英國能源價格狂升、電費愈加愈貴，不少已移民英國的港人都想盡辦法慳電慳錢。近日一名住了英國20年的港男於Fb分享終極慳電費大法，卻反被網民鬧爆其方法涉嫌「偷電」並引起極大迴響！事主則解釋只是「理論上探討電能儲存慳錢嘅可行性」。究竟事主分享的「慳電費方法」是甚麼？
移民英國住了20年港男 分享「合法地俾最少電費」
近日一名住了英國20年的港男於Fb專頁「走佬去英國」分享終極慳電費大法，他表示自己在英國工作，強調「收入唔錯，遊戲文章探討要慳錢最多可以去到幾盡，絕對唔係窮到買得起電車但冇錢交屋企電費」，他指自己揸電動車，並「妙想天開，就諗到一條絕世好橋，可以合法地俾最少電費。」
終極慳電費大法詳情
樓主教路：「首先，喺屋企附近搵一個免費充電站，依家都有唔少既超級市場停車塲會俾人免費充電，充電率通常都係7kw. 呢啲停車場一般都容許車主泊2小時到3小時。喺等待既2到3小時期間， 打開公司電腦繼續番工，以免浪費咗寶貴嘅時間。」
電車免費充電後 用轉駁器供應全屋電器
他續指，當泊車時限到了，就可以駕車回家，而電車車亦多了14或21kwh的免費能源。回家後，就用DC-AC 轉駁器駁落電車，將電源轉番做220-240V，就可以供應全屋大部分電器包括電腦雪櫃等等所需。樓主更提醒大家注意轉駁器通常最大功率為1800-2000w，所以煮食就可能要用回本身家中電源。
強調「小弟就冇試過啦」
樓主指此「終極方法」在不少英文網站都曾介紹過，並強調「小弟就冇試過啦，不過如果想慳到盡呢又唔介意咁麻煩呢，係可以既。他表示：「由於英國家庭，平均一日只係用8-10kwh 既電，所以呢個辦法，真係可以令電費單金額大幅下降，不過，要keep 住實行持之以恆，就真係要好有決心至得。」
慳電大法2：「用平plan夜晚充電8p/kwh 日頭再攞番黎到」
除了以上方法外，樓主亦推介另一個慳電方法，就是用較平價的plan夜晚充電8p/kwh，再在「日頭再攞番黎到，慳少啲但冇咁麻煩，係更加可行既方法，亦係電池科技界正努力既一個方向」。
網民一致批評「走精面、諗縮數」
此帖一出，隨即引來大量網民熱議，至今已多達過千個留言評論。而幾乎全部留言都一致批評事主的行為及觀點。其中一個網民直言：「懇請唔好將典型香港叻仔、走精面、諗縮數的行為+意識帶埋去英國，這樣會令英國人討厭新移民的香港人，就如某地方的人移居香港後惹人討厭一樣。重點唔單止行為，係心態意識好不良。」此留言多達數百個「讚好」，似乎一語道破重點。
網民：「自己唔尷尬，尷尬就係其他人」
有網民則認為：「除咗合法，還要包括合情合理。自己唔尷尬，尷尬就係其他人」而事主則回應指：「依家係探討方法嘅prototype，要實行嘅人先考慮尷唔尷尬既問題。而且如果用night rate平電，日頭用，係慳錢兼環保嘅做法」而該網民則再續指：「我意思係你個意見可能會令人尷尬，因為大家都係香港人，節儉係優點，不過同時攞人着數又係缺點，互相平衡都係一種生活哲學。」
此舉同偷商場廁所廁紙一樣
也有網民直言：「charging station 嘅電係公家嘅，係呢個地方好心比你架車嘅燃料。你提出嘅行為係偷公家嘅電用作屋企私人用途。此舉同偷商場廁所廁紙一樣，廁紙係比你係商場痾屎用，唔係攞番屋企用。大家X你係認為你嘅行為遺背道德，覺得你呢個人毫無公德心。」
樓主：只是從理論上探討電能儲存慳錢可行性
另有網民指語重深長道：「其實移民個意思係喺原居地居住，搵錢或當地政治唔得先想轉個地方重新嚟過，既然都行出咗呢步既時候，係咪應該諗下點樣為個新家做D有貢獻又為自己得益既事呢，喺原居地發展得唔好，就諗下計點樣向上游，點樣去諗縮數同當初香港落嚟嗰班有咩分別呢？」但樓主則回應：「呢個post同移民無大關係，主要係從理論上探討電能儲存慳錢既可行性」。
部分網民精警留言＋樓主回應
此帖的留言超過一千個，大部分網民回應均毫不客氣的直指樓主不是，不過樓主似乎未被他人影響，亦沒有刪帖，堅持自己只是「理論探索」，以下為部分網民精警留言及樓主的回應：
- 網民：總之我們要做好自己，記住香港人和大陸人的分別就可以了
- 樓主：過得人過得自己就ok
- 網民：好心唔好咁小家啦 計埋啲婆仔數 諗吓點樣賺錢好過啦
- 樓主：理論探索唔應該有限制
「搞臭香港人的名 真係唔好」
- 網民：有個方法仲慳呀，超市有類似食物銀行的東西，日日去取焗豆都幾好呀。
老實講，揸得電車。。。唔好咁啦，搞臭香港人的名，真係唔好。 - 樓主：食物銀行要有資格。 我只有資格捐，冇資格攞呀。
- 網民：well, 有小小淒涼
- 樓主：純粹貪好玩諗下
「合法但不道德」
- 網民：合法但不道德。你冇左法律唔識自己用自己價值觀去分辨？ 你自己做就話貪玩，上網教人。
- 樓主：creative thinking 諗多啲，有益身心
- 網民：做乞衣都咁理直氣壯...就算淨係諗下都好cheap好肉酸啦
- 樓主：咁都有人寫暢銷書 "如何做一個成功乞兒" 之類喎。 寫"厚黑學"既作者俾咪又要俾你唾罵？
- 網民：要班門弄斧，都唔該你睇吓資料先據維基講：《厚黑學》，為李宗吾於1917年所提出之學說，闡述臉皮要厚而無形，心要黑而無色，這樣才能成為「英雄豪傑」，寓針砭於嘲諷。 人哋要求係臉厚無形，心黑無色。但現在個個都量度到你臉有幾黑，心有幾黑。咁你係咪反李宗吾嘅學說？
網民：憑你一句知你人格
- 網民：有無免費公厠拎水用教學？
- 樓主：我係flat rate 任用，所以用水量與我無關
- 網民：憑你呢句就知你嘅人格。
樓主方法會加速電車的電池損耗
雖然大部分網民均「直插」樓主有「小農基因」，將其思想行為直接與來港新移民比較。但也有部分網民與樓主討論其慳電費方法的可行性，例如有網民表示，樓主方法會加速電車的電池損耗，減低電池壽命，最終得不償失。
網民：「省了錢 沒有省了電」
也有網民指：「呢個方法，是省了錢，沒有省了電。時至今日，識少少字，都應該都知道能源霸權引起眾多戰爭吧。 加電價是為了拒霸權。Alternative energy有好多種類，想知攻略應該唔難揾。」
最後，大家又是否認同樓主呢？
