讀者來信:Anthony Sir 你好!之前有睇你的 YouTube Channel 第一桶金介紹你們買的大陸樓,我都好有興趣,但阿爸阿媽非常反對,他們說大陸樓的管理好差,好快殘,十年樓就好似香港四十年樓,將來要賣就難了,真的嗎?個個盤都咁差?

施政報告沒為住宅減辣!小市民投資呢類非住宅物業可享100元印花稅|第一桶金

回覆讀者來信:以前大陸樓的管理質素較差

以前大陸樓的管理質素的確好差!

樓的質素固然麻麻,最重要是管理質素差,例如漏水又唔理、地面有積水又唔抹、天花牆身落當睇唔到,到處都是磞爛花,感覺甩頭甩骨!大堂走廊電燈壞咗又唔整,成日烏燈黑火閃吓閃吓,羅蘭姐出場拍鬼片咩?電梯又成日壞,數量又唔夠,日日上落排長龍,近年仲多一樣難搞的,快遞!個個住戶都網購,送來的速遞通地放,大堂變咗集運站,管理員照樣懶懶閒…

近十年內地新樓盤管理質素提升

然而近十年的新樓盤,管理質素有非常明顯的提升!

有炒股票的朋友都知道,內房物管股這板塊,近年在市場上好受歡迎,股價越升越有,不是亂炒的,物管水平確實進步很大!記得早幾年超強颱風山竹來襲,香港、澳門、珠海市面被蹂躪,周圍好似打完仗咁,有些冧樹殘骸今年還未處理好呢!當時我忽然想起,其中一個珠海單位是有海景的!肯定會被強風迎面進擊!當時單位冇人住,打完風使唔使過去睇吓有冇爆玻璃呢?唔使啦!有管家服務嘛!

內地新盤每座樓有管家為業主服務

現在很多優質屋苑,每座樓都會安排一個管家為業主服務!
我只要發個微信給管家,請他入屋睇睇,然後他會拍段視頻發給我,睇完!冇事!如果有事又點呢?可以叫管家幫手安排工人維修及清潔,實報實銷,完成之後又發給你一段視頻,到時微信俾番錢佢就可以了,又係足不出戶就搞掂,很方便!

不時Update你屋苑的狀況

另外管理處也會不時 Update 你屋苑的狀況,例如滅蚊、除草,又或者有住戶聚會等,都會透過微信通知你,即使你不在那裡都可以清楚了解到物業的狀況!以前那些甩頭甩骨,電燈電梯成日壞的問題已不復存在了,收樓三年了,直到最近賣出單位,仍然新的一樣,買家對物業的保養完全冇炸型!

投資高手 200多呎上車盤變出千萬豪宅 專家拆解將軍澳樓盤 值得投資的3個原因

賣樓時已要交維修基金

近年很多大屋苑,賣樓的時候都已經要交維修基金,也調整了管理費,加上新一代人比較重視生活質素,所以物業管理水平都有明顯提升,至於二手屋苑是否有改進呢?就很視乎業主組織是否能說服其他業主多付一點錢,去令大廈變得更好了,你備的!很多業主未必有這種眼光,視錢如命,那就沒辦法了!

平一半確實有着數

所以千萬不要說,一手樓有溢價,二手樓有折讓,抵買好多!視乎平幾多啦,如果平一半,確實有着數,如果平唔夠成就唔抵啦,質素差好遠!將來有機會一齊上大陸睇吓樓啦!

按此訂閱《香港財經時報》HKBT 新聞快訊

編按:專欄作者1% Anthony( 第一桶金)、一巴仙(1%)投資培訓學院創辦人,TVB有樓萬事足、BenSir睇樓團II等顧問,多年來協助無數年青人成功上車,無數小業主倍增資產,財務自由!除了住宅,亦活躍於大陸樓、工商廈活化重建等,團隊是市場上最活躍的新晉發展商之一。

免責聲明:本網頁刊載的所有投資技巧及分析,僅供參考用途。讀者作出任何投資決定前,要自行判斷及審慎處理,更要自行掌握市場最新變化。若不幸招致任何損失,概與本網頁及相關作者與受訪者無關,本網頁概不負責 。而本網頁所有專欄作者的觀點,不代表本媒體立場。

作者簡介:1% Anthony( 第一桶金)、一巴仙(1%)投資培訓學院創辦人,TVB有樓萬事足、BenSir睇樓團II等顧問,多年來協助無數年青人成功上車,無數小業主倍增資產,財務自由!除了住宅,亦活躍於大陸樓、工商廈活化重建等,團隊是市場上最活躍的新晉發展商之一。