有人統計過2020年9月開學以來,K1小朋友只有31天上學時間,以我個仔嚟計,入面仲有好多日只係返1小時或2小時學,同無返過學無分別。

2021年香港人疫下新常態!每個屋企都可能有一座口罩山|深媽實道

2020年都學識用Zoom 

又要講呢句,疫下新常態下無新事,不論你3歲定30歲,2020年都學識咗咩係Zoom,返學嘅用Zoom上課,返工嘅用Zoom開會,個個都好似參加技能提升計劃咁,新常態展現新技能!不過,對家長而言,幼稚園嘅小朋友要上Zoom又好,睇片學習又好,其實即係家長要學埋教埋一份,真係血都嘔多咗唔少呀!

家長一齊學Phonics 

以我家小孩為例,雖然佢唔使Zoom,不過所有學習嘅嘢,都轉晒睇片,一路睇時父母都要陪伴在側,因為都需要一路引導或者揭住書咁講解,睇完片仲要做少少簡單功課,又要溫習一下所學。講真,本身我都唔識Phonics,而家又可以學埋一份!

家長-WFH3-K1-返學-香港小朋友-疫境-在家學習-香港財經時報HKBT-香港財經時報-HKBT
圖片:作者提供
家長WFH300天、K1返學只有31天!香港小朋友如何在疫境中在家學習|深媽實道

家長做功課多過小孩做

至於講到功課方面,除咗做啲連線練習、填顏色、貼貼紙這類比較簡單的功課之外,早前收到一本「週記」,原來咁細個小朋友都做週記,見到嗰刻都咪話唔頭痕,其實好明顯係父母做多過小朋友,因為字佢哋又唔識寫,畫又唔見得識畫,所以不諳畫術的深媽,都只好將呢份差使交俾深爸幫手,最多我就引導下孩子一齊諗下題材。

親子閱讀變伴讀書僮

剛過去的聖誕假期,估唔到咁細嘅小朋友連閱讀報告都有,學校提供咗一個親子閱讀清單,入面有大概十本書,讓家長們可以從中選五本與小朋友一起閱讀,當然親子閱讀是一個好活動,加深小朋友對閱讀興趣之餘,亦可以俾小朋友同家長有一個緊密接觸。不過,大家都知圖書館而家唔開,又點樣借書呢?學校都十分貼心,教家長如何透過圖書館的電子功能借閱書籍,但由於圖書證已遺失多時,身份證又無登記借書服務,最終都係未能借書。

網上欣賞別人講故事

好彩學校都醒目,有其中五本書有YouTube Link,可以網上欣賞人講故事,先成功咁同小朋友做咗親子閱讀,當然結果都係無可避免地又要睇電子產品,而閱讀報告又要靠深爸嘅畫功去幫手先做得成,要畫出最令小朋友印象深刻嘅場景或者主角,對深媽嚟講真係好有難度。

多得深爸幫手畫出深深最深刻的角色。-香港財經時報-HKBT
圖片:作者提供
多得深爸幫手畫出深深最深刻的角色。

家長各自在不同領域提升技能

經過呢啲訓練,深媽同深爸都各自喺一個領域入面提升咗技能,相信各位父母都係喺疫境入面自強不息緊,每一日都繼續問,幾時先有得返學呀!(哭)

按此訂閱《香港財經時報》HKBT 新聞快訊

編按:專欄作者深媽,雙職媽媽一名,曾任職傳媒行業,做過副刊親子、教育、家居、健康、寵物版記者,現時日頭是專業Digital Marketing人,放工返到屋企即變身成「湊仔戰士」,同屋企一隻即將4歲的跳跳紮兒子搏鬥。攰,但相信不少媽媽都同我一樣樂在其中!