【理財個案】讀者表示自己買入阿里、京東健康等股票均是接火棒「蝕到無眼睇」，已有一段時間無投資港股美股，因無錢回＋斬倉太傷，唯有先暫放一邊等升。
理財個案（1）讀者來信：阿里、京東健康蝕到無眼睇
龔sir，你好嗎？上次對話講嘅接火棒股票我蝕太多（例如 阿里爸爸，京東健康等等...），蝕到我無眼睇，港股同美股一樣，所以放埋一邊唔想斬，等佢上啦唯有，斬太傷了。
損失慘重 經一事長一智
所以我而家啲錢未回手我掂都無再掂股票，寧願草錢，等其他壓哂死蟹貨有曙光free到啲錢出黎再重新學你去「研究」背景，好過誤信啲人「tips」，真係損失慘重，經一事長一智。
賺咁多錢會否花錢買名牌？
另外我想問下你，你賺咁多錢，成千萬咁多，你會唔會花錢買名牌？有時我見到人地成日有好多唔同牌子嘅名牌袋，我一方面個心會羨慕，一方面我又諗，其實唔係買唔起，只係唔捨得買，但如果花幾萬去旅行去當地生活我又好捨得。
鍾意名牌是「稀缺」心態？
我睇過唔同video同文章講解點解啲人會咁鍾意名牌，都係「稀缺」心態。之前認識做珠寶嘅生意人但佢哋好低調，咁你呢？你係唔係住豪宅？買好多名牌？你係點睇依樣嘢？
理財個案（1）龔成老師分析︰
其實投資可以簡單概括為「在便宜的價格買入優質的股票，並長期持有」。騰訊（0700.HK），阿里（9988.HK），京東健康（6618.HK）都是有質素的潛力股，你的買入價錢偏貴，但都可以守住先。
潛力股要配合一定投資經驗
其實，潛力股要配合一定投資經驗。若你持貨佔組合較多，可以沽少少，換至其他較穏陣優質股。做投資是一項非常獨立而理性的工作，你要學會自己做分析研究，設定投資計劃。否則，不可能在投資上有進步。
生活上的開銷都是「必需品」
我自小就在屋村長大，而且我個人比較實際，生活上的開銷都是「必需品」，我好明白「第一桶金」對理財的重要，所以不會買名牌。同時，我好少同人比較，要求的是做好自己，我知道自己的目標，所以當見到別人用名牌的時候無特別羡慕，我寧願用這些錢生更多的錢。
精明消費者要避免落入「陷阱」
如果你是因爲「人有我有」又或者「滿足自己的虛榮心或稀缺心理」，名牌是沒有必要的，商家自然有佢嘅銷售手法，但作爲精明的消費者要避免落入「陷阱」。
個人不反對用名牌
但我個人不是反對用名牌，牌子有其品牌價值，如果你本身有自己喜歡的品牌，不妨可以當作鼓勵，當自己做到什麼目標的時候，就獎勵自己，這樣，名牌就不單單是「人有我有」的工具。
通常有錢人都好低調
通常有錢的人其實都好低調，好節儉，巴菲特現時仍然住多年前買入的房屋，一部車可以用好多年，但巴菲特已經透過自己的實力向世界證明「自己就是名牌」，所以，我無住豪宅，無好多名牌。
人的價值不是用名牌去衡量
人的價值不是用名牌去衡量，花錢在你認爲值得的地方，俾錢去旅行買體驗都是值得的，最重要是你知道自己真正想要什麽。現時大市算係合理區中下部，我建議你唔好等D持股升上去先再投資，咁會浪費左機會。
一籃子優質股風險較細
你可以先用月供或分注，指數都得，因為佢係一籃子優質股，風險較細，現價都合理。你可以開始慢慢用佢地儲住貨先，同時開始學習，等有更多知識時，才投資其他個股，這樣安排會較理想。
理財個案（2）讀者來信：想致富 遇騙徒曾上當
龔sir，如果致富要不斷錯，咁過程包唔包括被騙徒呃？好多騙徒都喜歡用投資呃人。我哋審慎投資都要本身有足夠能力分析，唔夠能力分析騙徒就會搵位遊說，利用人怕錯失良機和教學嘅態度等試圖呃人。
自問曾經都上過當。網絡較明顯，當面較難認。唔一定次次可以洞悉到係騙術。咁正確心態係咪應該靠自己先係最好？
理財個案（2）龔成老師分析︰被騙徒呃不算是投資上的錯
錯雖然是會犯，但有些錯是可以盡量避免的，被騙徒呃不算是投資上的錯，反而反映在個人行事上可以更理性，更成熟。錯，當然盡量避免，但如果不幸中左，就要學習，下次不要再犯。當然，如果遇上好有經驗的騙徒，作爲普通人是好難識別的。
近年出現很多投資騙案
近年出現很多投資騙案，騙徒會化身成美女、投資專家、基金話事人、上市公司管理層等，先與散戶打好關係，當得到散戶信任後，就推介股票引散戶入局，以上述手法騙取散戶的錢。
要避開這類騙局也不是不可能：
- 第一，不要胡亂加入財經群組。
- 第二，不要輕信別人意見。
- 第三，買入股票前要有自己的獨立分析。
其實這類股，不少都有以下共通點：
- 第一，市值細，很多都少過$10億。
- 第二，上市年期不久，例如不足一年。
- 第三，股權集中，甚至證監會有出通告，提醒散戶出現這情況，叫散戶小心。
有懷疑可同家人朋友分享
自己能有能力分辨騙徒當然是最好，但如果有懷疑，都可以同家人朋友分享，可能他們當中有類似的經歷，可以給你點提醒。
更多理財個案及理財方法內容
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。
