每逢每年四月份因大地回春,老樓開始閉關不行山,改為水上活動以保持運動量,但因今年氣候反常,未到時候下水禮,故此便隔一個星期便睇樓一次,適逢家人得閒,故上周末周日兩天看二手,兩天總共看了八個單位,涉及三盤,睇到有點暈陀陀。

假日中午時份睇樓

睇樓的原因,正因有需要,故此在公在私都要貼地來了解一下最近二手市面情況,老樓喜歡在中午時份睇樓,一來沒有太多人撞時間,二來可以看得更聚焦,便相約不同地產代理看一些被我指定的單位。事前已經同太座夾好,她負責聯絡代理看網頁內的有匙單位,還好不致於沒有太少匙盤。

睇樓主攻大單位

由於皆看大單位,不像中小型單位般那般缺貨,便開始了兩天行程的「睇樓記」。可能沒有全新樓盤開售,代理店內有不少代理駐場,當然在做了一輪配對工作和安排後,很快便可以進入睇樓記。

內地「來港易」中短期刺激樓市!但目標限於高私隱、海景和高端真豪宅|老樓周記

香港通關|內地人5月中免接種免檢疫「來港易」! 留意兩類港股最受惠

多人睇樓等很久

第一天看了四個單位,原先第一個在地下大堂時,大堂保安員已通知樓上正有客睇樓中,已經看了10多分鐘,叫我們一行三人包括地產代理稍等,但過了10分鐘後還未下樓,已經有其他地產代理帶了其他客在大堂登記睇樓,老樓與太座不想等太耐,故此便著地產代理看其他單位先。

1小時內 四個單位逾10枱客人睇樓

當看了15分鐘左右在差不多睇完前,已經有其他地產代理開門入來,「咁好景?」老樓問,「手上匙盤大家差唔多都是這些單位,還好你們早點睇否則下午更加多人。」但自下午一時至二時期間,四個單位總共有十多枱客人次睇樓,而且部份也是剛在遇上的準買家。

「手快未必有、手慢一定冇」

這些現象倒也普遍,代理話,最近多番幾個鎖匙盤,新鮮熱辣,啱就要快傾,手慢遲啲仲貴,最近好多二手破頂成交,有錢也未必買得到,旺過97嗰陣,他說刻下新盤回氣中,二手業主仲狼過發新盤價,臨成交前反價多的是,正一「手快未必有、手慢一定冇」。

入內便嗅到坑渠味

真係咁旺,在周日再出動睇第二區四個單位,同樣是中午時份,而且晨早聯絡好地產代理,在約好的地點等,以免浪費時間。由於今次看同區兩個盤共四個單位,首先便看一個入伙將近一年的單位,入內便嗅到坑渠味,代理指業主剛收樓,單位沒有開過水喉所以便有這臭味,打圓場沒有問題,當然這點老樓在疫情間十分留神以免「中招」,嗱嗱臨開哂露台和房間窗、抽氣扇等通通風,之後再有其他人開門,所以即刻閃。

睇啱都要看價錢

之後看另一個同區樓盤三個單位,由於剛入伙,好多樓層搬緊屋,而且裝修味好重,入內更加要開大窗,看完後,地產代理循例問喜歡那個單位,老樓之前已經同老婆說不要出價,回家先商量,當然冇咁順利,兩個代理輪流說「依家樓市好旺,隔晚已經冇咗個盤,劉生劉太最好快點決定啦。」都係人求盤嚴重,啱都要看價錢嘛,老樓如是說。

按此訂閱《香港財經時報》HKBT 新聞快訊