理財個案】讀者表示對於自己2020年4月買入人生首隻股票盈富(02800.HK)及5月買入領展(00823.HK),覺得兩次行動都合理。反而隨後購入眾安及高偉電子感不理智。

理財個案|貨van司機固定包月人工68K!月儲23K點投資可淨賺100萬|龔成教室

理財個案|讀者來信:今年買入人生首隻股票盈富覺合理 

龔sir , 話說睇完你啲書之後,明白長線投資概念,但原來實際執行上又發現問題想分享並向你請教。首先,我係4月買入人生第一隻股票(02800.HK),$23.45。之後係5月國安法消息個日買入2手(00823.HK) ,$60。我對自己呢兩次行動都覺得合理。

後悔錯過平價購入優質股

不過到左8月底,我受朋友影響以52.5高位買入(06060.HK),再在10月頭又以3.9買入(01415.HK)。我覺得自己在8、10月所做得決定不理智,但點解都買咗係因為覺得唔抵...因為我記得4、5月的時候(00700.HK)只係$360,(09988.HK)係$170,(00285.HK)係$14、15,(03690.HK)係$70,(01810.HK)係$10。仲有好多好多優質股都屬便宜,但自己冇把握到...反而自己持有的升幅只有幾%...我想問你自己有冇錯過呢D啲機會而後悔?

自覺高價購入眾安

近日,我重新睇多次巴菲特同你的書,重新確立長期持有方針,我自己亦開始分析手持的公司。(02800.HK)及(00823.HK)都冇問題,但(06060.HK)同(01415.HK)我分析完有問題想問。先講(06060.HK) ,佢係互聯網保險,股東包括螞蟻,平安同騰訊,毛利之前三年都係虧損,2020半年先開始賺錢,不過ROE係負數,其實不應該買入,而合理價大約係得$15?我竟然以52.5買入...

高偉電子被低估?

至於(01415.HK),佢係Apple相機供應商,毛利最近5年都穩定,現金流持續上升,負債率下降,不過ROE比較低,不過10%,而且市值只有35億,但我計過佢個合理價係$5,$4係便宜?所以我覺得3.9入係冇問題?呢個公司係被低估?辛苦龔sir了!

龔成老師分析:要學懂睇得準這概念 

我自1999年開始買股票,頭幾年,經常都有你的經歷,贏少少就賣出優質股,但之後卻大升,之後持有無質素的股,又死都唔止蝕。其實,學習要過程的,你已經不斷進步,但好多事要你經歷過先得。我現時,平均一年只買1、2隻股票,就是想自己「分析得較準」才出手,買入後,長線持有。你要學懂睇得準這概念,唔好太心急投資,買入及賣出都是。

眾安業務有發展力

眾安(06060.HK),業務都有發展力的,但業務仍有不確定性。佢最近開始由虧轉盈,反映之前的投資開始有收成,暫時睇是正面的,但之後的發展仍有未知,這一定會令股價波動。市場考慮到佢的增長力,所以比佢較高估值,你要分析,佢「將來」的情況,因此,你買入價雖然貴,但之後就要睇佢將來發展。

高偉電子本質不過不失

至於高偉電子(01415.HK)本質算是不過不失,其實幾年前熱炒,令這股升至過熱水平,之後市場發現行業的增長並不是高增長,只是平穩增長,所以股價都有調整。因此,有時都會出現市場估值過高的情況,都要留意這點。這股盈利都幾波動,增長力是有的。但整體質素算是中等,潛力度有少少的。不過,現價已過了合理區頂,要注意風險。

按此訂閱《香港財經時報》HKBT 新聞快訊

編按:專欄作者龔成是財經書作者,至今出版超過10本財經書,包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等,過往曾以萬元月薪滾出數百萬,現為股票班導師,身家過千萬元。

免責聲明:本網頁刊載的所有投資技巧及分析,僅供參考用途。讀者作出任何投資決定前,要自行判斷及審慎處理,更要自行掌握市場最新變化。若不幸招致任何損失,概與本網頁及相關作者與受訪者無關,本網頁概不負責 。而本網頁所有專欄作者的觀點,不代表本媒體立場。