經過嚴峻嘅第五波之後,深深終於可以再次返回校園上學,唔經唔覺又到咗K2下學期,深媽經過幾個月陪佢上zoom之後,都加深咗佢平時學習嘅認知,學校原來每兩至三個星期會轉一個主題作教學。

小一統一派位結果出爐!林德育校長:適合的學校就是最好的學校|德育專區

學校主題教學

之前上zoom時我就一齊學咗消滅病菌同埋交通工具,仲學識埋啲兒歌可以陪佢一齊唱添。至到最近重返校園之後,開咗一個新嘅主題,有日放學深深就話要帶橙皮同埋報紙返學校,佢話學緊愛護環境,仲突然爆出咗回收呢個字眼,聽得出佢喺學校都有聽老師講嘢,都立時放下心頭大石。

回收便利店「綠在區區」

除咗識得講之外,深深原來都學咗少少回收知識,知道膠樽、鋁罐呢啲係可以放入回收箱回收,所以有一個早上就俾咗個膠樽蓋佢放入回收箱做個小體驗,加深佢對課題嘅認識。另外,而家好多區都增設咗回收便利店「綠在區區」,由於每個星期都要做週記嘅關係,都決定放假帶佢去綠在區區參觀。

「十元義賣」兒童及青少年書籍一律10蚊!實體活動前網上預售|附連結

可以回收嘅物料更多

去到「綠在區區」深深都好好奇,店內有比平時多嘅回收箱,可以回收嘅物料亦比平時喺街嘅回收桶多,除咗平日認識嘅藍廢紙、黃鋁罐同啡膠樽之外,而家可以回收嘅仲有光管、燈膽、電池等等,而且如果登記咗積分卡,仲可以每次將回收物磅好之後作儲分之用。

「入樽機」有回贈

儲夠相應積分就可以換生活用品,所以喺參觀期間都見到唔少人嚟將物件回收,對減少廢置堆填區嘅垃圾都有一定程度幫助。其實除咗回收便利點之外,而家仲有啲「入樽機」,只要帶同膠樽放入去,就會有少量回贈,亦可以將回贈做善事,幫到地球又幫到人呀!

智能奶粉罐回收機地點更新|任何牌子奶粉罐都收、最高回贈5元|附回收方法

香港落實2050年前實現碳中和

而家全世界都對全球暖化導致極端天氣嘅問題表示關注,紛紛落實喺未來實現碳中和,香港都落實要喺2050年前實現碳中和,大家由自身做起,源頭減廢、慳水慳電,都可以為碳中和出一分力。

按此免費訂閱《香港財經時報》HKBT 新聞快訊

作者簡介:深媽是一名雙職媽媽,曾任職傳媒行業,做過副刊親子、教育、家居、健康、寵物版記者,現時日頭是專業Digital Marketing人,放工返到屋企即變身成「湊仔戰士」,同屋企一隻即將4歲的跳跳紮兒子搏鬥。攰,但相信不少媽媽都同我一樣樂在其中!

免責聲明:本網頁所有專欄作者的觀點,不代表本媒體立場。