有日一位後生仔嚟到診所。
佢行埋嚟登記處問我：「姑娘呀，前日張假紙你哋寫錯咗我個名呀，點算呀？」
後生仔：張病假紙已掉
我：「你有冇拎返張病假紙返嚟？」
佢：「冇呀，我掉咗啦」
我：「咁你俾你身分證號碼我呀，我Check返先」
佢：「我諗你應該登記錯埋我個身分證號碼」
即係點呀？我見鬼呀？
完全冇睇過醫生嘅紀錄
我：「你俾俾你身分證我先呀咁～」
佢：「好呀」
我輸入佢身分證號碼，冇呢個人。輸入埋佢姓名，都冇呢個人。
我：「先生，你會唔會去錯診所呀？我哋冇你睇過嘅紀錄喎」
佢：「我都話你登記錯咗啦」
我：「我哋登記要用身分證㗎喎，冇理由錯到連紀錄都冇啊。咁你登記電話號碼係？」
佢：「xxxx-xxxx」
我輸入後，都係冇…
會唔會真係去錯咗診所？
我：「真係冇喎先生，你會唔會真係去錯咗診所呀？」
佢：「唔會呀！我認得你呀！前日同我登記嗰個都係你呀！」
我：「我哋冇你紀錄嘅話，醫生寫唔到張病假紙俾你㗎喎，而且嗰時我哋應該有嗌你名入房同出藥㗎？冇可能錯成咁呀」
佢：「我點知你哋點做嘢喎，我病人嚟㗎嘛，你而家寫返前日張假紙俾我咪得囉」
我覺得呢個人好有嫌疑！
是但塞做一個唔得咩？
我：「唔可以咁㗎，一定要搵到你前日係用咩名登記㗎～」
佢：「是但塞做一個唔得咩？」
我：「唔得㗎，病歷紀錄一定要清清楚楚」
佢：「新登記得唔得呀？」
我：「新登記係可以，但係寫唔返前日嘅病假俾你」
佢：「咩都唔得嘅你？」
我：「你其實係咪冇嚟睇過，想寫返前日張病假紙呀？」
我認嘅係咪可以寫俾我呀？
佢突然良心發現定唔知係咪戇戇哋：「我認嘅係咪可以寫俾我呀？」
我：「唔係呀，做犯法嘢嘅話可以報警咋」
佢立即轉身離開，頭也不回。你真係當我豬咩～我個樣豬啫。
編按：珍寶豬任職診所助護多年，工作時遇見不少診所內的千奇百趣人生百態，別人看在眼內或會認為是份苦差，但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時，請勿對號入座。
作者簡介：珍寶豬任職診所助護多年，工作時遇見不少診所內的千奇百趣人生百態，別人看在眼內或會認為是份苦差，但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時，請勿對號入座。
免責聲明：本網頁所有專欄作者的觀點，不代表本媒體立場。
