【理財個案】36歲讀者月入9.5萬元,有兩間居屋(一間已供完、一間未供完),另有供緊英國樓收租,港股、美股、英股、加密貨幣、債券都有投資,會否太散?
理財個案|34歲夫婦自僱月入25萬、公屋到住私樓!股票蝕錢多
理財個案(1)讀者來信:36歲有兩間居屋
老師,想請教下如果我36歲,月入9.5萬,有兩個女兒、資產有兩間居屋(一間700萬已供完自住居屋,一間500萬居屋重有240萬按揭未完,家人自住),一間英國樓(180萬,未完按揭130萬,租出淨收$5000),現金130萬,股票92萬(如下),債券7萬,加密貨幣21萬(連coinbase股票4萬)。以下為現持股票:
港股
股票代號 | 數量 | 買入價 |
0823.HK | 600股 | $68 |
0066.HK | 1000股 | $42 |
0086.HK | 10000股 | $3.9 |
1299.HK | 433股 | $79.9 |
2800.HK | 4396股 | $21.7 |
3187.HK | 1757股 | $21.7 |
1883.HK | 28000股 | $2.75 |
1038.HK | 500股 | $50.2 |
1308.HK | 1000股 | $30.5 |
美股
股票 | 數量 | 買入價 |
MSFT | 8股 | 278元 |
GOOLG | 1股 | 2,620元 |
VZ | 88股 | 55元 |
COIN | 31股 | 218元 |
BAM | 70股 | 53.6元 |
KRBN | 40股 | 43.1元 |
BKCH | 140股 | 24.9元 |
VOO | 18股 | 403.2元 |
QQQ | 9股 | 339.2元 |
SPY | 月供 | 7000元 |
其他投資
- 英股:LGEN 800股、$258成本
- 澳洲基金:12萬
- 月供美股基金:1萬 (已供12萬)
- 月儲1萬現金準備大跌時用
問題
- 想問持股是否太多太散,需要減少數量嗎?
- 持股有素嗎?應否再買股票?應否加大潛力股比重?我心目中想加 0669.HK,0388.HK,1830.HK?
- 之前炒股輸了2x萬,對買股票都很大陰影,有冇乜建議可以追返輸嘅錢….
- 應否買多一層英國樓,加大現金流?
- 如果想買65萬買一個新蒲崗無蓋車位,我計過按揭50%,月租$2500,都有大約6厘,值得嗎?
- 如果希望50歲前財務自由,月花5萬,有機會嗎?
抱歉,可能太多問題。
理財個案(1)龔成老師分析︰建議長線集中係10隻左右
1) 係,建議長線集中係10隻左右,咁你會易D定期審視佢哋質素。你現時持股,都係有投資價值,唔使專登沽。但長線集中返少少,咁就可以。持股當中,Global X Blockchain ETF(BKCH)和COIN不確定性會較高,長線不建議持有太多。
現時大市在合理區中下部,你餘下130萬,可以用多40-50萬,去分注入市。餘下就等大市再有明顯回調,才再加碼。
潛力股佔一半都可以
2) 以你年紀,潛力股佔一半都可以。如果你想加大增長潛力,可以加入 0669.HK,0388.HK,1830.HK。除左創科(0669.HK)現價有不平,要等回多1,2成外。其餘都在合理區,可以首注。ETF三星亞太高息房地產信託(3187)和中信國際電訊(1883.HK)增長力不高,你可以減持部份。
學好正確投資分析和估值方法
3) 你唔好諗點追返啲錢,咁只會令你判斷得更差。你現時要做,係學好正確投資分析和估值方法。同時,唔好再做短炒,要用長線。只要你調整好心態和技巧﹐回報自然會提升。
4) 唔建議,因為物業類你已經好多,有過度集中風險。
5) 如果你扣除所有費用,淨回報有6%,都可以考慮。但你要明白,物業類你唔少,再加碼點都有風險。
6) 如果你希望50歲每月有5萬蚊現金流,以股息率6%計,你需要本金1000萬。
15年後大約會增值至900萬
我假設投資回報有10%(連股息再投資),你現有資金+持股$222萬,15年後大約會增值至900萬。再考慮到你有其他資產,故相信很大機會達至你的財務目標。
理財個案(2)讀者來信:股票初哥求教
龔sir,你好,我係你fans,我叫chris。如果可以的話,有2個問題想請教你。
- 我係股票初哥,投資組合如下圖,我想請教你組合的比例對唔對?
- 我想請教你看你的書的次序,我剛買了2本(年報勝經和股票勝經)
大學不是財務學
但又想我大學不是財務學的,是否有啲前設嘅知識要先學咗先,所以想求教一下我應該先學什麼,btw我大學是讀數學的。如果龔sir有空,請你指教一下小弟啦,謝謝你
(網友提供附圖未能顯示)
理財個案(2)龔成老師分析︰參照自已人生階段投資
1)當我哋選擇投資項目時,應參照自已人生階段。年輕時,可以用「平穏增長股」+ 「潛力股」,到中年「潛力股」比重要減少,到近退休應集中在「收息股」上。假設你係年青至中年人士,你可以用「平穏增長股」 + 「潛力股」的組合。如果你係偏年青,比例大約可以去到各一半。
「潛力股」有一定波動性
但由於「潛力股」有一定波動性,較適宜年青和有投資經驗人士。若你投資取態較保守、經驗較淺或者較接近中年,「潛力股」比重就要相對下調。你的組合中,中海油(0883.HK),中銀香港(2388.HK),盈富基金(2800.HK)是平穩增值股,都有質素,可以長線持有。
中海油不適宜持有過多
但中海油(0883.HK)屬於商品類別,自主定價能力不高,質素只係中等,不適宜持有過多,現貨可以持有,但就不要加注。
騰訊(0700.HK),阿里(9988.HK)是潛力股,但因爲監管等因素,中短期較弱,而且他們是同一行業,你要留意不要持貨過多(同行不要高於組合3成),現貨可以持有。
工行是收息股
工行(1398.HK)是收息股,增長力不强,如果你是年輕人就不要持有太多,否則會拖低組合的回報。
2)其實大學是否學財務對理財無太大關係,只要懂基本的計算就可以,理財中,心態,知識,經驗才是最重要的,你可以先從這方面入手。
理財書推介
書方面,你可以先睇我的《80後千萬富翁》、《財務自由行》和《股票勝經》,都適合初學者。之後,你有時間,可以再睇埋《選股勝經》和《年報勝經》,對你累積資產會有幫助。最後,再因應興趣,閱讀我其餘書籍。
作者簡介:龔成(龔成Facebook專頁)是財經書作者,至今出版超過10本財經書,包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等,過往曾以萬元月薪滾出數百萬,現為股票班導師,身家過千萬元。
免責聲明:本網頁刊載的所有投資技巧及分析,僅供參考用途。讀者作出任何投資決定前,要自行判斷及審慎處理,更要自行掌握市場最新變化。若不幸招致任何損失,概與本網頁及相關作者與受訪者無關,本網頁概不負責 。而本網頁所有專欄作者的觀點,不代表本媒體立場。