理財個案｜同事日玩港股夜炒美股自認投資勁！讀者驚股災想清貨求意見

【理財個案】讀者同事日玩港股夜炒美股自認投資勁，嫌讀者投資技術差，他擔心股災想為投資組合清貨儲現金，另有家人給予20萬投資，求意見。

理財個案｜讀者來信：驚股災想清貨求意見

Hello老師你好，想請教你小小問題，關於我同我屋企人的投資組合。問題1. 最近我同同事有一D爭執，遇到一班刁民同暴徒爭啲想出手打架，因為我係咁叫佢哋清倉而家好高位，佢哋唔肯聽仲不斷短炒，日玩港股夜晚美股。

佢哋而家好睇唔起我，而且覺得玩幾個月就儲到首期，自己投資仲勁過巴菲特（回報率，話巴菲特都係21%），佢哋話一星期50%係合格，一睇就知班人太年輕。所以我知道係時候要清小小貨同埋準備定啲現金。不過遇到小小問題。

投資組合如下：

（01810.HK）小米，12蚊買入2,000股，於25蚊放左1,000股，手上仲有1,000股
（06160.HK）百濟神州，152.5買入200股，月頭買了未放，打算持有3至5年直至佢哋王牌藥PD-1係全國/全球都廣泛應用
（09988.HK）阿里巴巴，282在去年10月尾螞蟻唔成功上市時買了一手，而家240至250左右。

阿里巴巴是否應沽出？

問題就嚟啦，我手上而家貨值Around 8.8萬至9.6萬，但係現金係有小小爆，我用耀才比媽展買大啲DD，所以手上冇cash。一直好想清咗隻（09988.HK），留番小米同百濟神州，其他Keep Cash可以係大跌時有錢入市，你意下如何？阿里巴巴係搵一日升市時沽咗佢可以嗎？

家人20萬投資組合

另外屋企人比左20萬我投資(仲有10萬備用現金)，我之前落堂都有問過你你話唔建議冇貨，上完堂後幫屋企人建了小小倉，如下：

（01038.HK）長江基建 @ 40.35元買入 1,000股 = 40,350（而家42至44左右）
（06060.HK）眾安在線 @ 35.5元買入 800 股 = 28,000左右（而家47至50蚊左右）

Total 7萬以內，而家有13萬Cash係手準備大跌入市。買（01038.HK ）因為極度穩健，堅持派息同埋管理層反而趁疫情期間，好積極收購世界各地既公司，既可以去拓展業務 / 享有成本優勢，而且而家買入價好平。

買（06060.HK ）因為今年你見ZA bank係香港地鐵都有好多廣告搞虛擬銀行，保費收入都有按年上升，而且有國家支持係大陸開始有數位化人民幣保險服務，仲拓展健康生態圈想學阿里健康/平安好醫生咁樣做線上應趁，醫完病就sell保險。想問而家組合OK？

股災到來要如何部署？

問題二：想問下股災嚟到的話，應該係買入新的股票，定係加注係現時手上的股票好？·因為我真係R爆頭如果真係有大跌機會，真係唔知買邊一隻會比較有利?

老師介唔介意講下記得你話舊年3月你係唔同價位買小米，平均成本拉到12蚊之外，仲有冇對手上股票加注？你會建議加注手上貨定係買入新股比較好?

問題三：今年都因為環球印錢多，都係低息環境，有冇話咩行業會比較有利？同埋係咪會有更多潛力股會受惠？

龔成老師分析：無人知個市幾時跌

1）你唔好同人爭論，第一，根本無意思，第二，幫唔到佢哋，佢哋有佢哋的想法，第三，你會被佢哋影響情緒，投資好需要「理性」的，第四，唔好估頂，唔好叫人賣晒D股票，無人知個市幾時跌。你唔需要理會別人，我地只要做好自己就得，這事情多遇過無數次，不用理會，不要浪費自己時間。

最重要是「平衡配置」

我唔建議你減晒所有貨，點都要有基本的貨，無人知股市是否會回落，無人知。最重要是「平衡配置」。至於你持有的3隻股，都有質素，其實都可以長線。如果可以當然全部持有，但如果一定要賣，其實都難選，你賣阿里（09988.HK）都可以的。

至於你家人，長建（01038.HK ）無問題，但眾安（06060.HK）唔建議持有太多，始終資金是你家人，承受風險能力會較低，而這股風險會高少少。小注可以。

股災時要建立組合

2）當股災時，最重要是建立組合，以及買入較有投資值博率的股票。例如某類股跌得最多，值博率最高，而長遠潛在回報最高。

上年疫情初期，當時股市出現恐慌，我主力入3隻，比亞迪（01211.HK）大約$40增持（這股一直都是我最大持股，大部分貨只入不出）。小米（01810.HK），平均價$12。必瘦站（01830.HK），當時應該$2，因為認為佢因疫情打擊，股價跌，較平，但長遠無事。

分析業務發展

3）其實最重是分析業務發展，低息可能對有些行業利好，例如地產，但如果本質增長唔強，都唔能夠叫最有利。

【按此訂閱《香港財經時報》HKBT 新聞快訊】

作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。

免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責。而本網頁所有專欄作者的觀點，不代表本媒體立場。