【理財個案】讀者：龔sir，講少少自己背景，我27歲，單身同屋企人住，搵40k，以前要還grant，loan，同大洗，月光族，直到幾年前我的起心肝儲錢，果年我大約儲左15萬，同年我初初接觸股票，主要買正股，藍籌，加少少潛力股，印象中升到18萬到。
跟朋友買牛熊輸晒所有錢
我個人比較急進，加上我身邊有朋友買牛熊，如是者，我又開始跟人玩，前排個市好chok，一開波，兩日已賺到唔少，以為好易贏錢，心雄，結果學人玩過夜，結果買錯邊，一開市得番幾萬，我唔鋸，想快d追番，結果去買左d，0.01，幾接近回收既牛熊，結果我輸晒所有錢。
信用卡透支5萬現金再買
之後休息左幾日，見個市跌左好多，應該會反彈，因為未到出糧，我忍唔住係信用卡透支左5萬現金出黎再買，結果果日個市再插，我又輸晒，仲爭銀行錢。近2個月，我無再借錢，因為自覺咁樣落去一定死緊，但為左快d，還晒d卡數，我一出糧，就搵機會再買牛熊，雖然無輸晒，但都輸左20-30%，結果拖慢左還錢進度。
唔想戶口永遠咁少錢
我好迷惘，覺得自己好失敗，身邊有朋友好保守，佢地都勉強買到500，幾萬細細地既樓，而自己雖然事業好順利，有專業資格，黎緊會升到40k，但理財方面就差到極。我好想改變現況，唔想戶口永遠咁少錢，加上我自己都唔細，唔想再咁落去。
請問我而家應該點做？點翻身？
我打算先唔接觸任何投資先，盡快還清卡數，大約兩個月我會還晒，之後我打算cut，左個証劵行戶口，遲d，用番銀行買正股算，因為証劵行個app，實在太方便，太多資訊睇到，又好多槓桿產品可以玩，自問自己自制能力比較差，一睇又好想玩
想還原基本步 價值投資
之後我想取消左個串流報價佢，一來慳返幾舊水，二來有串流，成日咁貼市，又會手痕，還原基本步，價值投資，根本唔使串流報價最後，想cut咁d，creditcard，留番一張方便自動轉帳算。呀sir，你有咩建議比到我？我還晒卡數後，之後每月大約儲到28k，應該點運用好？
我希望老師可以救救我，謝謝
個案重點：
- 27歲
- 賭博心態投資
- 利用信用卡投資
重點目標：
- 想改變投資模式
- 怎樣長遠累積財富
龔成老師分析：財不入急門
你27歲，仍是分年輕，只要你之後用正確的理財模式，仍可以累積到一定的財富，記住財不入急門，不要有「心急想盡快賺翻D錢」的心態。理財要我地一步步，有計劃有紀律進行，在可承受風險情況下，合理將財富增值。
唔少投資者，都會經歷短炒、玩衍生工具、賭博等心態，我20年前都試過，衍生工具、孖展等，我都有玩，當時當投資是賭博，想盡快賺錢，心急，心雄。
有些人能憑這些方法賺錢
我明白，呢個世界有些人能憑這些方法賺錢，但只是極少數，我過往做銀行同證券行，好明這點，而長期能賺錢的，大多是長線持有優質股的一群。
其實，好多年輕人都有你這類心態，就算是上過我股票班的學生，我都知總會有同學忍唔住做短炒，但好多野要自己試過，先會死心，我講，你地唔會聽的。
好多散戶仍抱這樣心態
我叫人唔好短炒、玩衍生工具，係因為我20年前試過，明白咁樣無錢賺。其實好多散戶仍抱這樣心態，有人識醒，有人唔識醒。你暫時停一停，唔好再投資先，呢段時間，你要睇10本有關巴菲特的書，明白點樣先最賺錢，之後先從新開始投資。同埋，剪去所有的信用卡，之後唔好再借錢投資。
投資是理財的其中一步
如果你抱有「我想好快賺翻所輸的」，就唔好投資。你要明白，投資是理財的其中一步，這是一個配置過程，你是將現金轉化為資產項，長線持有，到你好肯定自己明白這方法時，先再開始投資。
我地最重要是建立一個長期的「財富組合」，要優質，要平衡，要適合你的年齡與風險承受程度，建立後長期持有，不是買賣賺差價，而是成為你財富組合一部分。
如果你真心想累積財富，就由月供股票開始，以「儲優質股」的模式進行，不要再炒賣。
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。
