【理財個案】27歲讀者月入20K，投資約20萬的股票正坐艇，計劃兩年內結婚，但近日發現自己使費大、無應急錢，想cut儲蓄保險套現，增加流動資金好唔好？
理財個案（1）27歲月入20K！股票正坐艇
老師你好， 我留意左你page 一段時間了，自己依家情況都想問一問你意見。我近年先開始接觸股票，依家27歲 月入兩萬頭，我投資左十幾二十萬落去，雖然依家都蝕緊不過我都會長揸，有一兩隻而家月供緊。
計劃結婚但發現無應急錢
近年開始計劃結婚，預期想一至兩年內，但係我自己依家因為要交自己保險，定期儲蓄保，股票，日常開支，自己戶口已經冇乜錢，發現自己有好多洗費又驚住冇灑應急錢，一年前我唔係好識既情況下買咗12年期既定期儲蓄保俾退休用，保費都貴一年要4萬尾。
想cut儲蓄保險套現
最近差唔多要俾第二期，我自己諗要唔要退咗佢，用呢啲錢繼續投資落股票或自己進修，因為自己都計過如果又要交埋保險平時使費加加埋埋一年可能都洗十幾萬，更加唔使諗放錢落股票就算放都未必放得多，我覺得如果依家退咗保至少啲資金可以流動啲，同埋我可以繼續月供股票。
想問吓老師你覺得我呢個情況應該點樣做？希望老師可以俾啲指引我
理財個案（1）龔成老師分析︰偏向建議你退保
現時很多人壽保障﹐都會連帶埋儲蓄成份。記住，我地保險只要買足夠保障就可以，增值應留比優質股去做。由於你個保險唔係供左好耐，我偏向建議你退保，因為長線佢會拖低你增值能力。但同時間，你都要慢慢安排買翻一D保障性保險，如純人壽、醫療、危疾等。
必須留有6個月至一年應急錢
另外，留有6個月至一年的應急錢是必須的，如果你的使費大，嘗試用記賬的形式，了解自己的使費並將不必要的開支刪除。投資係一個長線計劃，如果你1,2年內會結婚，這部份資金就不宜作投資，最多做定期好了。餘下閒錢，先好投入月供股票計劃，永遠都係先做好防守和照顧好生活，先至再增值。
理財個案（2）點睇香港樓市？
你點睇香港樓市？
理財個案（2）龔成老師分析：香港樓市 中短期會弱
香港樓市，中短期會弱，但不會大跌，長遠會平穩。首先要睇經濟基本面，如果經濟持續差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。
加息對樓市會不利
另外是加息因素，加息對樓市會不利，因此有可能有下跌壓力，但由於香港買樓需求仍大，相信不會大跌。在長遠計，我仍相信樓市在長遠計，因供求關係，較難大跌，不過，也不會有大升的情況出現。
樓市有需求 不會大跌
樓市始終需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。不過，移民的確令需求減少，加上政府將加大力度找地起樓，所以長遠，供求將慢慢好翻，無過往咁先衡。
料長期供應會增加
當然，政府現時有較大決心處理好樓市問題，我相信會令之後的供應增加（不是中短期，要長期才慢慢見到），因此，樓市不會大升，但相信都較難大跌（始終需求大）。
長遠計 樓價會平穩
長遠計，樓價會平穩，不是倍升，不會好似過往般倍升，而是平穩，同時，由於需求大，要大跌也不易。因此，香港樓作為自住的價值仍在，長遠樓價平穩。但投資價值，就只是一般，未見好吸引的水平。
理財個案（3）順興集團控股前景
龔sir點睇01637 之前買左好多
理財個案（3）龔成老師分析：主要提供機電工程服務
順興集團控股（1637.HK）主要在香港提供機電工程服務，涵蓋機械通風空調系統、低壓電氣系統、消防系統，供水和排污系統的供應、安裝及保養，主要客戶包括建築公司、私營醫院、房地產投資信託公司及政府部門。
業務普通 無獨特性
業務很普通，無乜獨特性，過往財務數據也很一般，投資價值不高。近年盈利有轉差情況，這股不太建議投資。如果你持貨多，要減持，餘下再睇業務有無機會好轉。
更多理財個案及理財方法相關內容
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。
