村屋價錢平、儲夠首期想買樓？從自住＋投資角度分析為何不建議買村屋

讀者來信：Anthony Sir你好！我出來工作已經好幾年，儲了首期，想買樓搬出來住，最近去朋友家玩，佢住村屋，雖然是遠啲，但價錢平好多，地方又大，心思思想買，想又住又賺得嗎？

回覆讀者來信：新手不太建議買村屋

新手朋友我不太建議買村屋，除非你本身很熟悉！首先從投資（買入）的角度分析…買村屋的難度比一般私樓高，一般私樓，有一定的標準，尤其是屋苑，大部份都是出自大發展商，即使質素有高低，但最少都是眾人目光焦點，難聽點說，差極有限。

單幢樓質素比較參差，但最少都是發展商起的，全幢樓戶戶差唔多，就算自己唔識睇，睇吓樓上樓下有冇問題，有冇投訴，大致都掌握到，比較容易睇。相反村屋很多時是私人興建的，每幢都唔同，你係咪真係識睇？

再加上各處鄉村各處例，例如之前就試過有村屋出現路權糾紛，買咗樓冇公家路行入去，又試過有丁權、地權爭拗，還有僭建、污水系統等，你係咪識處理？難睇好多，風險較高。

由於每幢村屋都唔同，相對難有標準去分析，加上位置通常比較偏遠，所以交投會比較疏落。因此銀行未必可以估得足借得足，將來賣樓的時候亦會較難出貨，如果唔熟，不是理想投資。

很多年青朋友都喜歡村屋，住大啲、住平啲，很多時候仲會有泊車位，可以過過駕駛癮。賬面成本確實比較平，例如標準村屋是每層700呎，例如15000可以租到，差不多質素的單位，九龍區大約要18000，表面上平一截，實際上係咪爭咁遠？

之前有朋友搬到新界北村屋，在火車站還要再轉小巴，每天到尖沙咀上班，來回車費要5~60元，小巴比較早收，玩夜咗或者OT夜咗要搭的士，每程300元！平均每月交通費近3000元，如果搬到尖沙咀附近的舊樓，例如佐敦、油麻地，每程車只需幾元，早啲出門口行路返工都仲得，計落成本其實差唔多。

朋友喜歡駕駛，最初見村屋包車位好開心，可以開車到處去，市區租個車位隨時要3~4000元，但後來又發現原來唔係爭咁遠！因為開車出市區的油錢、路費等，來回一次超過100元，在公司附近搵位泊仲貴，日泊要150元。於是變了Sunday Driver！

實際支出其實慳不了多少，時間…才是損失最大的！早起返工已經夠攰，每天上班來回交通要兩小時，返工放工繁忙時間人又多，搭港鐵往往冇位座要硬企，成身散晒。就算可以開車都唔好受，因為早起冇精神，仲要塞成個鐘車，也是受罪。

筆者剛剛相反，情願貴少少都住公司附近，近到可以走路上班，分享自己的想法，如果可以將每天兩小時交通省下來，將精神體力省下來，傾吓秘撈搵吓錢，再唔係瞓多覺，唔係仲好咩？

年青人喜歡自由、大自然生活無可厚非，去人哋屋企玩總是開心過癮的，但要自己每天來回則不容易，所以我建議，如果你真係想試試，可以租住先，試一年半載睇睇慣唔慣。買樓則可以買一些位置靚的、熱門的投資，進可攻退可守。

作者簡介：1% Anthony（第一桶金）、一巴仙（1%）投資培訓學院創辦人，TVB有樓萬事足、BenSir睇樓團II等顧問，多年來協助無數年青人成功上車，無數小業主倍增資產，財務自由！除了住宅，亦活躍於大陸樓、工商廈活化重建等，團隊是市場上最活躍的新晉發展商之一。

免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責。而本網頁所有專欄作者的觀點，不代表本媒體立場。