【理財個案】40歲已婚婦近日重返職場，人工雖然只得1萬元，但有工作感覺更充實！投資方面，有月供港股美股，但港股跌到怕想停一停，月供美股反而有錢賺。
理財個案｜31歲夫婦搵得多使得多！還按揭負擔大如何財務自由｜龔成教室
理財個案（1）讀者來信：40歲已婚婦重返職場人工得1萬
老師，先感謝你，一直都有睇你FB，因為你的思維，讓我脫離咗我老公俾我11年的舒適圈，已重回社會工作，人工真係唔高，得$10,000左右，但係出返嚟做嘢真係個人充實咗好多。
美股最近跌但一樣賺緊錢
我亦都做咗先斬後奏嘅決定，買咗科技+健康基金，月供$3,000，供5年 (美股最近跌，但一樣賺緊錢)
- 儲蓄計劃，年供$36,000，供5年 (已供2年，呢樣最不智.......所以決定供完後唔再買)
- 醫保$1,000
- 老公+我月儲$13,000-15,000
現時持有股票：
| 股票代號 | 數量 | 平均買入價 |
| 0823.HK | 304股 | 70元 |
| 1810.HK | 845股 | 26.6元 |
| AAPL | 12股 | 172.16元 |
| VTI | 10股 | 231.745元 |
VTI 和 AAPL 是月供的， 但只要價位高，就會先停供，價低時會補供返，呢兩隻我係想長持10年，特別是AAPL。
港股跌到怕 應否暫停月供
- 1810.HK 原本之前是每月供$1,000，但佢就一直跌，跌到我開始怕，真係唔知應唔應該再供落去，定係等佢再跌多啲時先再供？
- 0823.HK 4個月買一手，最近又係跌，亦知佢係要長持收息，但港股真係跌到無晒信心，真係唔知點做好
- 最近睇中美股 KO 和 KHC， 請問呢2隻算唔算平穩增值股？前景如何？
再次感謝老師
唔記得講，我跟老公快40了 XDDD
理財個案（1）龔成老師分析︰VTI和AAPL月供冇問題
恭喜你，為人生找到新目標。保險，其實買足夠保障就可以，儲蓄保險不用買太多。不過，你已經供左2年，我建議你供埋佢。VTI和AAPL月供係可以， 你要現時策略都得。
建議你不論價格一直供
但如果你自問投資經驗未算好高，我建議你不論價格水平，一直供，並長時持有。因為我見不少人，都好似你咁做。但係平貴估算時，出現錯誤，令到最終得不償失，所以你自己再諗諗，睇下個月供入市方法，有無需要調整。
月供股票概念
1) 簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。形式就是每月投入相同的金額，買入同一隻或多隻股票，並持續進行。
以盈富基金作例子
例如，每月以相同金額$10,000 買入盈富基金（2800.HK），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。總結這三個月，投入了的資金為$30,000，累積股票為1019股，平均買入價為$29.4。
月供股票變相自行調節買入價
由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。
小米本質未有明顯變差
所以，其實佢愈跌，反而造就你入多啲貨機會，所以你係而個時候，只要佢長線本質無變，你係唔應該停供。睇翻小米（1810.HK）本質，近期雖然回調不少，但未見質素有明顯變差，建議你照月供。
理性分析投資決定
2) 唔好俾個情緒，主導你投資決定，我哋要理性分析。領展（0823.HK）唔見質素出現問題，你可照持有和定期增持。但佢唔係純收息，而係收息配以一定增值能力的平穏增長股。
香港收美股股息 要俾30%稅
3) 可口可樂（KO）算係平穏增長股類，有一定質素，但現價唔平，最好用分注或月供去慢慢儲貨。Kraft Heinz Co（KHC）有質素，但增長力唔高，偏向係收息型股票。但香港收美股股息，係要比30%稅，故不太建議作為投資目標。
理財個案｜32歲聽障人士薪金不高但可月儲5K！被騙15萬超後悔｜龔成教室
理財個案（2）讀者來信：119元買阿里 應否止血？
老師，之前我買（9988.HK），119元買入，而家跌咗！我係咪應該止血？放咗佢就算？
理財個案（2）龔成老師分析︰阿里中短期仍較弱
首先你要明白一個概念，我哋持有一隻股票與否，關鍵位是企業質素、前景，不要被買入價影響。因為我地買股票就是買企業。如果企業質素轉差，就要賣出。如果企業某些核心優勢減少左，就有機會減持，因此，我地要分析企業的核心因素，一些長期的賺錢能力，有無改變。
阿里中短期仍較弱
阿里業績差，相信阿里中短期仍較弱。阿里巴巴第二季度收入同比增長約3成，而純利逾53億人幣，同比跌8成，非公認會計準則淨利潤285億元，跌4成。盈利大跌，其中一個原因是上年度同期，有較多投資收益（投資在上市公司，股價上升帶來會計上盈利）。
阿里調整2022年總收入指引
如果以較反映經營層面的數據分析（即是不考慮會計、一次性相關因素），盈利下跌約4成，這個數字，當然是不理想，其中一個原因是支出增加，反映行業競爭加大，同時，增長力減少。
另外有一點值得投資者留意，該集團指，調整2022年財政年度的總收入指引，預計2022財政年度的總收入同比增長為20%-23%（而過往預期是30%）。
阿里股價短期會波動
以最新的業績，以及阿里收入的收入修正，相信中短期的經營環境，仍會較一般，投資者要明白短期股價波動，但長遠來說，阿里始終本身有優勢，慢慢能適應新經營環境。現時，要睇你持有的%，如果%太多，就宜減，如果佔組合比例不過多，就守住先。
投資概念 「賺錢」的思維
其實，除了持股，你更要留意自己投資概念。你現時「賺錢」的思維，與98%的散戶想法一樣。你追求實在的現金，認為要賣出賺到現金，才是賺錢，但我哋最重要是講求「財富最大化」。
當一隻股票上升，例如你買入價$10，現價$15，賣出可以賺$5。但當你套現$15後，你怎樣將這個「$15」再次增值，令你的財富增長，比留在原有股，得到更大的回報？
從「財富長遠最大化」思考
如果原在的股票是優質股，即是我哋持有優質企業，當你一直持有這股，企業長期價值向上，就會帶動我哋的財富有最大增長。簡單來說，我哋是從「財富長遠最大化」的角度去想。可能你會問，一直不賣，那麼永遠無法取出財富。
累積財富應「先增值，後現金流」
我哋累積財富，會用「先增值，後現金流」作策略，前者著重增值，之後就會改變策略，將已增值了的資產，轉為現金流類別，而我地就是不斷享受資產產生的現金流。
投資策略一定要長線
如果你真係想做到財富增值，投資策略一定要長線。透過長期持有優質股，待期自然增長，以達至財富增值目的。
作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。
免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責 。而本網頁所有專欄作者的觀點，不代表本媒體立場。
