有日一位小姐嚟到診所。
佢行埋嚟登記處:「我可唔可以問你嘢呀?」
唔可以。

【珍寶豬|寶豬診所】好勁抽

小姐:「你白痴嚟㗎咩?」

我:「有咩問醫生好啲喎」
佢:「你白痴嚟㗎咩?」
所以你係白痴先要走嚟問我嘅意思嗎?

我:「關於你健康呀醫療上嘅嘢梗係問醫生最好㗎啦,你要唔要睇醫生呀?」
佢:「我想問點解得一個鼻哥窿塞咋喎」
因為得一個鼻哥窿塞。

小姐堅持得一邊鼻哥窿塞

我:「啊?鼻塞呀?咁要睇醫生啦,醫生可以開返啲藥俾你幫你舒緩呢個情況呀,你俾身分證我呀」
佢:「我唔駛睇呀,我OK㗎」
你既然OK就走啦好冇?

我:「唔睇醫生嘅話,我都答你唔到呀,你一係自己入去問醫生啦」
佢好似無視咗我:「我得左邊塞咋喎,右邊通㗎,抖到氣㗎」
我:「…」

「為咗賺啲診金都真係幾口硬㗎喎 」

佢:「係咪左邊有問題呀咁?」
我:「小姐,我真係答你唔到,我唔係醫生,我唔知呀」
佢:「你為咗賺啲診金都真係幾口硬㗎喎,把口撬都唔開㗎?」
我:「我真係唔知點答你啫,我負責登記咋嘛,我唔係醫生我唔識㗎」
佢:「你明明係醫生都話唔係醫生啦」
俾你發現咗添!其實我係網絡醫生,嚟,上網見。我每次都係答『請到就近診所睇醫生』。

小姐拍枱要求有禮貌

佢:「我係咪左邊鼻哥窿有問題呀?」
我冇理佢,低頭做嘢。

佢拍枱:「喂,你俾啲禮貌好喎,我客嚟㗎喎」
有登記就係客,冇登記就係…運桔。

「白痴㗎你!」

我:「你要問就問醫生,我淨係可以幫你登記」
佢手指一揮:「白痴㗎你!」
佢快速轉身推門離開診所。
我諗佢應該唔止鼻哥窿塞咗,個腦都係。

按此訂閱《香港財經時報》HKBT 新聞快訊

編按:專欄作者珍寶豬任職診所助護多年,工作時遇見不少診所內的千奇百趣人生百態,別人看在眼內或會認為是份苦差,但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時,請勿對號入座。