理財個案】34歲夫婦開公司月入25萬,由住公屋到買私樓,剛由兩房換三房。但唔識投資「聽你講去開左個中銀戶口月供股票大概2年,但10隻有8隻都蝕緊...」

理財個案|42歲夫婦有3層樓2車位!按揭欠1,300萬有排供感擔心求盡快減債方法|龔成教室

理財個案(1)讀者來信:34歲唔識投資 股票蝕錢多

龔sir,你好,已拜讀你的FB多年,有聽你講去開左個中銀戶口月供股票大概2年,但10隻有8隻都蝕緊,可能未能拎到當中供股嘅精髓,而觀察了多年後,信任你的投資理念,所以待疫情好轉將會報讀你的課程。經多年努力,由住公屋到私樓。但我其實是不太懂得投資的。所以想請教一下

我個portfolio如下:

我34歲,先生同年,同為自僱專業人士,用我名開獨資公司。生左小朋友現1.5歲,我轉為full time mum,先生一人工作,月入$22~25萬。未扣租金加雜費約$2萬。另先生有副業,月入約6萬。

資產配置如下:

  1. 剛由兩房換三房,自住九龍區樓,市值$1800萬,欠按揭708萬,月供大約25000。
  2. 啟德新樓一房,市值$900, 欠按揭380萬,月供大約15000,剛剛自用完,可隨時租出,租金$1.5~1.6萬。
  3. 股票約150萬,當中40萬係月供 (已經投資股票多年,之前無認真統計,應該都有微賺。由2020年到現在,大致係平手,賺幾萬蚊)
  4. 現金約120萬,沒有其他負債。
  5. 家庭支出(兩層樓供款,加衣食住行保險家用等)每月約80000蚊,小朋友未讀書,未來暫時打算讓他讀國際學校。

想請教:建議買商廈單位自用嗎?

1. 我哋有打算再購買一個商廈單位(計畫銀碼1,000萬內,現時政策可做4成按揭)作為公司自用。因一路都需要一個寫字樓單位做同一行業至退休為止。之前計過,雖然每月租金唔算多,但多年來都加埋已交左過百萬租,而我地就算計畫退休,都可能會慢慢返少d工從半退休開始,始終都需要一個地方。

唔知你建唔建議呢?還是租金佔收入太少,不建議壓一大筆錢在商廈?

想50歲前月有506萬被動收 點部署?

2. 如想在50歲前實現有每月5~6萬被動收入,我應該如何部署呢?

3. 有關股票操作,我曾以$279買港交所388, 之前升到$5xx , 我無放,現在又跌返去$3xx, 其實如果股票去到有一定profit, 係咪就算月供緊都應該放,再等低位入呢?我發覺有好多時都出現呢個問題。

4. 另外想問問,通常你話分兩三注入。 當入完第一注,假若佢一直升,無跌返下來,咁第二注應該係咩位入返?

感謝龔sir

理財個案(1)龔成老師分析︰月供要至少3年

多謝你的信任,但因爲課程好多時都爆滿,可以先whatsapp至55457212留位。另外,提翻你,月供是長期累積資產的策略,月供要至少3年,持有5年以上才可以見到效果,建議你不要將注意力集中在股價的賺蝕上,因為任何股票,中短期都會有波動,最重要係佢有無長線投資價值,有就可以照持有。你要多分析企業,吸收理財知識,對長遠財富的增長有幫助。

投資唔可以太偏重單一資產類

1)如果你購入商廈單位,再加上本身持有的2個物業單位,財富的分配會偏重於物業類別。成個財富增值策略,最重要係「平衡性」。我哋投資,唔可以太偏重係單一資產類。單一資產類,唔好佔成個財富組合8成以上。而且,你現時資金都不多,你最好優先保留資金,用作生意周轉之用。

宜先管好生意 才進行其他投資

因為一盤生意經營得好,其實長線回報係可以好過投資股市或樓市。所以,你要先管好生意,才進行其他投資。當然,你單位是公司自用性質,你要營業,長遠都有購入的需要。但現時租金支出不多,加上資金較少,你可以遲小小再購入單位。

