FB專頁騙案】網上騙子真係多不勝數,除咗近日鬧得沸騰騰嘅賣豬仔事件之外,一班主題樂園愛好者早前都被人騙去大量金錢,事關有人話可以幫手買平價飛,結果成功買到幾次之後,諗住幫埋朋友買時,賣家一去不返,損失一大筆金錢。

Facebook主題樂園優惠群組

深媽我喺Facebook都加入咗一啲主題樂園嘅群組,方便了解下樂園最新活動,今日有人喺群入面Share咗個Post,就話佢賣飛方法同優惠同之前騙案嘅有相似嘅地方,我都第一時間通知親朋好友,因為見到優惠,好多時都會留個言PM咁,見咁抵就快快手咁衝咗入去俾人呃,而大批谷友就去到該專頁嘅帖子下面留言,希望提醒唔知情嘅人唔好被騙。

「康泰旅遊社」扮「康泰旅行社」

點解會咁易被佢呃到呢?其一係該帖子由一個名為「康泰旅遊社」專頁貼出,但只要細心一睇就會覺得有可疑,因為專頁名係「康泰旅遊社」,但係張個人頭像就用咗「康泰旅行社」嘅Logo,而讚好人數只有數千人,另外,在介紹一欄只貼上Facebook專頁的網址,專頁更只有兩個帖子。

更多內容:海洋公園秋季門票優惠|9月1日起小童190元 持樂悠咭100元入場|附詳情

更多內容:乘車優惠2022|港鐵、九巴、新巴城巴、電車等|10款交通月票+優惠合集|最多慳逾500元

可疑專頁留言被刪除 

這時,只要再想一想,就會醒起我哋平時聽慣聽熟嘅,應該係「康泰旅行社」,同時亦可以喺Facebook搵得到呢個專頁。更加古怪嘅係,當我再去可疑專頁睇留言時,發現好多留言被刪除,就更覺事有蹺蹊。

停一停 睇清細節及真偽

所以話,雖然優惠好多時過咗就無,亦都非常搶手,但都奉勸大家凡事都要停一停諗一諗,睇清楚細節同埋真偽先,錢俾人呃咗事少,萬一真係賣豬仔事件就真係恨錯難返。

康泰旅行社發聲明

編按:「康泰旅行社」亦已在其FB專頁公布,留意到該假冒專頁,名為「康泰旅"遊"社」使用了與公司相類似的名稱,同時以公司商標作頭像,推售一些樂園門票及宅度假的產品,目前已有3000多人讚好此假冒專頁。康泰旅行社聲明,有關專頁與「康泰旅行社」並無任何關連,亦從未獲本公司授權使用商標及標誌。康泰旅行社提醒消費者認清專頁,以免受騙。

按此免費訂閱《香港財經時報》HKBT 新聞快訊

作者簡介:深媽是一名雙職媽媽,曾任職傳媒行業,做過副刊親子、教育、家居、健康、寵物版記者,現時日頭是專業Digital Marketing人,放工返到屋企即變身成「湊仔戰士」,同屋企一隻即將4歲的跳跳紮兒子搏鬥。攰,但相信不少媽媽都同我一樣樂在其中!

免責聲明:本網頁所有專欄作者的觀點,不代表本媒體立場。