你年青優勢，盡力儲錢，做好財富增值部份。如果你這刻未有太多家庭負擔，就要盡力儲錢、投資，以及想方法增加你的長遠收入，提高你的能力、市場價值，以及提高你的投資知識。