【理財個案】讀者：早晨龔sir，有啲資產問題想請教下，希望老師有時間，請老師回覆。
我的資產及背景：
- 45歲已婚2囡 (小四及小一)
- 兩層樓，1層賺(藍田麗港城) 1層蝕(油塘海傲灣)
- 手頭資金大概450萬
- 接下來1、2年有計劃移民澳洲
1211幾時係收割好時機？
當年好感恩聽了老師分析比亞迪嘅潛力，當年以49.5（用拆股後調整計，當時成本$16），依家已經翻倍增，衷心感謝老師嘅教導及欣賞老師精準嘅眼光。幾次我想賣都冇賣出1211，請問1211幾時係收割好時機？
預計一家移民澳洲 收入會大幅減少
依家有澳洲僱主會擔保我到澳洲工作，順便會同我一家搞移民。月薪大概港幣$42,000，老公在港收入年過百萬，但暫時未知老公去向可internal transfer抑或在澳洲要找新工作，預計收入都會大幅減少，澳洲賺得多交稅又會多。
流動資金大概有港幣450萬
流動資金大概有港幣450萬 (唔賣樓的話)，到了澳洲都打算會買樓自住，出年過澳洲應該要賣比亞迪，
手頭上450萬都係要靠賣股票賣基金取強積金加現金先湊到450萬，依家兩女利是錢儲咗十幾萬，依家咁高又唔敢高追買比亞迪，兩女利是錢點可以幫佢哋繼續增長呢？
之前有月供股票
除此之外，之前有月供股票小米，1177，2800，兩年前見個市好動盪，我就停咗月供股票了，之前買落700，3067，AIA，港鐵，福壽園等，我都繼續長揸冇放到的，依家冇再買任何新股票。
香港兩層樓好頭痕
最後香港兩層樓好頭痕，唔知點做決定，賺果層想留做祖屋，第時回流返港有地方住，依家有租客租緊因為加按過一次，所以租金回報就level咗無profit，但叫做有人幫我供樓，如果賣出take home大概賺到150萬。
蝕嗰層好難賣得出，市場難搵人接貨，下月租期啱啱一年都唔知同租客繼續簽約定點如果繼續租出，之後連租約賣蝕得更多，如果唔租出每月又要攞萬幾銀出來供樓。老師，請問我依家點做好，十分煩惱，願龔Sir繼續旗開得勝，桃李滿門。
個案重點：
- 45歲已婚
- 家庭月入超過$16萬
- 有2個女兒 (小四及小一)
- 兩層樓，1層藍田，1層油塘
- 1、2年後計劃移民澳洲
- 手頭資金大概450萬
- 持有1211，月供1810，1177，2800
重點目標：
- 持有物業的決策
- 股票投資決策
龔成老師分析：記住永遠都係生活行先
1) 大前提，你係唔係已經打算長線係澳洲定居，定係到時去左再睇情況，可能回留香港，兩者情況可以好大分別。不過點都好，你要記住永遠都係生活行先，之後先到投資增值。
所以，你要睇翻自己現時過去定居，要多少資金(包括置業、至少1,2年生活費、仲有其他移居上架雜費等等)，來決定手上資產要沽出多少。
人在異地其實較難打理香港物業
2) 物業方面，人在異地其實較難打理，如果確定移民，可以考慮沽出一個。一方面令資金更鬆動，另一方面都令你資產唔會太過集中係物業類(香港2個、澳洲將來1個，加埋有3個)，而造成過度集中性風險。
賣樓主要睇長線投資價值
至於賣邊個，主要睇佢長線投資價值，同埋生活配置，而唔係睇而一刻架賺蝕。例如你長線打算留賺果層做祖屋，咁你都可以選擇保留這一間。當然，你不一定要這刻賣出，可以移民後，確定在地落地生根，才賣出一個，之後再過一段時間，才考慮全部賣出。
小朋友投資策略上十分簡單
3) 小朋友由於很年輕，可投資時間長，策略上十分簡單。你可以儲盈富(2800)，佢係包括數十間質素不錯上市公司股票的組合，有一定增長力。若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。
可以考慮埋美股指數ETF
另外，你可以考慮埋美股指數ETF，令組合分散風險能力更高。VOO和QQQ，前者追蹤標普500，算平穏增長型，類似盈富。QQQ追蹤納斯達克100指數，風險會較高，風險度近似3067。
用月供模式儲貨
操作上，建議你除左分注投入手上(小朋友)架資金外，可以用月供模式儲貨。每月大約用一半儲蓄，去做月供，餘下一半就先儲起，去等大跌市機會。如果你覺得太複雜，可以每月全部儲蓄都做月供，都係可以。
持股都有長線投資價值
4) 持股方面，都有長線投資價值。但如果你係需要沽出用作移民資金，建議現時就要分段慢慢沽貨，去平衡價格波動風險。
5) 比亞迪(1211)雖然潛力度略不及以前（因為已升左好多倍），但依然有一定發展空間，我自己唔建議減持住，除非你需要這些資金去移民用。
月供係一個長線計劃 唔好中間自行停供
6) 最後，記住月供係一個長線計劃，唔好中間自行停供，因為咁係會嚴重影響佢長線回報效益。特別係好多人鐘意市差就停供，咁係好錯。因為而個時候，反而可以用同樣成本，買倒更多架股數。除非你發現佢核心質素轉差，否則不要隨意停供。
（上述文章只是分析，只供學術性質，並不構成任何投資建議或邀約，投資者在投資前，請自行花時間了解，才決定是否適合自己。）
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。