可再動用多50萬投資股票

2)每月5-6萬的被動收入減去你現時1.6萬的租金收入,一年就要52萬,投資於6%的收息股,總共需要880萬。以你34歲,可以選擇一些「平穩增值股」+「潛力股」作投資目標。以現時大市處於合理區,你可以再動用多50萬投資股票,其餘的先儲起。

可較集中在平穩增長類股

由於你投資知識不高,因此可較集中在平穩增長類股,至於潛力股,只宜小小注(約3成)。此期間,你最好是努力提高投資知識,才慢慢增加翻潛力股比例。

餘下現金就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。

投資回報有10%(連股息再投資)

我假設投資回報有10%(連股息再投資),你現有股票+現金270萬,15年後大約會增值至1,100萬,故這樣安排相信很大機會達至你的財務目標。

優質股要長線持有

3)優質股,如果質素無變,最有效增值方法,一定係長線持有。因為你而家返轉頭睇,就會問點解$5XX唔沽左先,家下再入過就得。但事實係升到高位個一刻,你有無方法,可以確認之後,佢係一定會回調,而唔係大幅上升。如果你沽左後,佢再大升。你就會錯失升值機會,和要用較高成本才可以買回。

學好估值和分析非常重要

當我哋回頭睇,當然會知個陣點做先最好。但問題係,當時你無可能有足夠資訊去做決定。所以,我地要策略性部署。我哋只會係大市好狂熱、股價好貴、或者長線質素變差才會沽出。因為這些情況,我哋就有一定程度知道,佢未來增值空間已經有限。(因此,學好估值和分析係非常重要。)

不用理會中短期波動

相反,如果股票係有質素,我地就不用理會中短期波動,一直去持有,就才會是最穏當做法。港交所(0388.HK)是一隻優質的股票,獨市生意,加上香港的金融中心角色,這企業有長線投資價值,建議你長線持有。

4)加注沒有一定的答案,只要是合理區都可以加注,一般會相隔10-15%進行。

理財個案|47歲一家四口月入39K!買樓幾乎用光積蓄想盡快賺返|龔成教室

理財個案(2)讀者來信:27歲資金不多想月供etf

你好,阿sir。本人27歲。由於我係新手早前買入(6033.HK),諗住可以收下息。但係3月公布的第三次中期息不派發,股價跌了不少,請問我還應該繼續持有嗎?另外,因為資金不多想月供etf。請問(3110.HK)適合嗎?

麻煩了你,謝謝。

理財個案(2)龔成老師分析︰GX恒生高股息率 收息可以

電訊數碼控股(6033.HK)業務算是不差,生意尚算穩定,但見佢最近年生意額略有下跌,而且佢市值細,唔能夠投資太多。GX恒生高股息率(3110.HK),是一個投資收息股的基金,追蹤恆生高股息率指數之表現,收息可以。

用「先增值 後現金流」方法

我哋投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。

可集中「平穏增長股」

你27歲,應以增值為主,你可以用「平穏增長股」 + 「潛力股」作組合,去創造一個增值平台,如果你投資取向比較保守,可以集中「平穏增長股」。故以你的年紀,如果投資(6033.HK)和(3110.HK)這類收息股,長遠只會拖低組合的回報。

現時大市處於合理區中下部

如果資金不多可以集中月供指數基金。現時大市處於合理區中下部,每月資金唔好盡用,最好留有部份,等大跌市出現時,可以用來掃貨。

建議多閲讀理財書籍

建議你趁這段時間增加知識,多閲讀理財書籍,你可以先睇我的《80後千萬富翁》、《財務自由行》和《股票勝經》,都適合初學者。之後,你有時間,可以再睇埋《選股勝經》和《年報勝經》,對你累積資產會有幫助。

按此免費訂閱《香港財經時報》HKBT 新聞快訊

作者簡介:龔成(龔成Facebook專頁)是財經書作者,至今出版超過10本財經書,包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等,過往曾以萬元月薪滾出數百萬,現為股票班導師,身家過千萬元。

免責聲明:本網頁刊載的所有投資技巧及分析,僅供參考用途。讀者作出任何投資決定前,要自行判斷及審慎處理,更要自行掌握市場最新變化。若不幸招致任何損失,概與本網頁及相關作者與受訪者無關,本網頁概不負責 。而本網頁所有專欄作者的觀點,不代表本媒體立場。