理財個案｜貨van司機固定包月人工68K！月儲23K點投資可淨賺100萬

【理財個案】貨van司機有固定包月工作，月入68,000元，扣除3萬元供樓、15,000元家用，每月有23,000元可作投資，想知可否在15年內淨賺100萬。

理財個案01｜讀者來信：月儲23K點投資可15年賺100萬

本人貨van司機有固定包月工作，月入6萬8左右。扣除供樓3萬，家用1萬5，剩下的可以點投資？

有冇可能15年內搵到100萬呢？

龔成老師分析：月儲萬五、15年都有270萬

照你上述的收支，最多可以有$23,000剩，我相信你每月儲$15,000是無問題的。一年就能儲$18萬，15年，未計回報已經有$270萬。只要投資平種增長股，相信15年累積$400萬至$500萬都可以。例如，做月供股票，每月$10,000。你可以考慮盈富（02800.HK）$4,000。

月供10,000元（盈富＋3隻股票）

另外再加3隻（每隻$2,000）：銀娛（00027.HK）、恒基（00012.HK）、港鐵（00066.HK）、平安（02318.HK）、粵海（00270.HK）、領展（00823.HK）、希慎（00014.HK）、太古地產（01972.HK）等，你可以了解下這些股票，然後從中選股。

高增長力高股票推介

如果想增長力高少少，可考慮：安碩恆生科技ETF（03067.HK）、阿里（09988.HK）、騰訊（00700.HK）、港交所（00388.HK）、舜宇光學（02382.HK）、小米（01810.HK）、比亞迪（01211.HK）、中生製藥（01177.HK），但就要明白波動性比上述會高咗，同時風險大咗，你要自己平衡。部分貴，要等回少少先入。

至於每月餘下$5,000，就儲現金，大跌市投資。

【按此訂閱《香港財經時報》HKBT 新聞快訊】

理財個案02｜如何計算舜宇光學市盈率

你好，龔SIR。我係之前上過你基礎班既學生。我用左市盈率去估值舜宇光學科技（2382.HK）。市盈率，我用左2016至2020既每股盈利既平均數去做合理每股盈利，之後再去你比的價網揀了2016至2020既市盈率，因為我見2010-2015個市盈率好低，有少少吾夠代表性。所以就用左2016-2020再排大至細，抽中間3個。就用左32.12 同37.06。再乘番每股盈利$2.28。之後計出黎再加減10%。計到出黎就係65同92。

我想問我係咪應該調高番少少個市盈率，定我計錯左? 係咪可以參考番瑞聲科技（2018.HK）既市盈率去做市盈率參考？

龔成老師分析：多角度分析

其實你計算無錯，我地估值無絕對的方法，不同角度會有不同的結果，有時我會同時同幾個角度去估值。而「2010-2015個市盈率好低，有少少吾夠代表性」，你正確的。

你計算的方法，是一個較為保守的方法，而我認為保守是無問題的。但好多時我會同時用另一情景去估值，就是假設佢有較高的增長。雖然瑞聲同舜宇是同行，但增長力及技術發展好唔同，因此，強行比較未必適合。

舜宇以佢最新的增長力及長遠發展，同30倍市盈率是可以的，只是運用EPS時，可以有較多的預期因素，根據不少大行分析，佢2021年的每股盈利，平均預測去到$5。當我地為高增長股進行估值時，過往的數據參考價值會低左，反而同將來數據會多D。如果以$5及30倍市盈率作基礎，$150都是合理價。

理財個案03｜求百分百準確揀倍升股

一直留意，你所揀嘅每隻都好有抗跌力，而且總係倍升！最近個市回咗好多，個個都想從中尋寶，但點先可以做到你咁百發百中，百分百準確呢？？？

龔成老師分析：散戶常犯3個錯誤

大量分析，小心出手。我平均一年分析50間公司，這些公司都是經過選股過程後，確認了是基本的優質股，然後再每個星期，花6-8小時去睇一間，以了解佢的優質度、平貴。雖然一年分析50間公司，但我會好耐心，等佢哋跌到平，或接近平的水平，先會出手。買入後就長線持有。

而一般的散戶，實在太心急，第一，唔做功課，第二，好心急就下決定，唔會耐心等靚價先買，第三，無耐性持有，升少少就賣。

編按：專欄作者龔成是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。

免責聲明：本網頁刊載的所有投資技巧及分析，僅供參考用途。讀者作出任何投資決定前，要自行判斷及審慎處理，更要自行掌握市場最新變化。若不幸招致任何損失，概與本網頁及相關作者與受訪者無關，本網頁概不負責。而本網頁所有專欄作者的觀點，不代表本媒體立場。

作者簡介：龔成（龔成Facebook專頁）是財經書作者，至今出版超過10本財經書，包括《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》等，過往曾以萬元月薪滾出數百萬，現為股票班導師，身家過千萬元。