讀者來信:Anthony你好,經常都有睇你的LIVE,獲益良多,我都想跟你們一樣可以買樓自住兼投資,但發覺很難儲到首期,我出來工作已經幾年,人工不算高,大約3萬多元吧,但每月支出很多。

樣樣都冇得慳 難儲錢

例如俾家用幾千,上班要搭車食飯又幾千,供保險電話費等又幾千,平時同朋友出去交際聯誼又幾千,返工見客要置吓裝又幾千,樣樣都冇得慳,最後每個月淨番三幾千元,實在儲唔到幾多錢,點做好呢?

回覆讀者來信:還沒有喚醒儲錢的潛力

經常都會有年青朋友提出類似問題,大同小異…
總之就是收入不多,但有很多很多支出,所餘無機…

其實你的收入已經算不錯啦,比很多人都多,為甚麼別人儲到,你儲唔到呢?重點不是在你有甚麼支出,而是你還沒有喚醒儲錢的潛力!分享一個有用的心法,能讓你自然會找到儲錢方法…飢餓法則!

俗語有云,有錢就身痕!

  • 當你有錢的時候…總會想到很多理由去花錢;
  • 當你冇錢的時候…就會想到很多理由去慳錢!

每天喝杯幾十元的咖啡

之前拍過一條片詳細分享,有興趣可以到我的Youtube Channel第一桶金搵番飢餓法則呢條片睇。例如有位同事,每天都要到Starbuck喝杯幾十元的咖啡,理由很簡單…工作咁辛苦,飲杯靚咖啡充充電不過分吧。

沖即溶咖啡 vs Starbuck

我都喜歡咖啡,當年剛剛出道儲錢買樓,窮到極點,於是每天都自己沖即溶咖啡,理由很簡單…其實Starbuck唔係好啱我口味,即溶咖啡幾好丫,最重要係公司茶水間有,免費供應嘛!慳番!:P

飢餓法則的心法

飢餓法則的心法就是…令到自己處於冇錢狀態!
如何做到呢?很簡單!每個月出糧,先儲錢,再花錢就可以了!首先你要開多一個戶口,最好連信用卡、提款卡、轉數快乜都冇,平時攞唔到錢的,只有非常非常緊急的情況才可以去銀行櫃位提款那種,我會形容為黑洞戶口,有入冇出!

黑洞戶口

例如你月入3萬,你想儲一半,每個月一出糧,就將1.5萬存入黑洞戶口,然後用餘下1.5萬分配自己的支出,預算少了,就會想到很多理由去慳錢。

揀減價時才去買買衫

例如咖啡你會飲公司茶水間免費供應的即溶咖啡,例如買衫你會揀減價時才去買,例如日用品你會多到淘寶網購,例如跟朋友吃飯你會先到Klook、KKday、Openrice等下載Coupon,不知不覺間省下很多錢。

買樓是最強的飢餓法則

買樓,其實是最強的飢餓法則!
試想想,每個月一出糧,你就要扣起一截去供樓,供款之中,有利息亦都有本金,本金部份就是不知不覺間幫你儲起,平時你無辦法可以攞出來用,直到將來你賣樓,或者加按就可以一大筆過拿出來,是最強的黑洞戶口。

供樓是強迫儲錢

更重要的是,供樓是強迫儲錢!自己儲錢,你都可以有借口話今個月有事唔儲,但供樓呢?唔好意思,冇得唔供!斷供?銀行收樓,瞓街!自己瞓街都算,累埋屋企人!點敢唔供?

千方百計省錢供樓

於是無論多困難你都會千方百計省錢供樓,強迫自己儲錢。有年青朋友唔明,點解買樓做業主,明明要個個月供樓做樓奴,應該好慘,點解到頭來身邊的業主個個身光頸靚咁有錢?正是這個原因。

更多內容:綠置居2022|首期最平3.75萬都唔敢買?10個原因41折上車都不敢買樓做業主

更多內容:租金走勢2022|家庭客新樓未入伙「租住等」嘉湖山莊3房業主減租5.4%租出

按此免費訂閱《香港財經時報》HKBT 新聞快訊

作者簡介:1% Anthony( 第一桶金)、一巴仙(1%)投資培訓學院創辦人,TVB有樓萬事足、BenSir睇樓團II等顧問,多年來協助無數年青人成功上車,無數小業主倍增資產,財務自由!除了住宅,亦活躍於大陸樓、工商廈活化重建等,團隊是市場上最活躍的新晉發展商之一。

免責聲明:本網頁刊載的所有投資技巧及分析,僅供參考用途。讀者作出任何投資決定前,要自行判斷及審慎處理,更要自行掌握市場最新變化。若不幸招致任何損失,概與本網頁及相關作者與受訪者無關,本網頁概不負責 。而本網頁所有專欄作者的觀點,不代表本媒體立場。