【理財個案】讀者打工10年，做過幼教、空服，現職文員，深知不想打一世工，但又無一門專業技能，曾開過ig店但收入有限，頓感迷惘、找不到人生意義求教！
理財個案（1）讀者來信：打工10年感迷惘
成老師，想搵你傾下計請你比啲意見，最近覺得好迷惘，搵唔到人生目標同意義。工作十年，做過幼教、空服，現職文員，我好清楚知道自己唔希望打一世工，我唔想搵定薪嘅薪金，每天為老闆工作。
無一門專業技能
睇完財務自由行，明白可以遵從書中五條路去行，但現實係過往10年嘅工作經驗入邊，我無一門專業嘅技能令到自己可以發展另一副業，我亦唔夠創新可以諗到一啲新嘅諗法去發展。
自覺適合用平均入市法投資
股票呢條路，我上完基礎班後，都係覺得初階投資者嘅方法比較適合我（平均入市法、唔係好使睇住個市嘅方法）而物業 同男朋友有層4百幾萬嘅樓，如要因為物業而達至財務自由，相信要一段頗長嘅時間。
十五十六投身保險行業
銷售方面，我自認面皮較薄，沒有太大信心可以行呢條路，有十五十六投身保險行業，但隨著年紀大，可以轉工的本錢真的愈來愈少（失敗了後再找返文職會較困難，因為我工作生涯中有4/5也不是從事文職工作）雖然我知道呢一個行業可以搵到嘅錢可以好多，但始終唔敢踏出呢一步。
希望可盡快搵到可轉型嘅事業
我好希望可以盡快搵到自己興趣、可以轉型嘅事業，唔想行一邊打工一邊股樓嘅方法，真係好羨慕一些人可以有一樣自己好鍾意好鍾意嘅事，可以去堅持。
開過ig店收入有限 難以發展
我開過很多IG店，小時候賣電話殼賣泳衣賣時裝到最近賣手作零食，發現手作的零食在扣除時間成本、入貨成本等，所賺的有限，難以發展。之前亦想過在竉物美容行業發展，先學習，後開舖，但上堂後發現自己沒興趣，白白浪費了學費。
有健身室創業的念頭
最近突然有健身室創業的念頭，因為我堅持做workout數年，在想會否考個健身教練牌，從兼職教練開始發展這門生意，知道所有嘢都係要嘗試先知自己有無興趣同work唔work 但始終時間、金錢也是一個考慮，怕突然興起就去讀最後又浪費金錢…
每天都覺得在浪費人生
我每天都努力在想自己的人生應該點規劃，甚至希望了解自己去看「人類圖」，買報告了解自己的人生設定，無一個奮鬥目標日子每天都覺得在浪費人生，多謝你睇曬咁多字。
更多內容：理財個案｜30歲月入3.7萬、持15隻股票值120萬！股量會否過多｜龔成教室
理財個案（1）龔成老師分析︰人生有迷茫其實好正常
人生有迷茫其實是一個好正常的事。就算你尋找到你想做的事，都難免在挫折同困難中迷惘。尋找其實是人生一個過程，你咁年輕，嘗試過咁多行業，其實已經比一般人厲害。創業不是一條容易行的路，當中一定會遇到好多問題，不過過程入面你會更加了解自己。
打工生涯中可吸收經驗
如果無特別的興趣又或者專長，可以先打工，從打工生涯中吸收經驗。你做事經常以興趣爲先，但其實真正成功的人不一定先做自己有興趣的事，反而做無興趣但有發展的事，然後再做自己想做的事情。
生意的本質是幫人解決問題
生意不是你有興趣就一定能夠做大，你要同時了解市場，了解消費者的需求。生意的本質是幫人解決問題。你嘗試過這麽多行業，有沒有總結經驗。你仔細思考，世界其實是互通的，幼教，空服的經驗或者可以幫你面對你現時的工作環境。
一項工作中 嘗試做長一點時間
在一項工作中，嘗試做長一點時間，我自己在銀行業都做左10年，只要有足夠的時間，你先可以真正了解到一個行業的特質。就算是李嘉誠，在成立現時的商業王國之前，都曾經做過打工仔，穿過膠花，並不是一步就到達現時的狀態的。
凡事不用太心急
所以凡事不用太心急，一步步來，在迷茫中摸索，先能夠看清前路。另外，有些人最終都可能係打份工，無去做創業、建立團隊或者做專家。純粹做投資，去達至財務自由的目標。最重要，是你找到一個方向，之後盡力向這個方向走，咁就可以。
更多內容：理財個案｜26歲資金不多！想花數十萬讀書又想趁後生多去旅行
理財個案（2）讀者來信：3年前買入舊樓 想轉租又怕蝕賣
老師！我有事情想唔通，想請求你明燈指引，事源係我三年前買了一單棟舊樓（樓齡35）單位和家人自住，可惜近呢一年周圍環境變化令我感到好困擾，唔知好冇賣出單位轉租其他地方。但眼見而家市況一係要蝕賣，一係唔知等到幾時先有人買，真係唔知點算。
那些變化包括：
- 鄰居幾近換哂做租客，有三户都有吸煙習慣，之前疫情嚴重期間其中兩户分別都會在半夜醉酒吵鬧打架（最近好返小小）。
- 樓下牆身有滲水情況，仲投訴上嚟唔只我一户（仍在調查中）。
- 我自己裝修師傅手工似乎唔太好，室內已經開始有老化（廁所水喉接駁微裂，牆身油漆微裂）...
我真係灰咗，都唔知處理得邊樣，懇請指點。
理財個案（2）龔成老師分析︰自住樓不建議輕易賣出
這種狀況的確令人困擾。如果買入單位之後發現情況有不對是應該要解決。你目前面對的問題是居住環境和物業本身有問題。如果現時賣出，的確比較難賣到好的價錢，而且自住樓不建議輕易賣出。
解決的辦法是先放租
解決的辦法是先放租，自己尋找合適的居住環境，等樓市氣氛轉好，有願意出好的價錢的賣價時再賣都未遲。但我建議你再客觀審視一次，你個物業價值。因為鄰居係租客，代表有機會不是長線問題。至於其餘都是裝修相關，係可以解決。
應集中考慮物業其他價值
所以，到將來是否沽出，你應集中考慮物業其他價值，例如交通/生活配套、附近地區整體發展等，而非只考慮你所提到的3個因素。
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。
