【理財個案】讀者每月要還債1萬元，不想再隨心買入股票，想知應否趁股市跌買盈富，即時只能賺到幾百元幫補生計都好。

理財個案（1）讀者來信：每月要還一萬元債

多謝回覆。計下數，我每月要還一萬元債，龔老師，我怕頂唔住。龔老師，應唔應該趁市跌買盈富一手？幫補下都好。聽你教導，我唔再隨心去買入股票，希望老師協助賺到幾百元都好。

另外，我應該看老師你哪本書先？盈富基金會否再跌下去？我聽你話，無睇實個市，但點樣走咁D貨？

理財個案（1）龔成老師分析︰投資只會用閒錢

你記住，投資只會用閒錢，如果你現時有很多負債要還，先處理好這部份，之後才投資。因為高息負債會蠶食你投資回報，唔好有個想法，就係用投資高回報，去解決債務問題，咁係好危險。投資係長線，而債務係短期問題，所以前者唔會幫你處理到後者，你要分清楚。

先要解決咗負債

如果你高息債較多，可以睇下銀行有無些較低息或長期貨款，令你整體債務壓力下降。恒指現時算初部平宜，可分注盈富（2800.HK）。但大前題係你要解決咗負債，有錢剩先。因為現時盈富（2800.HK）係有值博率，但唔係代表過2,3日就大升。要回升，係講緊起碼要等1至3年。

盈富和中電本質無問題

書本上，你可以睇我寫的《80後千萬富翁》、《財務自由行》和《股票勝經》，都適合初學者。盈富（2800.HK）和中電（0002.HK）本質無問題，如果你係因為債務問題，要增加現金流。你每有反彈，就按2者比例，少少咁慢慢去沽就得。

理財個案（2）讀者來信：深水埗1年新私樓應否加租

老師，我有一層深水埗1年新私樓，好唔好加租？
我見同棟放租價有加

理財個案（2）龔成老師分析︰這區份長線發展力不強

我建議你同同區，相同類型的物業租務作比較，再按自己物業情況作調整。（例如靚裝就上調少少）深水埗這區整體的收入較低，雖然近幾年多咗中產區出現。但這區份長線發展力不強，人口密度高，收入結構較一般，唔建議定得太進取。

理財個案（3）讀者來信：高值博率優質股推介？

老師，我d 股票已經輸咗一半，我想問下，以目前黎講，有咩優質股高值博率推介？我只係想將手上二三線科技股換返d 比較優質d 嘅股份。心目中有 2382.HK , 0700.HK , 1810.HK , 0522.HK , 0175.HK

理財個案（3）龔成老師分析：股市仍波動 要注意風險

你可以根據自己持有股票的質素，決定去留，決定是否減持，你可優先考慮 2382.HK , 0700.HK , 1810.HK，而3067.HK 都得，當然要留意，現時股市仍波動，要注意風險。另外，其實可以同時考慮美股，例如VOO，現時合理，都可以分注。

理財個案（4）讀者來信：考慮用公屋換居屋

你好，我同媽媽住公屋，現考慮用公屋換居屋，想問如果換居屋後可以買私樓嗎？有咩要注意？

理財個案（4）龔成老師分析：是否有能力「供得起」

基本上，你放棄公屋，就無入息及資產限制，可以買私樓。你現時計劃，相信係自住目的。所以，你要考慮新物業是否適合你長線生活(未來10-20年)。同時，你計清楚自己是否有能力，可以長線「供得起」個物業。還要記住，你會有差餉及管理費等新開支，故一定要計好數。

理財個案（5）讀者來信：想移民英國 賣樓驚蝕錢

老師你好，我想移民英國...但層樓仲有一年先賣得，又驚要蝕錢

理財個案（5）龔成老師分析︰中短期樓市走勢無得估

你要自己先計劃清楚，移民的實際時間。如果係有短期離開必要，蝕錢都要做。你這個嚴格而言，唔係投資問題，而係未來生活上的決定。現時大環境好多不明朗因素，所以中短期樓市走勢無得估。你應以自己生活所需，去做決定的重點。

唔好只考慮香港印花稅

另外，唔好只考慮香港印花稅。英國都有資產增值稅，你要問翻相關專業人士，若你要移英，應該"如何"和"幾時"處理香港物業會較好，以免造成額外稅務開支。

理財個案（6）讀者來信：黃埔花園低層單位估值大跌

想請教，我持有黃埔花園低層單位2年，估值大跌，但遲些想換樓，不知道應該怎麼辦？

理財個案（6）龔成老師分析︰黃埔花園本質不差

黃埔花園本質不差，是香港十大屋苑，有一定價值。而且，近年的新鐵路線優化了這區的交通，都提高了其性價比。如果你想換「自住樓」，其實只要一買一賣係短時間內做，減少大市變動對佢哋的影響，咁就可以。

因為黃埔花園本身，有力做到跟大市同步，較少機會出現新目標升，而你黃埔花園單位反跌的情況。

更多理財個案及理財方法內容

【按此免費訂閱《香港財經時報》HKBT 新聞快訊】

作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。

免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。