【新盤2021專輯】帝御．嵐天於本周五（3月12日）以先到先得形式發售112伙，單位使用面積介乎184至388平方呎，折實入場費323.7萬元。由於個盤呢期合共提供557個單位，而且戶型多元化，所以相信項目會繼續受到市場追捧。
屯赤隧道通車利好區內樓市
位於屯門青山公路青山灣段的帝御．嵐天，是整個項目的第三期，發展商帝國集團和香港小輪2020年已推售第一期帝御．金灣和第二期帝御．星濤；帝御．嵐天首輪亦於今年1月底開售，銷情十分好，第二批單位更再接再厲大收旺場。值得留意，香港疫情有所緩和，食肆已逐步恢復晚市堂食，政府設施亦陸續重開，中港兩地通關已是指日可待。
當然，買樓很著重地理位置，咁屯門又遠唔遠呢？其實西鐵線通車後交通已經明顯改善，2020年底又進入新里程，因為屯門-赤鱲角隧道於2020年12月27日開通，目前無得去旅行公幹，大家用來遊車河，效益仲未反映，何況每逢新線啟用，初期一定會有阻滯，惟短期內外遊者唔多，正好「Run順」佢。
內外兼備 望吸年輕客
無論點睇，呢條「屯赤隧道」都肯定有利屯門樓市。其實，依家好多時都可能要Work From Home，交通距離可能唔及間屋內部因素重要。
帝御．嵐天作為大型屋苑，優勢之一係擁有設備齊全的會所，其中24小時開放多功能健身室可以滿足不同人士的需要，更加係工餘時鬆一鬆的理想地方；最特別係會所設有儲物空間，供會員擺放相當「掗埞」的設備，好似行李箱、單車或滑雪裝備等。至於屋苑出面，帝御．嵐天除了與國際知名的「哈羅香港國際學校」為鄰，仲相當近黃金海岸泳灘，以及「五灣一脈」連綿海岸線，得閒可以行行沙灘，浪漫一下。
睇帝御．嵐天開價，都係希望吸年輕客，但面積就真係唔算細（184至388平方呎），單位間隔開放式至兩房，部份仲有工作間（據講個別有窗），咁一吋空間一吋金，是否適用最緊要睇自己需要，以呎價1.5萬元入場，確係主力首次置業者，喺依家錢唔值錢同低息環境，自用負擔得到值得考慮。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。
