讀者來信:Anthony Sir你好!最近我都經常有出去睇樓,但代理都冇乜筍盤介紹,但係我睇成交網的時候,明明見到唔少筍價成交,但係唔知點解問代理又話冇,點解總係冇我份呢?

500萬只買到200呎香港樓!同價去泰國買面積大10倍!點解唔買海外樓|第一桶金

回覆讀者來信:點解代理要俾筍盤你? 

作為用家、作為新手,代理冇筍盤俾你,正常不過!
或者你可以反過來問問你自己:「點解代理要俾筍盤你?」
首先你要明白,代理的工作是甚麼?是促成交易!
然而面對用家、新手,要促成交易,難好多!點解?

自住樓通常要求多多

用家…因為是自己住的關係,往往要求多多!
最近就有一位學員呻,幫父母換樓,睇咗幾十間都唔啱心水:「高層又話畏高,低層又話嘈,又要向南,斜少少都話唔得!」玩咗幾個月,最後都係冇買到,你話激死唔激死?

新手船頭驚鬼 船尾驚賊 

新手…因為缺乏經驗,往往船頭驚鬼,船尾驚賊!
睇完一大輪,傾好價錢,市場一有負面新聞就驚,就縮沙!甚至是遠在千里的美國大選、英國脫歐都驚一餐,對好多朋友來說,買的單位只是一個幾百萬的上車盤,有幾大關係呢?

沒父幹母幹的年青人!只靠普通打工仔收入、如何在一兩年內買樓上車|第一桶金

代理絕不喜歡招呼用家、新手

所以對代理來說,絕不喜歡招呼用家、新手!
今時今日,樓市受制於辣招,二手供應大跌,筍盤更少之又少,個個都話想買筍盤,如果你是代理,筍盤得一個,你第一時間會俾邊個?代入代理的思維你就明,一定有先後次序!

有筍盤首選益自己或親友

  • 首選,自己或者親友!

有超筍盤,當然自己買先,如果已經有樓,冇名買唔到,第一時間就會諗起自己的家人、親戚朋友,益咗自己人先,人之常情。 

  • 次選,相熟的投資者!

正如之前所講,代理的工作,是要促成交易,相對用家來說,容易得多!

唔使睇樓 直接俾支票

用家對市場不熟悉,就算真係有個筍盤放在面前,都唔識得分,更加唔識得珍惜機會。相反投資者就快得多了!用家睇完又睇,相反我們專業投資者,如果遇上超筍盤,基本上樓都唔使睇。代理報盤過來,望望相片,起起底,估價都唔使估,就可以即時飛的去俾支票了。

專業投資者 佣金比較疏爽

我們買樓就是這樣的,就算自己冇名,都會即時介紹俾朋友,就好似我平時收到筍盤,冇名再買,就會Share俾準備買樓的同學。如果你是代理,有筍盤俾邊個?

另一個分別是,很多專業投資者,俾佣金都會比較疏爽。

用家喜歡跟代理講價

用家很多時候計埋啲婆仔數,喜歡跟代理講價,佣金打八折啦,收一半啦,試想想,如果你上班,老闆問你可唔可以出糧出一半,你會有甚麼反應?相反很多成功的專業投資者,都會善待幫到他們賺錢的代理,佣金有多冇少,如果你是代理,有筍盤俾邊個?

地產代理是投資者緊密伙伴

所以,作為用家、新手,代理有筍盤唔俾你好正常!
想代理俾筍盤你,就要學習專業投資者的知識與技巧,尤其是與代理溝通合作的技巧,對投資者來說,能幫到他們賺錢的代理,是他們的緊密伙伴,而不是敵人。

按此訂閱《香港財經時報》HKBT 新聞快訊

編按:專欄作者為1% Anthony( 第一桶金)、一巴仙(1%)投資培訓學院創辦人,TVB有樓萬事足、BenSir睇樓團II等顧問,多年來協助無數年青人成功上車,無數小業主倍增資產,財務自由!除了住宅,亦活躍於大陸樓、工商廈活化重建等,團隊是市場上最活躍的新晉發展商之一。

免責聲明:本網頁刊載的所有投資技巧及分析,僅供參考用途。讀者作出任何投資決定前,要自行判斷及審慎處理,更要自行掌握市場最新變化。若不幸招致任何損失,概與本網頁及相關作者與受訪者無關,本網頁概不負責 。而本網頁所有專欄作者的觀點,不代表本媒體立場。