【理財個案】讀者：早晨您好 .. 我都想請教您我男朋友的理財.. 我想問下您意見同分析..我同佢買左樓花..供左1年。
理財個案｜情侶夾錢買樓花
- 我地每月共同供$13000 左右比銀行
- 我地要另每月共同還比我屋企$25000 （要還多63個月）
- 黎緊輕裝修加所有預算我都儲好左 13萬 （但佢家姐話可以資助$50000左右）
- 我地共同現金只有$62000
- 佢收入是 $52000 13.5個月糧
- 我男朋友屋企好彩有家姐搵到錢。所以叫做有咩可以等家姐經濟支援佢媽咪，當然我男朋友會繼續俾家用屋企啦，就算同佢結咗婚我都唔會要佢唔好俾屋企
- 佢2年前都係搵2萬中而仲有幫老豆還40萬負債（已還完）
- 佢無持有股票同現金
男友已All In俾首期變月光族 難儲錢結婚
我地財政獨立，我地都想儲錢結婚但可惜好難儲 。基本上佢all in 左1mio去比首期.. 而家變成左月光族..其實佢都好節儉無車無名牌，我同佢出街都唔會話食好貴，佢爹哋已經過咗身，而供養父母免稅額就俾咗佢家姐。
應唔應該同家姐開口借錢？
黎緊稅又多…佢都努力想繼續升職..因為我屋企已經幫咗手，所以都冇得再問我屋企幫。到底結婚？佢應唔應該同家姐開口借錢？當然結婚我都會出錢啦。未來幾年應該最難捱，我好lost…
龔成老師分析︰財務上沒有太多優化空間
我都少少明白，點解你咁迷失。因為財務上，你們真係沒有太多優化空間，除左增加收入。成件事，我較擔心係你地已經咁多債務要還，如果長線再問家姐借錢，會令你地財務壓力再更大。
建議你用長線作思考點
所以，我建議你用長線作思考點，當然我明白結婚一生人一次，一定要規劃得好D。但都要同長線財務作平衡，以免往後財務路上過得更困難。
如果你要有具體方法：
- 第一，想想方法增加收入，有時人在不利情況下，反而有一些重大突破，兼職、小生意、利用自己專業創新收人？
- 第二，我見你地每月有一筆錢：「每月共同還比我屋企$25000 （要還多63個月）」
可否同家人講 拉長還款期
如果你資金上壓力太大，可否同家人講，拉長還款期，令每月還少D，例如每月還$12000，你地每月就可以儲到$13000，起碼有一些現金在手。
到你地過1、2年後，如果資金較好，又或加人工等收入提高，你地可以增加翻還款金額，都是一個方法。起碼可以令你地在心理上，壓力減少。
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。