理財個案｜供緊居屋要養兩孩子每月4千月供股票求5年換樓策略｜龔成教室

【理財個案】讀者供緊居屋，要養兩個小朋友。扣除開支後，每月固定有4000投放月供股票，想5年後換樓，預算約600萬單位，想請教最佳換樓建議！

理財個案｜供緊居屋 求5年換樓策略

老師妳好，本人有兩個小朋友，供緊一層居屋，市值約450萬，貸款232萬，扣除開支後每月固定有4000投放月供股票，分別係：0002.HK，0005.HK，0008.HK，2800.HK

想5年換換大約600萬樓，想問下有冇好建議老師。

現時月供股票：

龔成老師分析︰細屋換大屋應以增值為主

如果你目標係細屋換大屋，你現時應以增值為主。你上述的股票，都係具有長線投資價值。雖然質素無問題，可以以，但除了盈富(2800.HK)算係具增長力股票外，其餘都只係收息股，佢地增長力唔明顯，未必適合你用作增值之用。

投資策略：平穏增長股和潛力股

策略上，你可以投資「平穏增長股」和「潛力股」。你每月5成儲蓄，即是用$2000做月供。其餘先儲起，用一邊月供一邊儲蓄的策略。當然，如果你買入增長力較高的股票，風險度都會提高左，所以你要睇翻自己的情況，取適合自己的平衡點。

潛力股最多維持2-3成

如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

另一半現金等大市回調掃貨

若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。餘下的另一半現金，我哋就等機會，當大市出現較大回調，就加大力度掃貨，然後作長線投資。

現有持股建議分段換碼

至於現有持股，建議你都將部份，慢慢分段換碼至我講的增長力上。到你要置業前半年至1年，你就要開始慢慢沽貨套現，唔好到用先一次過沽，因為無人知當時個大市水平。因此，你要慢慢沽，去平衡價格波動的風險。

作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。

免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。